Si Kristo diha sa atubangan ni Pilato

Ecce Homo [Ania Siya], ni Antonio Ciseri

Hunyo 19–25

Mateo 27; Marcos 15; Lucas 23; Juan 19

“Natapos Na”

Sugdi ang imong pagpangandam sa pagtudlo pinaagi sa mainampuong pagbasa sa Mateo 27; Marcos 15; Lucas 23; ug Juan 19. Tinguhaa ang pagpakabuhi nga takos sa Espiritu aron nga ikaw makahatag og gamhanang pagsaksi sa Manluluwas ug sa Iyang Pag-ula.

pagpaambit nga icon

Dapita ang Pagpaambit

Dapita ang matag sakop sa klase sa pagpili og kapitulo gikan sa basahonon karong semanaha ug mogahin og pipila ka minuto sa pagbasa niini, nga mangita og pulong, mga pulong, o usa ka detalye nga nagtudlo nila og butang nga makahuluganon mahitungod sa Manluluwas ug sa Iyang misyon. Hatagi sila og mga oportunidad sa pagpaambit kon unsay ilang nakit-an ug ipasabot nganong makahuluganon kini ngadto kanila.

icon sa pagtudlo

Itudlo ang Doktrina

Mateo 27; Marcos 15; Lucas 23; Juan 19

Ang pagkaandam ni Jesukristo nga mag-antos nagpakita sa Iyang gugma alang sa Amahan ug alang kanatong tanan.

• Aron matabangan ang imong klase nga makasabot kon sa unsang paagi nga ang pag-antos ug kamatayon sa Manluluwas diha sa krus nagpakita sa Iyang gugma, sulayi ang kalihokan sama niini: Hatagi ang matag sakop sa klase og usa ka kasingkasing nga papel, ug dapita sila sa pagsulat diha sa ilang kasingkasing og mga pulong gikan sa 1 Mga Taga-Corinto 13:4–7 nga naghulagway sa gugmang putli. Dayon hangyoa sila sa pagsiksik sa Mateo 27; Marcos 15; Lucas 23; o Juan 19 ug isulat diha sa pikas bahin sa ilang kasingkasing ang pipila ka bersikulo nga nagpakita kon giunsa sa Manluluwas sa pagpakita ang gugma nga gihulagway diha sa mga pulong nga ilang gipili. Tugoti sila sa pagpakigbahin kon unsay ilang makit-an. Unsa nga mga kasinatian ang nakatabang sa mga sakop sa klase nga makasabot sa gugma sa Manluluwas?

  korona nga mga tunok

  Ang mga sundalo “naghimo silag purongpurong sa mga sangang tunokon ug gibutang nila kini sa iyang ulo” (Marcos 15:17).

• Ang art makatabang sa mga sakop sa klase sa paghanduraw sa ubang mga panghitabo nga ilang mabasahan karong semanaha. Tingali imong bahinon ang klase ngadto sa mga grupo ug tahasan ang matag grupo og usa ka hulagway (tan-awa sa “Dugang nga mga Kapanguhaan”alang sa gisugyot nga mga hulagway). Ang mga sakop sa klase makabasa sa mga bersikulo nga naghulagway sa panghitabo nga gipakita diha sa ilang hulagway. Makapaambit dayon sila sa ilang mga hunahuna ug mga pagbati mahitungod sa mga panghitabo—lakip kon sa unsang paagi ang hulagway nakatabang kanila nga mas masabtan ang Pag-ula sa Manluluwas. Awhaga ang mga sakop sa klase sa paghatag og pagpamatuod bahin sa Manluluwas ug sa Iyang Pag-ula.

Mateo 27:11–60

Ang karaang mga propeta nakakita na sa panan-awon sa pag-antos ug Paglansang sa Manlululwas.

• Ang karaan nga mga propeta nanagna sa makadaghan bahin sa mga panghitabo sa kataposang mga takna sa Manluluwas. Usa ka paagi nga matabangan ang mga sakop sa klase nga makita kini mao ang paghatag sa matag tawo og usa o dugang pa sa mga kasulatan diha sa “Dugang nga mga Kapanguhaan” ug hangyoon sila sa pagpangita sa mga bersikulo diha sa Mateo 27 nga nagpakita kon sa unsang paagi nga ang mga kasulatan natuman. Tingali maghimo ka og usa ka tsart nga motukma sa mga panagna uban sa mga katumanan niini. Sa unsang paagi nga kining mga panagna makapalig-on sa atong hugot nga pagtuo diha ni Jesukristo?

Mateo 27:27–49; Marcos 15:16–32; Lucas 23:11, 35–39; Juan 19:1–5

Ang oposisyon dili makapahunong sa buhat sa Dios.

• Aron matabangan ang mga sakop sa klase nga matinud-anong makaatubang sa oposisyon samtang sila magpakabuhi nga matinuoron sa ilang pagtuo, mahimo nimo silang dapiton sa pagbasa sa mga bersikulo nga naghulagway sa pagpanggukod nga giatubang sa Manluluwas (tan-awa sa Mateo 27:27–49; Marcos 15:16–32; Lucas 23:11, 35–39; John 19:1–5). Unsa ang atong makat-onan gikan sa mga tubag sa Manluluwas nga makatabang kanato sa pag-atubang sa oposisyon? Unsa pa ang laing mga ehemplo sa pag-atubang sa oposisyon nga makatabang kanato? (Tan-awa, pananglitan sa Joseph Smith—Kasaysayan 1:24–25.)

Lucas 23:34–43

Ang Manluluwas nagtanyag kanato og paglaom ug kapasayloan.

• Bisan sa Iyang kataposang mga gutlo, ang Manluluwas mipadayon sa pagtanyag og paglaom ug kapasayloan. Paghunahuna og mga paagi sa pagdasig sa mga sakop sa klase sa pagsunod sa Iyang ehemplo. Pananglitan, makahangyo ka sa katunga sa klase sa pagbasa sa Lucas 23:34–38 (lakip sa bersikulo 34, footnotec, nga nakahatag og ideya gikan sa Hubad ni Joseph Smith) ug ang laing katunga mobasa sa Lucas 23:39–43. Ang mga sakop sa klase mahimong makapaambit unsay ilang nakat-onan mahitungod sa Manluluwas gikan sa mga bersikulo nga gitahas kanila. Unsaon nato pagsunod ang ehemplo sa Manluluwas?

mga kapanguhaan nga icon

Dugang nga mga Kapanguhaan

Mga hulagway sa pagpanggukod, pag-antos, ug kamatayon ni Jesus.

• Ang Paglansang (ChurchofJesusChrist.org ug Libro sa mga Hulagway sa Ebanghelyo, nu. 57; Lucas 23:33–46; Juan 19:23–37)

• Paglubong ni Jesus (LDS.org ug Libro sa mga Hulagway sa Ebanghelyo,nu. 58; Juan 19:38–42)

Ang mga kasulatan nga nagtagna sa mga pagsulay ug kamatayon ni Jesukristo.

• Isaias 53:5, 7

• 1 Nephi 19:9

• Isaias 50:6

• Salmo 69:21

• Salmo 22:16

• 1 Nephi 19:10

• Salmo 22:18

• Isaias 53:12

• Salmo 22:7–8

• Salmo 22:1

• Isaias 53:9

Pagpalambo sa Atong Pagtudlo

Pagkuha og kalig-on gikan sa Manluluwas. “Sa imong mga paningkamot sa pagpakabuhi ug pagtudlo nga mas sama sa Manluluwas, dili nimo makalikayan nga dunay higayon nga masayop. Ayaw pagpakawala sa kadasig; hinoon, himoa ang imong mga sayop ug mga kahuyang nga mopadangop kanimo ngadto sa Langitnong Amahan ug sa Manluluwas” (Pagtudlo sumala sa Pamaagi sa Manluluwas, 14).