Si Jesus namulong ngadto ni Pedro didto sa daplin sa baybayon

Feed My Sheep [Pakan-a ang Akong mga Karnero], ni Kamille Corry

Hunyo 26–Hulyo 2

Mateo 28; Marcos 16; Lucas 24; Juan 20–21

“Nabanhaw Siya”

Sa dili pa magtuon sa mga ideya sa pagtudlo niining latid, basaha ang Mateo 28; Marcos 16; Lucas 24; ug Juan 20–21, ug pamalandongi kon sa unsang paagi nga kining mga kapitulo mahimong gamiton sa paglig-on sa pagtuo niadtong imong tudloan.

pagpaambit nga icon

Dapita ang Pagpaambit

Aron matabangan ang mga sakop sa klase sa pagpakigbahin kon unsay ilang nakat-onan diha sa ilang personal ug pamilya nga pagtuon, hangyoa sila sa pagsulat og usa ka kamatuoran gikan sa basahonon nga buluhaton karong semanaha nga ilang gibati nga kinahanglang ikapaambit sa “tibuok kalibotan” (tan-awa sa Marcos 16:15). Sa pagtapos sa klase, ipangutana nila kon nakakita ba sila og bisan unsang dugang nga mga kamatuoran nga gusto nilang ipaambit.

icon sa pagtudlo

Itudlo ang Doktrina

Mateo 28; Marcos 16; Lucas 24; Juan 20

Tungod kay si Jesus nabanhaw, kita usab mabanhaw.

• Mahimo nimo nga hatagan ang mga sakop sa klase og pipila ka minuto sa pagrebyo sa basahonon nga buluhaton karong semanaha ug ang “Pagkabanhaw” diha sa Ang Giya ngadto sa mga Kasulatan ug isulat ang mga kamatuoran nga ilang nakat-onan mahitungod sa Pagkabanhaw. Tugoti ang pipila sa pagpaambit kon unsa ang ilang gisulat, ug awhaga ang mga sakop sa klase sa pag-isa sa ilang mga kamot kon sila makadungog nga dunay mipaambit og usa ka kamatuoran nga susama sa unsay ilang nasulat. Nganong kining mga kamatuoran importante man ngari kanato? Sa unsang paagi nga kini makaimpluwensiya sa atong mga pakigrelasyon? Sa unsang paagi nga kini makaimpluwensiya sa atong mga pagpili?

Lucas 24:13–35

Mahimo kitang modapit sa Manluluwas nga “magpabilin uban kanato.”

• Aron matabangan ang mga sakop sa klase nga makakita sa mga koneksiyon tali sa ilang mga kasinatian ug sa kasinatian sa mga disipulo diha sa karsada paingon sa Emmaus, pagdrowing diha sa pisara og karsada, ug dapita ang mga sakop sa klase sa pagsulat sa mga detalye gikan sa istorya diha sa Lucas 24:13–35 sa usa ka bahin sa karsada. Dayon, sa laing bahin sa karsada, mahimo nilang isulat ang mga pagkapareha nga ilang nakita sa ilang kaugalingong mga kasinatian isip mga sumusunod ni Jesukristo. Sama pananglit, mahimo nilang isulat ang Nakita nila [Siya] apan wala sila makaila (Lucas 24:16) diha sa usa ka bahin sa karsada ug Usahay kita dili maakamatngon sa impluwensiya sa Ginoo sa atong kinabuhi sa laing bahin sa karsada. Unsaon nga makadapit kita sa Manluluwas nga magpabilin uban kanato?

Ang nabanhaw nga Kristo mipakita ngadto sa mga Apostoles

Gitudloan ni Jesus si Tomas, “Tuo ug ayaw na pagduhaduha” (Juan 20:27).

Juan 20:19–29

“Bulahan kadtong motuo bisan wala makakita kanako.”

• Ang inyong klase sa Sunday School mahimong usa ka dapit alang sa mga sakop sa klase sa paglig-on sa pagtuo sa usag usa diha sa mga butang nga dili nila makita. Tingali mahimo nimong sugdan pinaagi sa paghangyo sa usa ka tawo sa pagsummarize sa kasinatian ni Tomas diha sa Juan 20:19–29. Ang mga sakop sa klase mahimong maglista diha sa pisara og ubang mga butang nga gipangayo sa Dios nga atong tuohan nga wala makita. Dayon mahimo nimo silang hangyoon sa pagpaambit og mga kasinatian nga nakapalig-on sa ilang mga pagpamatuod niining mga butanga ug mga panalangin nga miabot ngadto kanila sa ilang pagpakita og hugot nga pagtuo.

Juan 21:1–17

Ang Manluluwas nagdapit kanato sa pagpakaon sa iyang mga karnero.

• Unsa kaha ang makatabang sa mga sakop sa imong klase nga modawat sa pagdapit sa Manluluwas nga “pakan-a ang [Iyang] karnero”? Mahimo nimong sugdan pinaagi sa pagdapit nila nga magbasa sa hilom sa Juan 21:15–17 nga mopuli sa ngalan ni Simon gamit ang kaugalingon nilang ngalan ug ang “akong nati nga karnero” ug “akong karnero” sa mga ngalan sa mga tawo nga ilang gibati nga gusto sa Ginoo nga ilang serbisyohan—sama pananglit, ang mga tawo nga ilang gipangalagaran, mga silingan, o mga tawo nga ilang nailhan diha sa trabahoan o sa eskwelahan. Human sa pipila ka minuto, ang mga sakop sa klase mahimong mopaambit unsay iyang gibati. Unsa ang atong makat-onan mahitungod sa Manluluwas gikan sa Iyang mga binuhatan Juan 21:4–13? Unsay atong mahimo aron makapakaon sa mga nati ug karnero sa Manluluwas? Ang pamahayag ni Elder Gary E. Stevenson sa “Dugang nga mga Kapanguhaan” mahimong makatabang sa pagtubag niining pangutana.

mga kapanguhaan nga icon

Dugang nga mga Kapanguhaan

Unsaon man nato sa “pagpakaon sa [Iyang] karnero”?

Si Elder Gary E. Stevenson mipasabot kon unsaon nato pagtuman sa sugo sa Ginoo sa pagpakaon sa Iyang karnero:

“Kinsa ang magbalantay? Tanang lalaki, babaye, ug bata diha sa gingharian sa Dios usa ka magbalantay. Walay calling nga gikinahanglan. Gikan sa higayon nga mikawas kita gikan sa tubig sa bunyag, gisugo na kita ngadto niini nga buhat. Motabang kita sa uban pinaagi sa gugma tungod kay mao kini ang gisugo sa Manluluwas nga atong buhaton. … Sa higayon nga ang atong mga silingan magkalisod sa temporal o sa espirit[u]wal nga paagi, magdali kita sa pagtabang kanila. Magtambayayong kita sa mga alant[o]son sa usag usa aron mahimo kining gaan. Magbangutan kita uban niadtong nagbangotan. Hupayon nato kadtong nanginahanglan og paghupay [tan-awa sa Mosiah 18:8–9]. Ang Ginoo mahigugmaong naglaom niini gikan nato. Ug moab[o]t ang adlaw nga manubag kita sa atong gihimong pag-atiman sa pagpangalagad sa Iyang panon. [tan-awa sa Mateo 25:31–46]” (“Pagbantay sa mga Kalag,” Liahona, Nob. 2018, 111).

Pagpalambo sa Atong Pagtudlo

Paggahin og panahon alang sa pagpaambit sa mga tigkat-on. “Kon ang mga tigkat-on mopaambit sa ilang nakat-onan, sila dili lamang mobati sa Espiritu ug molig-on sa ilang kaugalingong mga pagpamatuod, apan nag-awhag usab sila sa ubang mga sakop sa klase sa pagdiskobre sa mga kamatuoran sa ilang mga kaugalingon. … Pagreserba og panahon alang sa pagpakigbahin sa mga estudyante diha sa matag leksiyon—sa pipila ka sitwasyon, mahimo nimong mabantayan nga kini nga mga diskusyon mao ang leksiyon” (Pagtudlo sumala sa Pamaagi sa Manluluwas, 30).