dakong hut-ong sa katawhan diha sa tampi sa suba ug gibunyagan diha sa suba

Day of Pentecost [Adlaw sa Pagkunsad sa Espiritu Santo], ni Sidney King

Hulyo 3–9

Mga Buhat 1–5

“Mahimo Kamong Akong mga Saksi”

Kon basahon nimo ang Mga Buhat 1–5 ug magtinguha sa giya sa Espiritu, makadawat ka og inspirasyon mahitungod kon unsa nga mga kamatuoran diha sa mga kapitulo ang makatabang sa mga sakop sa imong klase nga mas hingpit nga mosalig sa Espiritu Santo ug mahimong matinud-anong mga saksi ni Ginoong Jesukristo.

pagpaambit nga icon

Dapita ang Pagpaambit

Adunay daghang makahuloganong mga tudling ug mga baroganan diha sa Mga Buhat 1–5. Usa ka mahinungdanong paagi sa pagdiskobre kon hain ang labing bililhon ug importante ngadto sa mga sakop sa imong klase mao ang pagtugot kanila nga mosulti kanimo kon unsa ang ilang nabantayan diha sa ilang pagtuon. Unsaon ninyo sa pagdapit niining matang sa pagpaambit? Mahimong sama kini ka yano sa paghatag kanila og pipila ka minuto sa pagpangita ug sa pagpaambit og usa ka bersikulo gikan sa Mga Buhat 1–5 diin ilang gibati ang tingog sa Ginoo nga nakigsulti ngadto kanila.

icon sa pagtudlo

Itudlo ang Doktrina

Mga Buhat 1:1–8; 2:37–39; 4:1–13, 31–33

Gigiyahan ni Jesukristo ang Iyang Simbahan pinaagi sa Espiritu Santo.

• Ang pagbasa mahitungod sa mga kasinatian sa mga Apostoles makatabang sa imong mga sakop sa klase nga makit-an kon sa unsang paagi nga sila makadawat sa gahom ug giya gikan sa Espiritu Santo diha sa ilang mga calling ug mga buluhaton sa Simbahan. Usa ka paagi sa pagrebyo sa mga kasinatian diha sa Mga Buhat 1–5 mao ang pagsulat sa pisara og Ang Espiritu Santo mitabang sa mga Apostoles sa paggiya sa Simbahan pinaagi sa: ug dayon dapita ang mga sakop sa klase sa pagsiksik sa Mga Buhat 1:1–8; 2:37–39; ug 4:1–13, 31–33, nga mangita sa mga paagi aron mahuman ang kapahayag [sentence]. Ang mga sakop sa klase makapaambit dayon og mga kasinatian diin ang Espiritu Santo mitabang kanila dinhi niining mga paagiha. Nganong nagkinahanglan ang mga Apostoles sa Espiritu Santo—ug nganong kita nagkinahanglan Kaniya?

Mga Buhat 1:15–26

Ang mga Apostoles ni Jesukristo gitawag sa Dios pinaagi sa pagpadayag.

• Ikonsiderar ang pagdapit sa mga sakop sa klase sa pagpasabot kon sa unsang paagi kaha ang negosyo mopili og ipuli alang sa usa ka ehekotibo nga posisyon. Unsa nga kwalipikasyon kaha ang ilang gipangita? Hangyoa ang mga sakop sa klase sa pagtandi kon sa unsang paagi si Apostol Matias gitawag (tan-awa sa Mga Buhat 1:15–26; tan-awa usab sa 1 Samuel 16:1–13) ug sa mga pulong ni Presidente Gordon B. Hinckley sa “Dugang nga mga Pulong” nga naghulagway kon sa unsang paagi gitawag ang mga Apostoles karon. Sa unsang paagi nga ang mga pamaagi sa Dios alang sa pagpili og mga lider moapekto sa atong hugot nga pagtuo diha sa mga lider nga Iyang gitawag? Ang mga sakop sa klase makapaambit kon sa unsang paagi nga sila nakaangkon og usa ka pagsaksi nga ang apostoles ug mga propeta sa karon nga panahon Iyang gitawag.

Mga Buhat 2:37–47

Ang Espiritu Santo modasig kanato sa paglihok sa unsay atong nakat-onan.

• Samtang magtuon ang mga sakop sa klase sa mga kasulatan diha sa panimalay ug dungan diha sa klase matag semana, mahimong mobati sila kanunay nga “daw gitusok ang ilang kasingkasing” (Mga Buhat 2:37). Mahimong mobati ka nga nadasig sa pagtabang kanila nga mopadayon pa og gamay pinaagi sa pagpangutana, “Unsa may among pagabuhaton?” (Mga Buhat 2:37). Basaha og dungan ang Mga Buhat 2:37–47, nga magdapit sa mga sakop sa klase sa pagsiksik alang sa mga butang nga gibuhat niining grupo sa 3,000 ka tawo isip resulta sa pagdapit ni Pedro. Tingali makapaambit usab sila sa mga paagi nga misunod sila sa inspirasyon gikan sa ilang pagtuon sa pulong sa Dios. Dayon mahimo kang magtagana og panahon sa kataposan sa klase alang sa matag tawo nga pangutan-on ang ilang kaugalingon nga “Unsa may among pagabuhaton?” ug irekord ang ilang mga impresyon.

Si Pedro nagpahiyom ug nagsangyaw nga samaran ang nawong

Bisan pa man nga gidakop ug gidagmalan, maisogong gisangyaw ni Pedro ang ebanghelyo.

Mga Buhat 3; 4:1–21; 5:12–42

Kon kita puno sa Espiritu Santo, makapaambit kita sa ebanghelyo sa walay kahadlok.

• Ang mga sakop sa klase makarebyo sa Mga Buhat 3; 4:1–21; 5:12–42, nga mangita sa mga ehemplo ni Pedro nga walay kahadlok nga nagpamatuod. Unsa ang gipasabot sa pagpamulong nga “sa walay kahadlok nagwali sa mensahe sa Dios”? (Mga Buhat 4:31). Sa unsa nga paagi ang Espiritu Santo makatabang kanato nga walay kahadlok nga makapaambit sa ebanghelyo? Sa unsang paagi nga kining kawalay kahadlok lahi gikan sa pagkamabingkilon? Ang mga sakop sa klase lagmit usab nga dunay mga kasinatian nga ikapaambit nga sila, o usa ka tawo nga ilang nailhan, maisogong nanalipod o mipamatuod sa ebanghelyo.

mga kapanguhaan nga icon

Dugang nga mga Kapanguhaan

Ang pagtawag sa usa ka sakop sa Napulog Duha.

Si Gordon B. Hinckley mipaambit sa mosunod nga mga ideya mahitungod sa proseso sa pagtawag og bag-ong Apostol: “Ang pamaagi talagsaon sa simbahan sa Ginoo. Walay pagtinguha alang sa katungdanan, walay pagpanglimbong alang sa posisyon, walay pagpangampanya sa pagtuboy sa hiyas sa usa ka tawo. Itandi ang pamaagi sa Ginoo ngadto sa pamaagi sa kalibotan. Ang pamaagi sa Ginoo hilom, usa kini ka pamaagi sa kalinaw, kini walay pasundayag o gastohanan. Kini walay pagpanghambog o pagpagara o ambisyon. Ubos sa plano sa Ginoo, kadtong adunay responsibilidad sa pagpili og mga opisyales gidumala sa usa ka mahinungdanong pangutana: ‘Kinsa man ang gusto sa Ginoo?’ Adunay mahilom ug mahunahunaon nga pagtimbang-timbang. Ug adunay dakong panginahanglan sa pag-ampo aron makadawat og kompirmasyon sa Balaang Espiritu nga ang pagpili husto” (God Is at the Helm,” Ensign, Mayo 1994, 53).

Pagpalambo sa Atong Pagtudlo

Dapita ang mga tigkat-on sa paglihok. Ang Espiritu Santo kanunayng modasig kanato sa paglihok sa unsay atong nakat-onan (tan-awa sa Mga Buhat 2:37). Sa dihang nahitabo kini ngadto sa mga tawo nga gitudloan ni Pedro, mihatag siya og imbitasyon (tan-awa sa Mga Buhat 2:38). Ikonsiderar kon unsaon nimo sa pagsunod sa ehemplo ni Pedro.