Si Pablo natumba sa yuta

Conversion on the Way to Damascus [Pagkakabig didto sa Dalan Padulong sa Damasco], ni Michelangelo Merisi da Caravaggio

Hulyo 10–16

Mga Buhat 6–9

“Unsa ang Buot Nimong Ipabuhat Kanako?”

Tun-i ang Mga Buhat 6–9 ug i-rekord ang imong mga hunahuna. Makatabang kini kanimo nga makadawat og pagpadayag kon unsaon sa pagtabang ang mga sakop sa klase mas maduol kang Jesukristo pinaagi sa ilang pagtuon niining mga kapitulo.

pagpaambit nga icon

Dapita ang Pagpaambit

Diha sa pisara, isulat ang mga ngalan sa pipila ka tawo nga nahisgotan diha sa Mga Buhat 6–9, sama ni Esteban, Saulo, Felipe, Ananias, Pedro, ug Tabita o Dorcas. Dapita ang pipila ka sakop sa klase sa pagpaambit og butang nga ilang nakat-onan gikan sa usa niining mga tawhana diha sa ilang pagtuon karong semanaha.

icon sa pagtudlo

Itudlo ang Doktrina

Mga Buhat 7

Ang pagbatok sa Espiritu Santo mosangpot ngadto sa pagsalikway sa Manluluwas ug sa Iyang mga sulugoon.

• Mahimo nimong sugdan ang usa ka panaghisgotan mahitungod sa kasinatian ni Esteban pinaagi sa pagdapit og mga sakop sa klase sa pagrebyo sa mga pulong ni Esteban diha sa Mga Buhat 7:37–53. Unsa ang mga pasidaan nga anaa sa iyang mga pulong nga alang kanato karon? Mahimo kang mag-focus sa pamahayag ni Esteban diha sa Mga Buhat 7:51. Unsa ang gipasabot sa “Gisupak ninyo kanunay ang Espiritu Santo”? Aron masabtan kini nga mga pulong sa mas lawom nga paagi, ang mga sakop sa klase makahisgot og usa o dugang pa niining mga pahina: 2 Nephi 28:3–6; 33:1–2; Mosiah 2:36–37; Alma 10:5–6; ug Alma 34:37–38. Ngano man kaha nga kita usahay “mosupak sa Espiritu Santo”? Unsa ang atong mabuhat aron mas makaila ug makasunod sa mga pag-aghat sa Espiritu Santo?

Mga Buhat 8:9–24

Ang atong kasingkasing kinahanglan nga mahimong “matarong sa atubangan sa Dios.”

• Sa pagtuon sa asoy ni Simon isip usa ka klase, mahimo nimong isulat diha sa pisara ang mga pangutana Kinsa si Simon? Unsa ang iyang gusto? ug Giunsa niya sa pagkuha niini? I-assign ang matag sakop sa klase sa pagbasa sa Mga Buhat 8:9–24, nga mangita sa mga tubag niining mga pangutana. Unsa nga mga kamatuoran ang wala pa masabti ni Simon? Unsa man ang atong makat-onan gikan niini nga kasinatian? Unsaon nato sa pagsiguro nga ang atong mga kasingkasing “matarong diha sa atubangan sa Dios.”? (bersikulo 21).

• Atol sa ilang personal nga pagtuon, ang pipila ka mga sakop sa klase mahimong misulat sa mga kalidad nga anaa ni Esteban ug Felipe nga wala ni Simon (tan-awa sa latid karong semanaha sa Dali Sunod Kanako—Alang sa mga Indibidwal ug mga Pamilya). Kon mao, tingali imong na silang dapiton sa pagpaambit sa unsay ilang nakit-an. Ang mga sakop sa klase mahimo usab nga mopaambit og ubang mga ehemplo gikan sa Mga Buhat 6–9 kabahin sa mga tawo kansang mga kasingkasing matarong atubangan sa Dios, sama ni Felipe ug sa tawo gikan sa Etiopia (tan-awa sa Mga Buhat 8:26–40), Saulo (tan-awa sa Mga Buhat 9:1–22), ug Tabita (tan-awa sa Mga Buhat 9:36–39).

  Si Pedro mipabangon ni Tabita gikan sa patay

  Tabitha Arise [Tabita Bumangon Ka], ni Sandy Freckleton Gagon

Mga Buhat 8:26–39

Ang Espiritu Santo motabang kanato sa paggiya sa uban ngadto ni Jesukristo.

• Aron matabangan ang mga sakop sa klase nga masabtan kon unsaon nila paggiya ang uban ngadto ni Jesukristo (tan-awa sa Mga Buhat 8:31), mahimo nimong dapiton ang duha ka sakop sa klase nga maglingkod nga mag-atubang sa usag usa ug basahon ang panag-istoryahanay nila ni Felipe ug sa tawo nga gikan sa Etiopia diha sa Mga Buhat 8:26–39. Ang ikatulong sakop sa klase mahimong mobasa sa mga bahin nga dili panag-istoryahanay. Unsa ang atong makat-onan gikan sa ehemplo ni Felipe mahitungod sa pagtudlo sa ebanghelyo ngadto sa uban?

• Sa pagsuhid og mga ehemplo sa bag-ong panahon sa asoy diha sa Mga Buhat 8:26–39, ang mga sakop sa klase mahimong mopaambit sa ilang mga kasinatian kalabot sa pagpaambit sa ebanghelyo o sa pagpasakop sa Simbahan. Sa unsang paagi ang Espiritu Santo nagtabang kanila? Sa unsang paagi ang usa ka tawo milihok isip ilang giya? Dapita ang mga sakop sa klase sa pagpamalandong kon kinsa kaha ang ilang magiyahan ngadto sa ebanghelyo.

Mga Buhat 9

Kon kita motugyan ngadto sa kabubut-on sa Ginoo, kita mahimong mga instrumento sa Iyang mga kamot.

• Ang mga sakop sa klase makakat-on og gamhanang mga kamatuoran mahitungod sa ilang kaugalingong pagkakabig pinaagi sa pagtuon sa kasinatian ni Saulo, lakip na ang kamatuoran nga ang tanan makahinulsol ug mausab kon andam sila. Mahimo nimong hangyoon ang mga sakop sa klase sa pagtandi sa kasinatian ni Saulo ngadto sa mga kasinatian ni Alma (tan-awa sa Mosiah 17:1–4; 18; 26:15–21) ug sa mga Anti-Nephi- Lehi (tan-awa sa Alma 24:7–12). Unsa ang gibuhat sa Ginoo aron matabangan kining mga tawo nga makabig? Giunsa nila sa pagpakita ang ilang kaandam sa pag-usab? Unsa nga mga mensahe ang atong makit-an alang sa atong kaugalingong kinabuhi gikan niining mga asoy?

• Sa pag-aghat og panaghisgotan mahitungod sa kasinatian ni Saulo, tingali magdapit ka og pipila ka mga sakop sa klase nga mangandam sa pagpaambit unsa ang ilang makat-onan gikan sa matag seksiyon diha sa mensahe ni Presidente Dieter F. Uchtdorf Naghulat diha sa Dalan sa Damasco” (Liahona, Mayo 2011, 70–77). Sa unsang paagi nga usahay maghulat kita diha sa dalan paingon sa Damasco? Sumala ni Presidente Uchtdorf, unsa may makatabang kanato aron mas makadungog sa tingog sa Dios? Tingali ang mga sakop sa klase mahimo nga mopaambit sa ilang mga kasinatian kalabot sa pagtinguha ug pagsunod sa kabubut-on sa Dios.

Pagpalambo sa Atong Pagtudlo

Magpamatuod bahin ni Jesukristo. Isip magtutudlo, makatabang ka sa mga sakop sa klase sa pagpalig-on sa ilang hugot nga pagtuo diha sa Manluluwas, sama lang sa gibuhat ni Felipe alang sa lalaki nga taga Etiopia pinaagi sa pagtudlo kaniya gikan sa Isaias (tan-awa sa Mga Buhat 8:26–37). Sa pagbuhat niini, kinahanglan gayod nga ikaw adunay kaugalingong mga kasinatian nga nalig-on ang imong hugot nga pagtuo diha sa kasulatan. Ang pagsaksi nga imong ipaambit mahimong gamhanan nga puwersa sa pagtabang sa mga sakop sa klase nga makapalig-on sa ilang mga pagpamatuod ni Jesukristo.