Si Pedro nakig-istorya kang Cornelio

Hulyo 17–23

Mga Buhat 10–15

“Ang Pulong sa Dios Mitubo ug Misanay”

Ang mainampoong pagtuon sa Mga Buhat 10–15 sa dili pa magbasa niining latid makatabang kanimo aron makadawat og mga impresyon gikan sa Ginoo. Ang mga ideya sa ubos mga sugyot lamang.

pagpaambit nga icon

Dapita ang Pagpaambit

Awhaga ang mga sakop sa klase nga mopaambit sa usa ka tawo nga naglingkod sa duol sa butang nga gitudlo sa Espiritu kanila samtang sila nagbasa Mga Buhat 10–15. Dapita ang pipila nga mopaambit sa ilang mga ideya ngadto sa tibuok klase.

icon sa pagtudlo

Itudlo ang Doktrina

Mga Buhat 10; 11:1–18; 15:1–25

Ang Langitnong Amahan nagtudlo kanato og pagtulon-an human sa usa ka pagtulon-an pinaagi sa pagpadayag.

• Ang ubang mga sakop sa klase mahimong adunay sayop nga mga ideya mahitungod sa proseso sa pagdawat og pagpadayag. Mahimong makatabang kanila ang paghisgot kon sa unsang paagi miabot ngadto kang Pedro ang pagpadayag ug unsaon nila sa pagpadayon, “sa walay pag-ukon-ukon” (Mga Buhat 10:20), sa dihang ang pagpadayag daw dili kompleto o dili klaro. Ikonsiderar ang pagdrowing og usa ka linya diha sa pisara ug sa pagsulat sa tumoy sa usa ka linya og Ang ebanghelyo isangyaw ngadto sa mga Hentil. Isip usa ka klase, rebyoha ang Mga Buhat 10 ug 11:1–18, ug dayon dugangi og mga punto diha sa linya nga nagpakita kon giunsa sa Ginoo pagpadayag ngadto kang Pedro sa hinay-hinay nga ang panahon miabot na nga isangyaw ang ebanghelyo ngadto sa mga Hentil. Pananglitan, mahimo kang magsugod sa usa ka punto nga gibutangan og label nga “Si Cornelio nakakita og panan-awon” (Mga Buhat 10:1–6) o magsugod gani sa sugo sa Manluluwas ngadto sa Iyang mga disipulo sa “pagtudlo sa tanang kanasuran” diha sa Mateo 28:19. Unsay atong makat-onan mahitungod sa pagpadayag gikan sa kasinatian ni Pedro? Unsay madugang sa mga pagtulon-an ni Nephi mahitungod sa pagpadayag diha sa 2 Nephi 28:30 ug sa mga pagtulon-an gikan nila ni Elder David A. Bednar ug Elder Dallin H. Oaks sa “Dugang nga mga Kapanguhaan” ngadto sa panaghisgotan?

  batang babaye nagbasa sa mga kasulatan

  Ang personal nga pagpadayag kasagaran moabot sulod sa taas nga panahon pinaagi sa makanunayong paningkamot.

• Mahimo nimong tun-an ang mga higayon diha sa mga kasulatan diin gitudloan sa Ginoo ang mga tawo og pagtulon-an human sa usa ka pagtulon-an. Agig dugang sa kasinatian ni Pedro diha sa Mga Buhat 10, ang mga sakop sa klase mahimong morebyo sa mga kasinatian nila ni Nephi (1 Nephi 18:1–3); Alma (Alma 7:8; 16:20); ug Mormon (3 Nephi 28:17, 36–40). Unsa ang laing mga ehemplo nga mahunahunaan sa mga sakop sa klase diin ang mga tawo nakadawat og espirituwal nga giya “diyutay dinhi ug diyutay didto”? (2 Nephi 28:30). Ngano kaha nga usahay ang Ginoo mopili sa pagpadayag sa mga butang niining paagiha kay sa mohatag kanato og mga tubag nga ang tanan sa usa ra ka higayon? (tan-awa sa Doktrina ug mga Pakigsaad 50:40; 98:12).

• Usahay ang mga miyembro dunay mga pangutana o mga kabalaka mahitungod sa mga kausaban sa mga polisiya ug mga programa sa Simbahan. Mahimong makatabang kanila ang paghisgot kon sa unsang paagi nga ang gipadayag sa pagsugod sa pagsangyaw sa ebanghelyo ngadto sa mga Hentil (tan-awa sa Mga Buhat 10) mipuli sa nag-unang mga instruksyon sa Ginoo ngadto sa Iyang mga disipulo (tan-awa sa Mateo 10:1, 5–6). Unsaon kaha sa mga sakop sa klase pagtubag ang usa ka tawo sa panahon ni Pedro nga misupak sa mando ni Pedro tungod kay misukwahi kini sa nag-unang mga gipangbuhat? Sa unsang paagi nga ang pagpadayag diha sa Mga Buhat 10 makatabang kanato sa pagpatalinghog sa padayon nga pagpadayag sa Ginoo pinaagi sa Iyang propeta?

Mga Buhat 10:9–48

“Ang Dios wala diay pinalabi sa mga tawo.”

• Makabenepisyo ba ang mga sakop sa imong klase gikan sa panaghisgotan kon unsay kahulogan sa “walay pinalabi sa mga tawo”? Mahimong sugdan nimo pinaagi sa pagdapit sa klase sa pagbasa sa mga kasulatan nga nagtudlo nga ang Dios walay pinalabi sa mga tawo, sama sa Mga Taga-Roma 2:1–11; 1 Nephi 17:34–40; 2 Nephi 26:32–33; Alma 5:33; Moroni 8:12; ug Doktrina ug mga Pakigsaad 1:34–35. Hangyoa ang mga sakop sa klase sa pagsulat og posible nga mga kahulogan sa “walay pinalabi sa mga tawo,” base sa unsay ilang nabasahan, ug dayon ipaambit kon unsay ilang nasulat. Sa unsang paagi nga ang mga panghitabo ug mga baroganan diha sa Mga Buhat 10:34–48 nagpakita nga ang Dios walay pinalabi sa mga tawo? Sa unsang paagi nga ang matarong “gidawat” ug “gikahimut-an” sa Dios bisan kon Siya walay pinalabi sa mga tawo? (tan-awa sa Mga Buhat 10:34–35; 1 Nephi 17:35).

  Mahimong kinahanglan nimong tabangan ang mga sakop sa klase nga makasabot nga ang “walay pinalabi sa mga tawo” wala magpasabot nga ang Dios mopanalangin sa tanan og patas nga panalangin nga dili igsapayan ang atong mga aksiyon. Gusto Niya nga ang tanan Niyang mga anak makadawat sa Iyang ebanghelyo, apan ang kahingpitan sa mga panalangin sa ebanghelyo gitagana alang niadtong mohimo ug motuman sa mga pakigsaad ngadto Kaniya.

mga kapanguhaan nga icon

Dugang nga mga Kapanguhaan

Pagdawat og pagpadayag pagtulon-an human sa usa ka pagtulon-an.

Si Elder David A. Bednar mihimo sa mosunod nga mga obserbasyon mahitungod sa sumbanan sa Ginoo bahin sa pagpadayag: “Kadaghanan kanato maghunahuna nga makadawat kita og usa ka tubag o usa ka pag-aghat sa atong kinasingkasing nga mga pag-ampo ug mga pangamuyo. Ug kita usab kanunayng makapaabot nga ang maong tubag o pag-aghat moabot dayon ug ang tanan sa usa ra ka higayon. Sa ingon, lagmit nga motuo kita nga ang Ginoo mohatag kanato og dako nga tubag diha-diha dayon ug ang tanan sa usa ra ka higayon. Hinoon, ang sumbanan nga gibalik-balik sa paghulagway diha sa mga kasulatan nagsugyot nga makadawat kita og ‘pagtulun-an human sa usa ka pagtulun-an, lagda human sa usa ka lagda,’ o sa laing pagkasulti, daghang ginagmay nga mga tubag sulod sa taas nga panahon. Ang pag-ila ug pagsabot niini nga sumbanan usa ka importante nga yawe sa pagbaton og inspirasyon ug tabang gikan sa Espiritu Santo” (Line upon Line, Precept upon Precept,” New Era,Sept. 2010, 3–4).

Pagpalambo sa Atong Pagtudlo

Sugdi sa mga kasulatan. Sa dili pa modangop sa dugang nga mga kapanguhaan, magmakugihong magtuon sa karaan ug sa modernong mga kasulatan. Ang mainampoong pagtuon sa pulong sa Dios motugot sa Espiritu sa pagtabang kanimo nga magamit ang imong gitun-an samtang magtudlo ka. (Tan-awa sa Pagtudlo sumala sa Pamaagi sa Manluluwas, 12.)