Kataposang Panihapon

In Remembrance of Me [Agig Handumanan Kanako], ni Walter Rane

Mayo 29–Hunyo 4

Mateo 26; Marcos 14; Juan 13

“Agig Handumanan”

Basaha ang Mateo 26; Marcos 14; ug Juan 13,ug pamalandonga ang mga hunahuna ug mga pag-aghat nga mosantop sa imong hunahuna. Unsa nga mga mensahe ang makapanalangin sa mga miyembro sa imong klase?

pagpaambit nga icon

Dapita ang Pagpaambit

Dapita ang mga sakop sa klase sa pagpaambit og butang nga ilang nakat-onan karong semanaha nga nakatabang nila nga makakita og dugang nga kahulogan diha sa sakramento. Unsa may ilang gibuhat ug sa unsang paagi kini nakaapekto sa ilang kasinatian sa pag-ambit sa sakrament?

icon sa pagtudlo

Itudlo ang Doktrina

Mateo 26:20–22

Kinahanglan gayod natong susihon ang atong kaugalingong kinabuhi sa pagtino kon sa unsang paagi magamit ang mga pulong sa Ginoo ngari kanato.

• Nakadungog kita og daghang mga leksiyon sa ebanghelyo sa atong kinabuhi, apan usahay makatintal nga maghunahuna nga kadtong mga leksiyon kasagaran magamit ngadto ubang mga tawo. Usa ka panaghisgotan mahitungod sa Mateo 26:20–22 makatabang kanato nga mabuntog kining kalagmitan. Unsa nga mga leksiyon ang atong makat-onan kon giunsa paggamit sa mga disipulo ang mga pulong sa Manluluwas ngadto sa ilang kaugalingon? Kon adunay mga sakop sa klase nga mobasa sa pakisayran niining istorya sa mensahe ni President Dieter F. Uchtdorf “Ako Ba, Ginoo?,” makapaambit sila og mga ideya nga ilang naangkon (Liahona, Nob. 2014, 56–59).

Mateo 26:26–29

Ang sakramento usa ka oportunidad sa paghinumdom sa Manluluwas.

• Unsaon sa mga sakop sa klase sa pagpasabot sa sagradong ordinansa sa sakramento ngadto sa usa ka tawo nga dili pamilyar niini? Tingali mahimo kamong magdungan sa paghimo og lista nianang lagmit ipangutuna sa usa ka tawo mahitungod sa sakramento sama sa “Nganong ang Manluluwas mihatag kanato sa sakramento? Nganong ang pan ug tubig ingon ka gamhanang simbolo ni Jesukristo? Unsa ang atong gisaad kon kita mokaon sa sakramento? Unsa nga mga saad ang atong madawat?” Ang mga sakop sa klase makapangita sa mga tubag sa mosunod nga mga kapanguhaan: Mateo 26:26–29; Doktrina ug mga pakigsaad 20:75–79. Tingali imo usab ipaambit ang mga ideya gikan ni Elder D. Todd Christofferson diha sa “Dugang nga mga Kapanguhaan.”

  babaye nga nag-ambit sa sakramento

  Ang sakramento makatabang kanato sa paghinumdom kang Jesukristo.

• Ang mga sakop sa klase mahimong makabenepisyo gikan sa pagkadungog sa mga ideya sa usag usa mahitungod kon unsaon sa paghinumdom ang Manluluwas atol sa sakramento ug sa tibuok semana (tan-awa sa Lucas 22:19–20; Doktrina ug mga Pakigsaad 6:36–37). Tingali mahimo nimo silang dapiton sa pagpaambit kon unsa ang makatabang kanila ug sa ilang pamilya nga makahinumdom sa Manluluwas ug motuman sa ilang mga pakigsaad. Makapaambit usab sila sa unsa ang ilang buhaton aron mahimo ang sakramento nga usa ka sagradong kasinatian.

Juan 13:1–17

Ang Manluluwas mao ang atong ehemplo sa pagserbisyo sa uban sa mapainubsanong paagi.

• Aron matabangan ang mga sakop sa imong klase sa pagpamalandong sa kamahinungdanon sa paghugas ni Jesus sa mga tiil sa Iyang mga disipulo, mahimo nimong dapiton ang usa ka sakop sa klase nga modala sa papel ni Pedro ug ipainterbyo sa tibuok klase. Awhaga ang mga sakop sa klase sa pagsiksik sa Juan 13:1–17 ug sa paghunahuna og makahuloganong mga pangutana nga ilang ipangutana ni Pedro. Unsa ang atong makat-onan gikan niining istorya nga mahimong makaapekto kon unsaon nato sa pagserbisyo sa uban?

Juan 13:34–35

Ang atong gugma alang sa uban mao ang usa ka timaan nga kita mga tinuod nga mga disipulo ni Jesukristo.

• Unsaon kaha nimo pagdasig ang mga sakop sa klase aron mas magmahigugmaon? Tingali mahimo nimo silang pangutan-on kon unsa nga kinaiya ang ilang nabatyagan kon sila makahimamat og tawo nga usa ka sumusunod ni Kristo. Mahimo nimo silang dapiton sa pagsiksik sa Juan 13:34–35 aron makakat-on kon unsaon sa pag-ila sa tinuod nga mga disipulo sa Manluluwas. Unsay atong buhaton aron atong mahimo nga ang gugma mao ang motino nga kinaiya sa atong pagkadisipulo? Tingali imong mahisgotan kon sa unsang paagi ang paghigugma sa uban mao ang usa ka paagi sa pagpamatuod ni Jesukristo. Sa unsang paagi nga kita makahimo niini diha sa atong mga pamilya, sa social media, ug sa ubang kahimtang?

• Isip usa ka klase, makakat-on kamo og daghan mahitungod sa kinabuhi sa Manluluwas karong tuiga, lakip na sa daghang ehemplo kon giunsa Niya pagpakita ang Iyang gugma alang sa uban. Usa ka paagi sa pagtabang sa mga sakop sa klase nga makapamalandong sa sugo diha sa Juan 13:34 mao ang pagsulat og Ingon nga Ako Nahigugma Kaninyo diha sa pisara ug ang paghangyo sa mga sakop sa klase sa paglista og mga ehemplo nga ilang mahinumduman gikan sa Bag-ong Tugon nga nagpakita sa gugma ni Jesus. Dayon mahimo nimong isulat ang Higugmaa Ang Usag Usa diha sa pisara ug hangyoa ang mga sakop sa klase sa paglista og mga paagi nga atong masunod ang Iyang ehemplo sa gugma. Ang mga sakop sa klase tingali makakita og mga ideya diha sa usa sa mga video nga nalista diha sa “Dugang nga mga Kapanguhaan.”

mga kapanguhaan nga icon

Dugang nga mga Kapanguhaan

“Sabta ang mga kalidad ug mga kinaiya ni Kristo.”

Si Elder D. Todd Christofferson nagtudlo, “Ang pasumbingay nga mokaon sa Iyang unod ug moinom sa Iyang dugo dunay dugang nga kahul[o]gan, ug mao kana ang pagsab[o]t og maayo sa mga hiyas ug kinaiya ni Kristo, nga mosalikway sa kinaiyanhon nga tawo ug mahimong mga Santos “pinaagi sa pag-ula ni Kristo ang Ginoo” [Mosiah 3:19]. Sa pag-ambit nato sa tinapay ug tubig sa sakramento kada semana, mas maayo nga atong ikonsiderar kon unsa kahingpit natong ilakip ang Iyang kinaiya ug ang sumbanan sa Iyang walay sala nga kinabuhi sa atong kinabuhi ug pagkatawo” (“Ang Buhing Tinapay Nga Nana[o]g Gikan sa Langit,” Liahona, Nob. 2017, 37).

Mga video mahitungod sa gugma sa diha sa ChurchofJesusChrist.org.

Pagpalambo sa Atong Pagtudlo

Tan-aw pinaagi sa panan-aw sa Dios. Paningkamoti sa pagtan-aw sa mga sakop sa imong klase sama sa pagtan-aw sa Dios kanila, ug ang Espiritu mopakita kanimo sa ilang balaanong bili ug potensyal. Kon buhaton nimo kini, giyahan ka diha sa imong mga paningkamot sa pagtabang kanila (tan-awa sa Pagtudlo sumala sa Pamaagi sa Manluluwas, 6).