Kōjota Eo Āliktata, jān William Henry Margetson

Juun 5–11

Jon 14–17

“Kom̧win Pād Wōt ilo Aō Yokwe”

Ilo am̧ jar ilo ekkatak kōn Jon 14–17, kejekļo̧kjeņ kōn ekōjkan am̧ maron̄ kwaļo̧k iakwe ilo em̧m̧an tata n̄an ro kwoj katakin. Jetōb Kwojarjar eo enaaj bōktok ļōmņak ko n̄an kōļmenļo̧kjeņ eo ilo am̧ ekkatak jeje ko rekwojarjar, Itok, Ļoor Eō—N̄an Kajjojo Armej im Baam̧le ko, im unin tōl in.

Kajjitōk bwe ren Kwaļo̧k

Je nōm̧ba ko 14 n̄an 17 ioon boot eo, rej jutak kōn jepta ko ilo Jon me ro uwaan kūlaaj eo raar riiti wiik in. Kajjitōk ippān ro uwaan kūlaaj eo n̄an je, turinļo̧k kajjojo nōm̧ba in jepta ko, eoon in jipan̄ eo n̄an eoon ko me Jetōb Kwojarjar eo ekar jipan̄ er em̧m̧anļo̧k aer meļeļe ak me rej kōņaan ekōnono kaki āinwōt juon kūlaaj.

Katakin Katak eo

Jon 14:16–27; 15:26; 16:7–15

Jetōb Kwojarjar eo ej jipan̄ kōj kakūrm̧ool jibadbad ko ad āinwōt rikaļoor ro an Jisōs Kraist.

• N̄an jipan̄ ro uwaan kūlaaj eo ekkatak kōn oktak in jerbal ko an Jetōb Kwojarjar, ļōmņak in kajjitōk ippāer n̄an riiti juon ak elōn̄ļo̧k eoon kein: Jon 14:16–27; 15:26; im 16:7–15. Remaron̄ je ioon boot eo ta eo rej ekkatak kōn Jetōb Kwojarjar jān eoon kein. Remaron̄ barāinwōt kappukōt kōļmenļo̧kjeņ ko kōn Jetōb Kwojarjar ilo eoon in jipan̄ ko an jeje ko rekwojarjar im ennaan ko kar kōllaajraki ilo “Kein Jipan̄ ko Jet.” Ekōjkan an Jetōb Kwojarjar eo kar kakūrm̧ool jerbal kein ilo mour ko ad? Kwomaron̄ barāinwōt ļōmņak kōn men ko (object) ak kein alooj ko kwomaron̄ būktok n̄an kūlaaj eo n̄an jipan̄ ro uwaan kūlaaj eo meļeļe jet iaan jerbal kein.

• Ļōmņak in kajjitōk ippān jejjo uwaan kūlaaj eo m̧oktaļo̧k n̄an ekkatak juon iaan kōnono ko an kweilo̧k eo eļap kar elmakoti ilo “Kein Jipan̄ ko Jet” (ak bar juon kōnono an kweilo̧k eļap rejeļā kake kōn) Jetōb Kwojarjar. Kōm̧m̧an bwe ren kwaļo̧k ilo tukadu in ta eo raar ekkatak ippān kūlaaj eo. Ta eo ennaan kein rej kobaiktok n̄an ta eo jekar ekkatak kōn Jetōb Kwojarjar jān Jon 14–16?

Kōjota Eo Āliktata, jān Clark Kelley Price

Jon 15:1–12

Ilo ad pād ilo Kraist, jenaaj jebar leen ko rem̧m̧an im lan̄lōn̄.

• Ļōmņak in bōktok juon mennin eddōk edik (ak juon pija in juon) n̄an kūlaaj eo im kōjerbale n̄an jipan̄ ro uwaan kūlaaj eo pijaikļo̧k an Rilo̧mo̧o̧r eo katakin kōn vine eo im ra ko. Ālkin riiti Jon 15:1–12 āinwōt juon kūlaaj, kwomaron̄ ekōnono kōn ta meļeļe in n̄an “pād ilo [Kraist]” (Jon 15:4). Jejjo ro uwaan kūlaaj eo remaron̄ kwaļo̧k ekōjkan aer kar lo Jon 15:5 bwe em̧ool. (Lale barāinwōt ennaan eo jān Elder Jeffrey R. Holland ilo “Kein Jipan̄ ko Jet.”)

Jon 17

Jemedwōj Ilan̄ im Jisōs Kraist rej ippān doon ilo weppāān.

• Bōlen kwojjab maron̄ katakin aolep m̧ool ko raorōk loi ilo Jon 17 ilo juon iien ekōnono an kūlaaj eo, bōtaab en̄in ej juon wāween n̄an jipan̄ kūlaaj eo etale jejjo iaer. Laajrake ioon boot eo ļōmņak ko jān Jon 17, āinwōt kein:

  • Kadkad eo ad ippān Jisōs Kraist

  • Kadkad eo an Jisōs Kraist ippān Jemen

  • Kadkad eo ad ippān aolepān laļ in

  • Kadkad eo ad ippān doon āinwōt rikaļoor ro An.

  Kajjitōk ippān kajjojo ro uwaan kūlaaj eo n̄an kāālet juon iaan ļōmņak kein im riiti Jon 17, pukōt eoon ko me rej iookļo̧k. Kajjitōk ippān jejjo ro uwaan kūlaaj eo n̄an kwaļo̧k ta eo rej ekkatak.

  Ekōjkan an kadkad eo ad ippān Anij jelet kadkad ko ad ippān doon? Ekōjkan an kadkad ko ad ippān doon jelet kadkad eo ad ippān Anij?

Kein Jipan̄ ko jet

Jetōb Kwojarjar.

• Jerbal 2:37–38; Galetia 5:22–23; 1 Nipai 10:17–19; 2 Nipai 32:3–5; Mosaia 3:19; 3 Nipai 27:20; Moronai 8:26; 10:4–5; Katak im Bujen Ko 8:2–3; 42:17

• Henry B. Eyring, “An Jetōb En Maron̄ Pād Ippāmi,” Liaona, Māe 2018, 86–89

• David A. Bednar, “Receive the Holy Ghost,” Liaona, Nob. 2010, 94–97

• Michelle D. Craig, “Maron̄ ilo Jetōb,” Liaona, Nob. 2019, 19–21

Pād ilo Kraist.

Kile bwe naan eo pād (abide) ewōr an ļōmņak ko raitok kitier im kallim̧ur, Elder Jeffrey R. Holland ekar katakin:

“Innām jekjek eo an [naan] in m̧okta ej ‘pād—bōtaab pād n̄an indeeo.’ … Itok, bōtaab itok in pād wōt. Itok kōn lōke im niknik. …

“Jisōs ekar ba, ‘Kōm ban kōm̧m̧an jabdewōt’ [Jon 15:5]. Ij kam̧ool bwe men eo ej jān Anij em̧ool. Kraist ej aolep men n̄an kōj im jej aikuj in ‘pād’ ilo E n̄an indeeo, jab nee teļeļ, dim wōt, indeeo im indeeo. Bwe leen eo an gospel eo ekitōk maro im ekōjeraam̧m̧an mour ko ad, jej aikuj in dim ilo eddāp n̄an E, Rilo̧mo̧o̧r eo an aolepād wōj, im n̄an Kabun̄ in An, eo ej bōk āt eo ekwojarjar Etan. E ej vine eo me ej unjen m̧ool in kōkajoorļo̧k eo ad im unjen eo wōt an mour indeeo. Ilo E jejjab wōt naaj niknik ak barāinwōt anjo̧ im wiin ilo jerbal in ekwojarjar me ejjamin naaj likjab jān kōj” (“Abide in Me,” Liaona, Māe 2004, 32).

Kōkōm̧anm̧anļo̧k Ad Katakin

En̄jake jetōb eo. “Jemaron̄ in kein jerbal ko ilo pein Anij n̄an jipan̄ ajri ro Nejin ekkatak jān Jetōb eo. N̄an kōm̧m̧ane menin, jej karuwaineneiktok kareel eo an Jetōb eo n̄an mour ko ad im kōketak ro jej katakin er n̄an kōm̧m̧an ejja āinwōt. … Al ko rekwojarjar, jeje ko rekwojarjar, naan ko an rikanaan ro raan kein, kwaļo̧k iakwe im naan in kam̧ool, im iien kōļmenļo̧kjeņ ko relur maron̄ aolep karuwaineneiktok pād eo an Jetōb” (Teaching in the Savior’s Way, 10).