Kraist im rikaļoor ro ilo Gethsemane

Wōjke in Gethsemane, jān Derek Hegsted

Juun 12–18

Luk 22; Jon 18

“En Jab Ankil Aō, a Am̧ Wōt”

Ļōmņak kōn ta eo kwonaaj kōm̧m̧ane n̄an akjo̧ketok Jetōb eo n̄an kūlaaj eo am̧ ilo ami ekōnono kōn iien ko rekwojarjar ilo jepta kein. Jar ilo kappukōt wāween ko n̄an jipan̄ ro uwaan kūlaaj eo kam̧wilaļļo̧k iakwe eo aer n̄an Rilo̧mo̧o̧r eo im tōmak eo aer ilo E.

pija ej bōk jikin kwaļo̧k

Kajjitōk bwe ren Kwaļo̧k

Kajjitōk ippān jejjo ro uwaan kūlaaj eo n̄an kwaļo̧k ta eo raar en̄jake ilo aer riit ilo wiik in im ta eoon ko rekar jipan̄ er en̄jake wāween in.

pija eo ej bōk jikin katakin

Katakin Katak eo

Luk 22:39–46

Jej eromļo̧k āinwōt Kraist n̄e jej kāālet n̄an ajeļo̧k ankilad n̄an ankilan Jemed.

• Waanjon̄ak eo an Rilo̧mo̧o̧r eo n̄an ajeļo̧k n̄an ankilan Jemen enaaj jipan̄ ro uwaan kūlaaj eo n̄e rej aikuj in kōm̧m̧ane ejja āinwōt. N̄an jino juon iien ekōnono, kwomaron̄ kajjitōk ippān ro uwaan kūlaaj eo n̄an kwaļo̧k en̄jake ko ke raar ajeļo̧k er make n̄an juon men eo raar jeļā Anij ekar kōņaan bwe ren kōm̧m̧ane. Kajjitōk ippāer n̄an kwaļo̧k ekōjkan aer kar jeļā ta eo Anij ekar kōņaan bwe ren kōm̧m̧ane im ekōjkan aer kar jeraam̧m̧an kōn ajeļo̧k n̄an Ankilan. Kajjitōk ippān kūlaaj eo n̄an riiti Luk 22:39–46 im kōnono kōn etke Rilo̧mo̧o̧r eo ekar m̧ōņōņō in ajeļo̧k Ankilan n̄an ankilan Jemen. Ekōjkan ad maron̄ ļoor waanjon̄ak eo an Rilo̧mo̧o̧r eo?

• Ilo kakobaba n̄an jerbal in ajeļo̧k eo an Rilo̧mo̧o̧r eo n̄an Anij ilo Luk 22:42, ta waanjon̄ak ko jet kōn An ajeļo̧k jemaron̄ loi ilo Luk 22 im Jon 18? Ekōjkan an Rilo̧mo̧o̧r eo kar ajeļo̧k n̄an ankilan Jemen ilo aolepān mour eo An? Ta eo jemaron̄ kōm̧m̧ane n̄an eromļo̧k āinwōt E? Ennaan eo jān Elder Neal A. Maxwell ilo “Kein Jipan̄ ko Jet” emaron̄ jipan̄ im̧we ro uwaan kūlaaj eo n̄an ļōmņak kōn ekōjkan aer maron̄ ajeļo̧k ankilaer n̄an ankilan Anij.

Luk 22:39–46

Jisōs Kraist ekar kōm̧m̧ane juon Pinmuur ejjeļo̧k jem̧ļo̧kin n̄an kōj.

• Luk 22:39–46 ej kōmeļeļeik ta eo ekar waļo̧k ilo Gethsemane. N̄an jipan̄ ro uwaan kūlaaj eo meļeļe kōn wōj eo an juon make ilo iien in ekwojarjar, bōlen kwomaron̄ je ioon boot eo kajjitōk ko āinwōt Ta eo ekar waļo̧k ilo Gethsemane? im Etke ej aoraōk n̄an n̄a? Ro uwaan kūlaaj eo remaron̄ lo uwaak ko ilo Luk 22:39–46; Alma 7:11–13; Katak im Bujen Ko 19:16–19; im pija in alooj eo “The Savior Suffers in Gethsemane” (ChurchofJesusChrist.org). Remaron̄ barāinwōt lo uwaak ko ilo ennaan eo an Tad R. Callister“Pinmuur eo an Jisōs Kraist” (Liaona, Māe 2019, 85–87).

• Ilo Bok in Mormon, Jekab ej ņa etan Pinmuur eo an Jisōs Kraist “pinmuur eo ejjeļo̧k jem̧ļo̧kin” (2 Nipai 9:7). N̄an jipan̄ ro uwaan kūlaaj eo ta meļeļe menin, kwomaron̄ kwaļo̧k katak ko an Būreejtō Russell M. Nelson ilo “Kein Jipan̄ ko Jet” im kajjitōk ippān ro uwaan kūlaaj eo n̄an kōllaajrak wāween ko me karee eo an en̄taan eo an Rilo̧mo̧o̧r eo maron̄ watōke ejjeļo̧k jem̧ļo̧kin. Remaron̄ barāinwōt riiti eoon in jipan̄ ken an jeje ko rekwojarjar n̄an kakobaba n̄an laajrak eo aer: Hebru 10:10; Alma 34:10–14; Katak im Bujen Ko 76:24; im Moses 1:33. Ekōjkan ad maron̄ kwaļo̧k ad kam̧m̧oolol kōn ta eo Rilo̧mo̧o̧r eo ekar kōm̧m̧ane n̄an kōj?

Piter ej erreļo̧k jān Kraist.

Kaarmejet eo an Piter, jān Carl Heinrich Bloch

Luk 22:54–62

Jemaron̄ tiljek n̄an Jisōs Kraist kōjekdo̧o̧n mijka ko im m̧ōjņo̧ ko ad.

• N̄an jipan̄ ro uwaan kūlaaj eo n̄an pijaikļo̧ iien ko ilo Luk 22:54–62, kwomaron̄ kwaļo̧k juon pija, eo āinwōt Kaarmejete an Piter (ChurchofJesusChrist.org), ak pija in alooj eo,“Jesus Is Tried by Caiaphas, Peter Denies Knowing Him” (ChurchofJesusChrist.org). Ro uwaan kūlaaj eo remaron̄ kwaļo̧k ta eo rej ekkatak jān en̄jake ko an Piter me rej im̧we er n̄an tiljek n̄an Jisōs Kraist.

pija ej bōk jikin kein jipan̄ ko

Kein Jipan̄ ko jet

Ajeļo̧k an kilad n̄an Jemen.

Elder Neal A. Maxwell ekar katakin: “Ilo am̧ ajeļo̧k an kilam̧ n̄an Anij, kwoj leļo̧k n̄an E men eo kwe wōt kwomaron̄ lukkuun leļo̧k n̄an E me ej lukkuun wōjam̧ n̄an leļo̧k. Jab kanooj katoto n̄an pukōt lokatok eo ak n̄an jino likūt menin le;tok eo an ankilam̧ n̄an ioon!” (“Remember How Merciful the Lord Hath Been,” Liaona, Māe 2004, 46).

Pinmuur eo ejjeļo̧k jem̧ļo̧kin

Būreejtōn Russell M. Nelson ekar katakin:

“Pinmuur eo [an Jisōs Kraist] ejjeļo̧k jem̧ļo̧kin—ejjeļo̧k an jem̧ļo̧ki. Ekar barāinwōt ejjeļo̧k jem̧ļo̧kin bwe aolep armej ren mour jān eo ejjamin-jem̧ļo̧k. Ekar ejjeļo̧k jem̧ļo̧kin ilo jekjek ko an en̄taan eo An ekanooj ļap. Ekar ejjeļo̧k jem̧ļo̧kin ilo iien, likūt juon jem̧ļo̧k n̄an jekjek eo an katok kōn mennin mour. Ekar ejjeļo̧k jem̧ļo̧kin ilo ļap eo an—ekar aikuj in kōm̧m̧an juon wōt alen n̄an aolep. Im tūriam̧o kake eo an Pinmuur eo ej ilo̧k ejjab wōt n̄an oran armej ejjeļo̧k jem̧ļo̧kin, ak barāinwōt n̄an oran laļ ko ejjeļo̧k jem̧ļo̧kin kar kōm̧anm̧an jān E. Ekar ejjeļo̧k jem̧ļo̧kin eļapļo̧k jān jabdewōt kein jon̄ak an armej ak keidi n̄an mour in.

“Jisōs ekar e wōt eo me emaron̄ kar letok kain pinmuur rōt in ejjeļo̧k jem̧ļo̧kin, jān ke E ekar ļotak jān juon m̧am̧an eo ewabanban im juon baba eo ewabanban. Kōnke kōn jolet in ļotak eo ejej uwaan, Jisōs ekar juon Armej ejjeļo̧k jem̧ļo̧kin” (“The Atonement,” Ensign, Nob. 1996, 35).

Kōkōm̧anm̧anļo̧k Ad Katakin

Erom̧ juon kein jerbal ettā ilo Jetōb. “Jibadbad eo am̧ āinwōt juon rūkaki ejjab n̄an kōm̧m̧ane juon katakin eo ekabwilōn̄lōn̄ ijello̧kin n̄an jipan̄ ro jet bōk kareel eo jān Jetōb Kwojarjar, eo ej rūkaki eo em̧ool” (Teaching in the Savior’s Way, 10).