Te tamā’ara’a hope’a

Te tamā’ara’a hope’a, nā William Henry Margetson

5–11 nō Tiunu

Ioane 14–17

« ’Ia vai herehia atu ā ’outou e au »

’A tuatāpapa ai ’oe nā roto i te pure i te Ioane 14–17 ’a feruri e nāhea ’oe i te fa’a’ite maita’i atu ai i tō ’oe here i te feiā tā ’oe e ha’api’i ra. E hōro’a mai te Vārua Maita’i i te mau mana’o i tō ’oe ferurira’a ’a tuatāpapa ai ’oe i te mau pāpa’ira’a mo’a, Mai, pe’e mai—nō te mau ta’ata hō’ēiho ’e te ’utuāfare, ’e teie fa’anahora’a.

ītona fa’a’itera’a

Tītau i te mana’o

’A pāpa’i te mau numera 14 ’e tae atu i te 17 i ni’a i te tāpura ’ere’ere, ’ei fa’ahōho’ara’a i te mau pene i roto i te Ioane tā te mau pīahi e tai’o i teie hepetoma. E ani i te tahi mau pīahi ’ia pāpa’i i pīha’i iho i te nūmera o te pene tāta’itahi, te fa’ahorora’a o te hō’ē ’īrava tā te Vārua Maita’i i tauturu ia rātou ’ia ’ite rahi atu ā ’aore rā o tā rātou e hina’aro i te tuatāpapa ’ei piha ha’api’ira’a.

ītona ha’api’ira’a

Ha’api’i i te ha’api’ira’a tumu

Ioane 14:16–27 ; 15:26 ; 16:7–15

E tauturu te Vārua Maita’i ia tātou ’ia fa’aoti i tā tātou fā ’ei mau pipi nā Iesu Mesia.

• Nō te tauturu i te mau pīahi ’ia ha’api’i mai i te ti’ara’a rau o te Vārua Maita’i, ’a feruri e ani ia rātou ’ia tai’o hō’ē ’aore rā hau atu o teie mau pāpa’ira’a mo’a i muri nei : Ioane 14:16–27 ; 15:26 ; ’e 16:7–15. E nehenehe rātou e pāpa’i i ni’a i te tāpura ’ere’ere te mea tā rātou i ’apo mai nō ni’a i te Vārua Maita’i nā roto mai i teie mau ’īrava. E nehenehe ato’a rātou e ’imi mai i te mau mana’o nō ni’a i te Vārua Maita’i i roto i te mau pāpa’ira’a mo’a ’e te mau parau poro’i tei tāpurahia i roto « Te tahi atu ā mau mātēria tauturu ». Nāhea te Vārua Maita’i i te fa’atupura’a i teie mau ti’ara’a i roto i tō tātou orara’a ? E feruri ato’a e ’āfa’i mai i te mau tao’a ’aore rā te mau hōho’a nō te tauturu i tā ’oe mau pīahi ’ia māramarama i te tahi o teie mau ti’ara’a.

• ’A feruri i te ani nā mua atu i te tahi mau pīahi ’ia tuatāpapa i te hō’ē o te mau a’ora’a i roto i te ’āmuira’a rahi tei fa’a’itehia i roto « Te tahi atu ā mau mātēria tauturu » (’aore rā te tahi atu mau a’ora’a i roto i te ’āmuira’a rahi tā rātou i ’ite) nō ni’a i te Vārua Maita’i. ’A fa’ati’a ia rātou ’ia fa’a’ite poto mai i te piha ha’api’ira’a i te mea tā rātou i ’apo mai. E aha atu ā tā teie mau parau pōro’i e fa’a’ite mai nei, i te mea tā tātou i ’ite a’ena nō ni’a i te Vārua Maita’i nā roto mai i te Ioane 14–16 ?

Iesu e paraparau ra i te mau pipi

Te tāma’ara’a hope’a, nā Clark Kelley Price

Ioane 15:1–12

’A ’ati atu ai tātou i te Mesia, e fa’ahotu mai tātou i te hotu maita’i ’e e ’oa’oa ho’i.

• A feruri e ’āfa’i mai i te hō’ē tumu rā’au na’ina’i (’aore rā hō’ē hōho’a nō te tumu rā’au) i roto i te piha ha’api’ira’a ’e ’ia fa’a’ohipa i te reira nō te tauturu i te mau pīahi ’ia hi’o fa’ahou i te ha’api’ira’a a te Fa’aora nō ni’a i te vine ’e te mau ’āma’a. I muri a’e i te tai’ora’a te Ioane 15:1–12 ’e te mau pīahi, ’ia tāu’aparau ’outou i te aura’a ’ia « ’ati atu i te [Mesia] » (Ioane 15:4). E nehenehe te tahi mau pīahi e fa’a’ite mai nāhea tō rātou ’itera’a e parau mau te Ioane 15:5. (Hi’o ato’a i te fa’ahitira’a parau a Elder Jeffrey R. Holland i roto « Te tahi atu ā mau mātēria tauturu ».)

Ioane 17

’Ua tāhō’ē maita’i roa te Metua i te ao ra ’e o Iesu Mesia.

• E’ita paha ’oe e ha’api’i i te tā’āto’ara’a o te mau parau mau faufa’a rahi e ’itehia i roto i te Ioane 17 nā roto i te hō’ē noa tāu’ara’a parau, teie rā hō’ē rāve’a nō te tauturu i te piha ’ia hi’o haere e rave rahi o te reira. ’A pāpa’i i ni’a i te tāpura ’ere’ere te mau parau tumu nō roto mai i te Ioane 17, mai teie :

  • Tō tātou aura’a ’e Iesu Mesia

  • Te aura’a o Iesu Mesia ’e tōna Metua Tāne

  • Tō tātou aura’a ’e te toe’a o te ao nei.

  • Tō tātou aura’a te tahi ’e te tahi ’ei mau pipi nāna

  ’A ani i te pīahi tāta’itahi ’ia mā’iti i te hō’ē o teie mau parau tumu ’e ’ia tai’o i te Ioane 17, ma te mā’imi mai i te mau ’īrava e tū’ati atu i te reira parau tumu. ’A ani i te rahira’a o te mau pīahi ’ia fa’a’ite mai e aha tā rātou i ha’api’i mai.

  Nāhea tō tātou aura’a e te Atua i te pāitaita i ni’a i tō tātou aura’a te tahi ’e te tahi ? Nāhea tō tātou aura’a te tahi ’e te tahi i te pāitaita i ni’a i tō tātou aura’a ’e te Atua ?

ītona mātēria tauturu

Te tahi atu ā mau mātēria tauturu

Te Vārua Maita’i.

• Te ’Ohipa 2:37–38 ; Galatia 5:22–23 ; 1 Nephi 10:17–19 ; 2 Nephi 32:3–5 ; Mosia 3:19 ; 3 Nephi 27:20 ; Moroni 8:26 ; 10:4–5 ; Te Ha’api’ira’a tumu ’e te mau Fafaura’a 8:2–3 ; 42:17

• Henry B. Eyring, « Tōna Vārua ’ia vai i pīha’i iho ia ’outou », Liahona, Mē 2018, 86–89.

• David A. Bednar, « ’A fāri’i mai i te Vārua Maita’i », Liahona, Novema 2010, 94–97

• Michelle D. Craig, « Te ’aravihi pae vārua », Liahona, Novema 2019, 19–21

’Ati atu i te Mesia.

Te parau ’ati e mau tū’atira’a ïa nō te parau tāmau ’e te ha’apa’o, ’ua ha’api’i mai o Elder Jeffrey R. Holland :

« Nō reira te aura’a o teie [parau] e ‘’ati ïa—e ’ati rā ’e a muri noa atu’ … ’A haere mai, ’a haere mai rā nō te fa’aea roa mai. ’A haere mai ma te pāpū ’e te fa’a’oroma’i …

« ’Ua parau Iesu, ‘i ta’a ’ē atu ’outou iā’u ra, ’aore roa ïa e mea e ti’a ia ’outou’ [Ioane 15:5]. Tē fa’a’ite pāpū atu nei au ē, e parau mau te reira nā te Atua. ’Ua riro te Mesia ’ei mau mea ato’a nō tātou ’e e ti’a ia tātou ’ia ‘’ati tāmau noa iāna ra, ma te tu’utu’u ’ore, ma te tāmau noa, ’e a muri noa atu. ’Ia ’ūa’a ’e ’ia ha’amaita’i te hotu o te ’evanelia i tō tātou orara’a, e ti’a ia tātou ’ia ’ati-pāpū-hia atu iāna, te Fa’aora nō tātou pā’āto’a, ’e i tāna ’Ēkālesia, tei pi’ihia i tōna ra i’oa mo’a. ’O ’oia te vine tei riro ’ei puna mau nō te pūai nō tātou ’e te puna ana’e nō te ora mure ’ore. Nōna, e’ita tātou e fa’a’oroma’i noa, e manuia ’e e upo’oti’a ato’a rā tātou i roto i teie ’ohipa mo’a o te ’ore roa e fa’aru’e ia tātou » (« ’A ’ati mai iā’u », Liahona, Mē 2004,32).

Ha’amaita’ira’a i tā tātou ha’api’ira’a

Ani i te Vārua. « E nehenehe tātou e riro ’ei mauha’a i roto i te rima o te Atua nō te tauturu i tāna mau tamari’i ’ia ha’api’i mai nā roto i te Vārua. Nō te rave i te reira, e ani tātou i te fa’aurura’a a te Vārua i roto i tō tātou orara’a ’e e fa’aitoito i te feiā tā tātou e ha’api’i ra ’ia nā reira ato’a … E nehenehe te pehe mo’a, te mau pāpa’ira’a mo’a, te mau parau a te mau peropheta nō te mau mahana hope’a nei, te fa’a’itera’a i te here ’e te ’itera’a pāpū, ’e te mau taime ferurira’a hau, e tītau i te Vārua ’ia pārahi mai » (Ha’api’ira’a mai tā te Fa’aora, 10).