Te ’āua nō Getesemane, nā Derek Hegsted

12–18 nō Tiunu

Luka 22 ; Ioane 18

« ’Eiaha tō’u hina’aro, ’ia tupu rā tō ’oe hina’aro »

’A feruri e aha tā ’oe e rave nō te tītau manihini i te Vārua i roto i tā oe piha ha’api’ira’a ’a ’āparau ai ’outou i te mau ’ohipa mo’a i tupu i roto i teie mau pene. ’A ’imi nā roto i te pure i te mau rāve’a nō te tauturu i te mau pīahi ’ia fa’ahōhonu i tō rātou here i te Fa’aora ’e tō rātou fa’aro’o iāna.

Tītau i te mana’o

E ani e rave rahi mau pīahi ’ia fa’a’ite mai e aha tā rātou i putapū ’a tai’o ai rātou i teie hepetoma ’e e aha te mau ’īrava tei tauturu ia rātou ’ia fāri’i mai i teie huru.

Ha’api’i i te ha’api’ira’a tumu

Luka 22:39–46

E riro mai tātou mai te Mesia ra te huru ’ia mā’iti ana’e tātou e auraro i tō tātou hina’aro i te hina’aro o te Metua.

• E tauturu te hi’ora’a o te Fa’aora i te aurarora’a i te Metua i tā ’oe mau pīahi ’ia hina’aro ana’e rātou e nā reira ato’a. Nō te ha’amata i te hō’ē tāu’ara’a parau, e ani ’oe i te mau pīahi ’ia fa’a’ite mai i te hō’ē taime ’a auraro ai rātou i te tahi mea tā rātou i ’ite e hina’aro te Atua ’ia nā reira rātou. E ani ia rātou ’ia fa’a’ite mai e mea nāhea tō rātou ’itera’a e aha tā te Atua e hina’aro ia rātou ’ia rave, ’e e mea nāhea rātou i te ha’amaita’ira’ahia nō te aurarora’a i tōna hina’aro. ’A ani i te mau pīahi ’ia tai’o te Luka 22:39–46 ’e ’ia feruri nō te aha te Fa’aora i hina’aro ai i te auraro i tōna iho hina’aro i tō te Metua. Nāhea tātou i te pe’e i te hi’ora’a maita’i o te Fa’aora ?

• Ta’a ’ē noa atu te ’ohipa auraro a te Fa’aora i te Atua i roto i te Luka 22:42, e aha te tahi atu mau hi’ora’a nō tāna aurarora’a tā tātou e ’ite mai i roto i te Luka 22 ’e te Ioane 18 ? Nāhea tō te Fa’aora aurarora’a i te hina’aro o tōna Metua i te roara’a o tōna orara’a ? E aha tā tātou e rave nō te riro hau atu mai iāna te huru ? E tauturu te fa’ahitira’a parau a Elder Neal A. Maxwell i roto « Te tahi atu ā mau mātēria tauturu » ’ia fa’auru i te mau pīahi ’ia feruri nāhea rātou ’ia auraro atu i tō te Atua hina’aro.

Luka 22:39–46

’Ua rave Iesu Mesia i te hō’ē tāra’ehara mure ’ore nō tātou.

• Tē fa’ata’a nei te Luka 22:39–46 i te ’ohipa i tupu i Getesemane. Nō te tauturu i te mau pīahi ’ia māramarama iho i te aura’a o teie ’ohipa mo’a i tupu, penei a’e e nehenehe ’oe e pāpa’i i ni’a i te tāpura ’ere’ere i te mau uira’a mai teie E aha tei tupu i Getesemane ? ’e Nō te aha e mea faufa’a nō’u ? E ’ite mai te mau pīahi i te mau pāhonora’a i roto i te Luka 22:39–46 ; Alama 7:11–13 ; Te Ha’api’ira’a Tumu ’e te mau Fafaura’a 19:16–19 ; e te video « The Savior Suffers in Gethsemane [’Ua mamae te Fa’aora i Getesemane » (ChurchofJesusChrist.org). E ’ite ato’a mai rātou i te mau pāhonora’a i roto i te poro’i a te peresideni Tad R. Callister « Te tāra’ehara a Iesu Mesia » (Liahona, Mē 2019, 85–87).

• I roto i te Buka a Moromona, ’ua pi’i Iakoba i te tāra’ehara a Iesu Mesia « hō’e tāra’ehara mure ’ore » (2 Nephi 9:7). Nō te tauturu i te mau pīahi ’ia ta’a maita’i i te aura’a o te reira, ’a fa’a’ite atu i te mau ha’api’ira’a a te peresideni Russell M. Nelson i roto « Te tahi atu ā mau mātēria tauturu » ’e e ani i te mau pīahi ’ia tāpura i te mau rāve’a e nehenehe ai te mana o te tusia a te Fa’aora e fa’arirohia ’ei mea mure ’ore. ’Ia tai’o ato’a mai rātou i te mau pāpa’ira’a mo’a i muri nei ’e ’ia tu’u atu i roto i tā rātou tāpura : Hebera 10:10 ; Alama 34:10–14 ; Te Ha’api’ira’a Tumu ’e te mau Fafaura’a 76:24 ; ’e Mose 1:33. Nāhea tātou i te fa’a’ite i tō tātou māuruuru nō te mea tā te Fa’aora i rave nō tātou ?

Te fāri’i-’ore-ra’a o Petero, nā Carl Heinrich Bloch

Luka 22:54–62

E nehenehe tātou e ha’apa’o maita’i ia Iesu Mesia noa atu tō tātou mau mata’u ’e mau paruparu.

• Nō te tauturu i te mau pīahi ’ia hi’o i te mau ’ohipa e tupu ra i roto i te Luka 22:54–62, ’a fa’a’ite atu i te hōho’a, te fāri’i-’ore-ra’a o Petero (ChurchofJesusChrist.org), ’aore rā te video « Jesus Is Tried by Caiaphas, Peter Denies Knowing Him [Iesu i tāmatahia e Kaiapha, ’ua ha’avare o Petero ē ’ua ’ite ’oia iāna] » (ChurchofJesusChrist.org). ’Ia fa’a’ite mai te mau pīahi e aha tā rātou i ha’api’i mai nā roto mai i te mau ’ohipa i tupu nō Petero ’o te fa’auru ia rātou ’ia vai ha’apa’o maita’i ia Iesu Mesia.

Te tahi atu ā mau mātēria tauturu

Aurarora’a tō tātou hina’aro i tō te Metua.

’Ua ha’api’i Elder Neal A. Maxwell : « ’A auraro ai ’outou i tō ’outou mau hina’aro i tō te Atua, tē hōro’a ra ïa ’outou iāna te mea ana’e e ti’a ia ’outou ’ia hōro’a iāna o tā ’outou e hōro’a mau. ’Eiaha e tīa’i maoro nō te ’imi i te fata e ’aore rā ’ia ha’amata i te tu’u i te hōro’ara’a o tō ’outou mau hina’aro i ni’a iho i te reira fata ! » (« ’A ha’amana’o i te aroha o te Fatu, » Liahona, Mē 2004, 46).

Te tāra’ehara mure ’ore

’Ua ha’api’i te peresideni Russell M. Nelson :

« E mea mure ’ore te tāra’ehara a [Iesu Mesia]—’aore e hope’ara’a. E mea mure ’ore ato’a nō te mea e fa’aorahia te ta’ata ato’a i te pohe hope’a ’ore. E mea mure ’ore ’ia fa’aauhia i tōna mamae rahi. E mea mure ’ore i roto i te tau, nā roto i te fa’ati’a-hope-ra’a i te hōho’a o te tusia ’ānimara. E mea mure ’ore i roto i te ’ā’anora’a—’ia ravehia te reira hō’ē noa taime nō te tā’āto’ara’a. ’E ’aita te aroha o te tāra’ehara i tae noa i te hō’ē nūmera hope’a ’ore o te mau ta’ata, ’ua tae ato’a rā i te hō’ē nūmera hope’a ’ore ato’a o te mau ao tei hāmanihia e āna. E mea mure ’ore hau atu i te mau fāito ta’ata ’aore rā te ’ite o te tāhuti nei.

« ’O Iesu ana’e te nehenehe e pūpū i taua huru tāra’ehara mure ’ore ra, nō te mea ’ua fānauhia ’oia i te hō’ē metua vahine tāhuti ’e te hō’ē Metua Tāne mure ’ore. Nō tōna fānaura’a ta’a ’ē, ’ua riro Iesu ’ei hō’ē ta’ata mure ’ore » (« The Atonement, » Ensign, Novema 1996, 35).

Ha’amaita’ira’a i tā tātou ha’api’ira’a

’Ia riro ’ei mauha’a ha’eha’a nō te Vārua. « Tā ’outou fā ’ei ’orometua ha’api’i e ’ere ïa te hōro’ara’a i te hō’ē ha’api’ira’a fa’ahiahia, ’o tē tauturura’a rā ia vetahi ’ē ’ia fāri’i i te mana o te Vārua Maita’i, ’o ’oia ho’i te ’orometua ha’api’i mau ».(Ha’api’ira’a mai tā te Fa’aora, 10).