« 19–25 nō Tiunu. Mataio 27 ; Mareko 15 ; Luka 23 ; Ioane 19 : ‘’Ua oti’ » Mai, pe’e mai—nō te Ha’api’ira’a Sābati : Faufa’a ’Āpī 2023 (2022)

« 19–25 nō Tiunu. Mataio 27 ; Mareko 15 ; Luka 23 ; Ioane 19 », Mai, pe’e mai—nō te Ha’api’ira’a Sābati : 2023

Ecce Homo,, nā Antonio Ciseri

19–25 nō Tiunu

Mataio 27 ; Mareko 15 ; Luka 23 ; Ioane 19

« ’Ua oti »

’A ha’amata i tā ’oe fa’aineinera’a nō te ha’api’i nā roto i te tai’ora’a nā roto i te pure Mataio 27 ; Mareko 15 ; Luka 23 ; ’e Ioane 19. ’A ’imi ’ia ora ti’a mā nō te Vārua ’ia ti’a ia ’oe ’ia fa’a’ite pāpū ma te pūai nō te Fa’aora ’e tāna tāra’ehara.

Tītau i te mana’o

’A ani i te pīahi tāta’itahi ’ia mā’iti i te hō’ē pene nō roto mai i te tai’ora’a nō teie hepetoma ’e ’ia rave i te tahi nau minuti nō te hi’opo’a i te reira, nō te ’imi i te hō’ē parau, te hō’ē pereota, ’aore rā te hō’ē ha’amāramaramara’a ’o tē ha’api’i nei ia rātou i te tahi mea faufa’a rahi nō ni’a i te Fa’aora ’e tāna misiōni. ’A hōro’a atu ia rātou i te mau rāve’a nō te fa’a’ite mai i te mea tā rātou i ’ite mai ’e ’ia tātara mai nō te aha e mea faufa’a te reira nō rātou.

Ha’api’i i te ha’api’ira’a tumu

Mataio 27 ; Mareko 15 ; Luka 23 ; Ioane 19

’Ua fa’a’ite mai Iesu Mesia i tōna hina’aro ’ia māuiui ’ei fa’a’itera’a i tōna here i te Metua ’e ia tātou pā’āto’a.

Nō te tauturu i te mau pīahi ’ia hāro’aro’a e nāhea te mamaera’a ’e te pohera’a o te Fa’aora i ni’a i te sātauro i te fa’a’ite mai i tōna here, ’a tāmata i teie ’ohipa ri’i : ’A hōro’a i te pīahi tāta’itahi te hō’ē ’api parau e hōho’a māfatu, ’e e ani ia rātou ’ia pāpa’i i ni’a i tā rātou māfatu te hō’ē pereota nō roto mai i te 1 Korinetia 13:4–7 ’o tē fa’a’ite ra i te aroha. ’A ani ia rātou i muri iho ’ia ’imi mai te Mataio 27 ; Mareko 15 ; Luka 23 ; ’aore rā Ioane 19 ’e ’ia pāpa’i i ni’a i te tahi atu pae o tā rātou māfatu te tahi mau ’īrava ’o tē fa’a’ite nei e mea nāhea tō te Fa’aora fa’a’itera’a i te here tei fa’a’itehia i roto i te pereota tā rātou i mā’iti. ’Ia fa’a’ite mai rātou e aha tā rātou i ’ite mai. E aha te mau ’ohipa tei tupu tei tauturu ia tātou ’ia ta’a maita’i i te here o te Fa’aora ?

’Ua « ha’une ihora te mau fa’ehau i te hō’ē hei rā’au taratara, ’e tu’u atu ra i ni’a iho i tāna upo’o » (Mareko 15:17).
E tauturu te anoiho i te mau pīahi ’ia hi’o i te tahi o te mau ’ohipa i tupu tā rātou i tai’o i teie hepetoma. Penei a’e e nehenehe ’oe e vāhi i te piha ha’api’ira’a ’ei pupu ’e ’ia hōro’a i te hō’ē hōho’a i te pupu tāta’itahi (hi’o « Te tahi atu ā mau mātēria tauturu » nō te tahi atu mau hōho’a). E tai’o te mau pīahi i te mau ’īrava e fa’ahōho’a nei i te ’ohipa e tupu ra i ni’a i tā rātou hōho’a. I muri iho e fa’a’ite mai rātou i tō rātou mau mana’o ’e tō rātou mau ’āehuehu nō ni’a i teie mau ’ohipa i tupu—’ia parau ato’a mai nāhea te hōho’a i te tauturu ia rātou ’ia māramarama maita’i a’e i te tāra’ehara a te Fa’aora. E nehenehe ato’a ’oe e feruri e fa’a’ite atu i te mau video « Jesus Is Condemned before Pilate [’Ua fa’autu’ahia Iesu i mua ia Pilato] » ’e « Jesus Is Scourged and Crucified [’Ua tā’iri ’e ’ua fa’asātaurohia ’oia] » (ChurchofJesusChrist.org). E fa’aitoito i te mau pīahi ’ia fa’a’ite mai i tō rātou ’itera’a pāpū nō ni’a i te Fa’aora ’e tāna tāra’ehara.

3:19

4:49

Mataio 27:11–60

’Ua tohu ātea te mau peropheta tahito i te mamae ’e te fa’asātaurora’a o te Fa’aora.

’Ua tohu te mau peropheta tahito e rave rahi mau ’ohipa i tupu i te mau hora hope’a o te Fa’aora. Hō’ē rāve’a nō te tauturu i te mau pīahi ’ia ’ite i te reira ’o te hōro’ara’a ïa i te pīahi tāta’itahi hō’ē ’aore rā hau atu o te mau pāpa’ira’a mo’a i roto « Te tahi atu ā mau mātēria tauturu » ’e e ani ia rātou ’ia ’imi mai i te mau ’īrava i roto i te Mataio 27 e fa’a’ite nei nāhea te mau pāpa’ira’a mo’a i te tupura’a. E nehenehe ’oe e hāmani i te hō’ē tāpura e fa’atū’ati te mau tohura’a ’e tō rātou tupura’a. Nāhea teie mau tohura’a i te ha’apūai i tō tātou fa’aro’o ia Iesu Mesia ?

Mataio 27:27–49 ; Mareko 15:16–32 ; Luka 23:11, 35–39 ; Ioane 19:1–5

E’ita te pāto’ira’a e tāpe’a i te ’ohipa a te Atua.

Nō te tauturu i te mau pīahi ’ia fa’aruru ma te ha’apa’o maita’i i te pāto’ira’a, ’a ora ai rātou ma te mau māite i tō rātou fa’aro’o, e ani ’oe ia rātou ’ia tai’o i te mau ’īrava e fa’a’ite nei i te hāmani-’ino-ra’a tā te Fa’aora i fa’aruru (hi’o Mataio 27:27–49 ; Mareko 15:16–32 ; Luka 23:11, 35–39 ; Ioane 19:1–5). E aha tā tātou e ha’api’i mai nā roto mai i te mau pāhonora’a a te Fa’aora ’o te tauturu ia tātou ’ia fa’aruru i te pāto’ira’a ? E aha te tahi atu mau hi’ora’a o te fa’arurura’a i te pāto’ira’a e tauturu ia tātou ? (Hi’o, ’ei hi’ora’a, Iosepha Semita—’Ā’amu 1:24–25.)

Luka 23:34–43

’Ua pūpū mai te Fa’aora ia tātou te tīa’ira’a ’e te fa’a’orera’a hara.

Noa atu i roto i tōna mau taime hope’a, ’ua tāmau noa te Fa’aora i te pūpū i te tīa’ira’a ’e te fa’a’orera’a hara. ’A feruri i te mau rāve’a nō te fa’auru i te mau pīahi ’ia pe’e i tōna hi’ora’a. ’Ei hi’ora’a, ’a ani i te ’āfara’a o te piha ’ia tai’o Luka 23:34–38 (e tae noa atu te ’īrava 34, fa’ahorora’ac, ’o tē hōro’a mai i te ha’amāramaramara’a nō roto mai i te ’īritira’a a Iosepha Semita) ’e i te tahi atu ’āfara’a ’ia tai’o i te Luka 23:39–43. ’Ia fa’a’ite mai te mau pīahi e aha tā rātou i ha’api’i mai nō ni’a i te Fa’aora nā roto mai i tā rātou mau ’īrava i fa’ata’ahia. Nāhea tātou i te pe’e i te hi‘ora’a maita’i o te Fa’aora ?

Te tahi atu ā mau mātēria tauturu

Mau hōho’a nō te hāmani-’ino-ra’a, te mamae, ’e te pohera’a o Iesu.

Tē horoi ra Pilato i tōna rima (ChurchofJesusChrist.org ; Mataio 27:11–25)
Te Mesia ’e te hei rā’au taratara (ChurchofJesusChrist.org ; Mataio 27:26–31)
Iesu e amo ra i tōna sātauro (ChurchofJesusChrist.org ; Ioane 19:13–18)
Te fa’asātaurora’a (ChurchofJesusChrist.org ’e Te buka hōho’a ’evanelia, N°57 ; Luka 23:33–46 ; Ioane 19:23–37)
Hunara’a o Iesu (ChurchofJesusChrist.org ’e Te buka hōho’a ’evanelia, N°58 ; Ioane 19:38–42)

Tē fa’a’ite nei te mau pāpa’ira’a mo’a i te māuiui rahi ’e te pohera’a o Iesu Mesia.

Ha’amaita’i i tā tātou ha’api’ira’a

’A huti mai i te pūai nā roto mai i te Fa’aora. « I roto i tā ’outou tauto’ora’a ’ia ora ’e ’ia ha’api’i hau atu mai tā te Fa’aora, e’ita ’outou e manuia i te tahi taime. ’Eiaha ra e ha’aparuparu ; ’a vaiiho i tā ’outou mau hape ’e mau paruparu ’ia arata’i ia ’outou i te Metua i te ao ra ’e i te Fa’aora » (Ha’api’ira’a mai tā te Fa’aora, 14).