Keriso ma soo i Ketesemane

Togalaau o Ketesemane, saunia e Derek Hegsted

12–18 Iuni

Luka 22; Ioane 18

“Aua Le Faia Lo’u Loto a o Lou Finagalo”

Mafaufau po o le a se mea o le a e faia e valaaulia ai le Agaga i lau vasega a o outou talanoaina mea paia na tutupu i nei mataupu. Saili ma le agaga tatalo ni auala e fesoasoani ai i tagata o le vasega ia faaloloto lo latou alofa mo le Faaola ma lo latou faatuatua ia te Ia.

aikona o le fefaasoaai

Valaaulia le Fefaasoaai

Valaaulia ni nai tagata o le vasega e faasoa mai o latou lagona a o latou faitau i lenei vaiaso ma pe o a fuaiupu na fesoasoani ia i latou e lagona faapea.

aikona o le aoao atu

Aoao Atu le Aoaoga Faavae

Luka 22:39–46

Tatou te avea atili e pei o Keriso pe a tatou filifili e ua’i atu o tatou loto i le finagalo o le Tama.

• O le faataitaiga a le Faaola o le ua’i atu i le finagalo o le Tama e mafai ona fesoasoani i tagata o lau vasega pe a manaomia ona latou faia lea lava mea e tasi. Ina ia amata se talanoaga, e mafai ona e valaaulia tagata taitasi o le vasega e faasoa mai se taimi na ua’i atu ai i latou lava i se mea sa latou iloa na finagalo le Atua latou te faia. Fai atu ia i latou e faasoa mai pe na faapefea ona latou iloa le mea na finagalo le Atua latou te faia ma pe na faapefea ona faamanuiaina i latou i le gauai atu i Lona finagalo. Valaaulia le vasega e faitau le Mataio 22:39–46 ma talanoa pe aisea na naunau ai le Faaola e uai atu Lona loto i le finagalo o Lona Tama. E mafai faapefea ona tatou mulimuli i le faataitaiga a le Faaola?

• E faaopoopo atu i le faatinoga a le Faaola o le gauai atu i le Atua i le Luka 22:42, o a isi faataitaiga o Lona gauai atu tatou te maua i le Luka 22 ma le Ioane 18? Na faapefea ona gauai atu le Faaola i le finagalo o Lona Tama i Lona soifuaga atoa? O le a se mea e mafai ona tatou faia ia avea atili ai e pei o Ia? O le saunoaga mai ia Elder Neal A. Maxwell i le “Punaoa Faaopoopo” e mafai ona fesoasoani e musuia ai tagata o le vasega e mafaufau pe mafai faapefea ona gauai atu o latou loto i le finagalo o le Atua.

Luka 22:39–46

Na faatino e Iesu Keriso se Togiola e le i’u mo i tatou.

• O leLuka 22:39–46 o loo faamatala mai ai le mea na tupu i Ketesemane. Ina ia fesoasoani i tagata o le vasega ia malamalama i le taua patino o lenei mea paia na tupu, atonu e mafai ona e tusia i luga o le laupapa fesili e pei o le O le a le mea na tupu i Ketesemane? ma le Aisea e taua ai ia te au? E mafai e tagata o le vasega ona maua tali i le Luka 22:39–46; Alema 7:11–13; Mataupu Faavae ma Feagaiga 19:16–19; ma le vitio “The Savior Suffers in Gethsemane” (ChurchofJesusChrist.org). E mafai foi ona latou maua tali i le savali a Peresitene Tad R. Callister “O Le Togiola a Iesu Keriso” (Liahona, Me 2019, 85–87).

• I le Tusi a Mamona, ua faaigoa e Iakopo le Togiola a Iesu Keriso “o se togiola aoao lē gata” (2 Nifae 9:7). Ina ia fesoasoani i le vasega ia malamalama i le uiga o lenei mea, e mafai ona e faasoa atu ia aoaoga a Peresitene Russell M. Nelson i le “Punaoa Faaopoopo” ma fai i le vasega e lisi mai auala e mafai ai ona manatu i le tosinaga o le taulaga a le Faaola e aoao ma lē gata. E mafai foi ona latou faitauina mau nei ma faaopoopo i la latou lisi: Eperu 10:10; Alema 34:10–14; Mataupu Faavae ma Feagaiga 76:24; ma le Mose 1:33. E mafai faapefea ona tatou faaalia lo tatou loto faafetai mo mea uma na faia e le Faaola mo i tatou?

Ua tilotilo ese Peteru mai ia Keriso

O le Faafiti a Peteru, saunia e Carl Heinrich Bloch

Luka 22:54–62

E mafai ona tatou faamaoni ia Iesu Keriso e ui i o tatou popolega ma vaivaiga.

• Ina ia fesoasoani i tagata o le vasega e vaai faalemafaufau i mea na tutupu i le Luka 22:54–62, e mafai ona e faaali atu se ata, e pei o le Faafiti a Peteru (ChurchofJesusChrist.org), po o le vitio “Jesus Is Tried by Caiaphas, Peter Denies Knowing Him” (ChurchofJesusChrist.org.). E mafai e tagata o le vasega ona faasoa mai mea na latou aoaoina mai aafiaga o Peteru e musuia ai i latou ia faamaoni ia Iesu Keriso.

aikona o punaoa

Punaoa Faaopoopo

Ua’i atu o o tatou loto i le Tama.

Na aoao mai Elder Neal A. Maxwell: “Ao ua’i atu o outou loto i le Atua, ua outou tuuina atu ia te Ia le mea e tasi e mafai moni ona e tuuina atu ia te Ia aua o lau lava. Aua e te faatalitali umi e sue le fatafaitaulaga pe amata ona tuu le meaalofa o o outou loto i luga!” (“Ia Outou Manatua le Finagalo Alofa o le Alii,” Liahona, Me 2004, 46).

O le Togiola e le i’u.

Na aoao mai Peresitene Russell M. Nelson:

“O le Togiola [a Iesu Keriso] e le faatuaoia—e leai sona iuga. E le faatuaoia foi ina ia mafai ona faaolaina tagata ola uma mai le oti e le uma. E le i’u pe a fuafua i Lona puapuagatia tele. Sa le’i i’u i le taimi, ua faamuta ai ia uluai faiga o taulaga sa osi i manu. Sa le’i i’u i se tulaga—na faia i le taimi e tasi mo tagata uma. Ma sa faalautele atu le alofa mutimutivale o le Togiola e le gata i tagata e le mafaitaulia, ae faapena foi i le tele o lalolagi e le mafaitaulia na foafoaina e Ia. E le faatuaoia i le tulaga e le oo i ai se fua faatatau po o se malamalama o le tagata soifua.

“E na o Iesu lava e mafai ona ofoina atu lea ituaiga togiola le faatuaoia talu ona soifua mai o Ia i se tina faitino, ma se Tama tino ola pea. Talu ai lena tofi tulaga ese, o Iesu o se Tagata e le faatuaoia” (“O le Togiola,” Ensign, Nov. 1996, 35).

Faaleleia o Lo Tatou Aoao Atu

Avea o se meafaigaluega lotomaualalo o le Agaga. “O lou faamoemoega o se faiaoga e le o le tuuina atu o se lesona manaia ae ia fesoasoani i isi ia maua aafiaga o le Agaga Paia, o ia o le faiaoga moni” (Aoao Atu i le Ala a le Faaola,10).