Tausamaaga Mulimuli

E Fai ma Faamanatuga ia te Au,, saunia e Walter Rane

29 Me–4 Iuni.

Mataio 26; Mareko 14; Ioane 13

“E Fai ma Faamanatuga”

Faitau le Mataio 26; Mareko 14; ma le Ioane 13, ma mafaufau loloto i manatu ma lagona uunai e oo mai i lou mafaufau. O a ni savali o le a manuia ai tagata o lau vasega?

aikona o le fefaasoaai

Valaaulia le Fefaasoaai

Valaaulia tagata o le vasega e faasoa mai se mea sa latou aoaoina i lenei vaiaso sa fesoasoani latou te iloa ai se aoga sili atu o le faamanatuga. O le a se mea sa latou faia ma pe faapefea foi ona aafia ai lo latou aafiaga i le aai ma feinu i le faamanatuga?

aikona o le aoao atu

Aoao Atu le Aoaoga Faavae

Mataio 26:20–22

E tatau ona tatou suesue ifo i o tatou lava olaga e iloa ai pe o faapefea ona faatatau afioga a le Alii ia i tatou.

• Ua tatou faalogo i le tele o lesona o le talalelei i o tatou olaga, ae o nisi taimi e taufaaosooso mai lava lo tatou faapea o na lesona e tele ina faatatau i isi tagata. E mafai ona fesoasoani se talanoaga e uiga i le Mataio 26: 20–22 ia i tatou e faatoilaloina ai lea manatu. O a lesona e mafai ona tatou aoao mai i le ala na faatatau ai e soo upu a le Faaola ia i latou lava? Afai e i ai ni tagata o le vasega e faitauina le saunoaga a Peresitene Dieter F. Uchtdorf i lenei tala i lana savali “Le Alii e, O Au Ea?,” e mafai ona latou faasoa mai ni malamalamaaga na latou maua (Liahona, Nov. 2014, 56–59).

Mataio 26:26–29

O le faamanatuga o se avanoa lea e manatua ai le Faaola.

• E faapefea ona faamatala e tagata o le vasega le sauniga paia o le faamanatuga i se tasi e le masani ai? Atonu e mafai ona outou fatuina faatasi se lisi o fesili e ono i ai i se tasi e uiga i le faamanatuga, e pei o le “Aisea na tuuina mai ai e le Faaola ia i tatou le faamanatuga? Aisea ua avea ai le areto ma le vai ma faatusa mamana o Iesu Keriso? O le a le mea tatou te folafola atu ao tatou tagofia le faamanatuga? O a folafolaga tatou te maua?” E mafai e tagata o le vasega ona vaavaai mo tali i punaoa nei: Mataio 26:26–29; Mataupu Faavae ma Feagaiga 20:75–79; ma Autu o le Talalelei, “Faamanatuga” (topics.ChurchofJesusChrist.org). E mafai foi ona e faasoa atu manatu mai ia Elder D. Todd Christofferson i le “Punaoa Faaopoopo.”

  tamaitai o loo tagofia le faamanatuga

  O le faamanatuga e fesoasoani tatou te manatua ai Iesu Keriso.

• E mafai ona faamanuiaina tagata o le vasega mai le faalogologo atu i manatu o isi e uiga i le ala e manatua ai le Faaola i le taimi o le faamanatuga ma le vaiaso atoa (tagai Luka 22:19–20; Mataupu Faavae ma Feagaiga 6:36–37). Atonu e mafai ona e valaaulia i latou e faasoa mai mea e fesoasoani ia i latou ma o latou aiga e manatua ai le Faaola ma tausia a latou feagaiga. E mafai foi ona latou faasoa mai mea latou te faia e avea ai le faamanatuga o se aafiaga paia.

Ioane 13:1–17

O le Faaola o lo tatou faataitaiga o le auauna atu i isi ma le lotomaualalo.

• Ina ia fesoasoani i tagata o lau vasega e manatunatu loloto i le maoae o le mulumuluina e Iesu o vae o Ona soo, e mafai ona e valaaulia se tasi o le vasega na te faatinoina le matafaioi a Peteru ma faatalanoaina e le isi vaega uma o le vasega. E mafai e tagata o le vasega ona suesue le Ioane 13:1–17 ma mafaufau i fesili anoa e mafai ona latou fai atu ia Peteru e aoao ai e uiga i lona aafiaga. O le a se mea ua tatou aoao mai lenei tala e ono aafia ai le ala tatou te auauna atu ai i isi?

Ioane 13:34–35

O lo tatou alolofa mo isi o se faailoga lea o i tatou o soo moni o Iesu Keriso.

• E faapefea ona e ono uunaia tagata o le vasega ina ia alolofa atili? Atonu e mafai ona e fesili atu ia i latou po o a uiga latou te maitauina pe a latou feiloai i se tasi o se soo o Keriso. E mafai ona e valaaulia i latou e sailiili i le Ioane 13:34--35 e aoao ai pe mafai faapefea ona iloa ia soo moni o le Faaola? O le a se mea e mafai ona tatou faia e avea ai le alofa ma uiga iloga o lo tatou avea ai ma soo? Atonu e mafai ona e talanoaina pe faapefea e le alofa atu i isi ona avea o se auala e molimau atu ai ia Iesu Keriso. E mafai faapefea ona tatou faia lenei mea i o tatou aiga, i luga o ala o faasalalauga faaagafesootai, ma i isi nofoaga?

• I le avea ai o se vasega, ua tele mea ua outou aoaoina e uiga i le soifuaga o le Faaola i lenei tausaga, e aofia ai le tele o faataitaiga o auala sa Ia faaalia ai Lona alofa mo isi. O se tasi auala e fesoasoani ai i le vasega e manatunatu loloto i le poloaiga o loo i le Ioane 13:34 o le tusia lea o le Pei Na Ou Alofa ia te Oe i luga o le laupapa ona fai lea i le vasega e lisi mai ni faataitaiga latou te manatua mai le Feagaiga Fou e faapupula mai ai le alofa o Iesu. Ona e tusia lea o le Ia Fealofani i luga o le laupapa ma fai i le vasega e lisi mai ni auala e mafai ona tatou mulimuli ai i Lana faataitaiga o le alofa. Atonu e maua e tagata o le vasega ni manatu i se tasi o vitio o loo lisiina i le “Punaoa Faaopoopo.”

aikona o punaoa

Punaoa Faaopoopo

“Teuloto uiga auaumama ma uiga o Keriso.”

Na aoao mai Elder D. Todd Christofferson, “I le aai ai faafaatusa i le tino [o le Faaola] ma inu i Lona toto [o lona uiga] ia teuloto uiga auaumama ma uiga o Keriso, tuu ese le tagata natura ma avea ma Au Paia ‘e ala i le togiola a Keriso le Alii’ [Mosaea 3:19]. A o tatou aai ma feinu i le falaoa ma le vai o le faamanatuga i vaiaso taitasi, o le a lelei ona tatou mafaufau pe faapefea ona tatou faaaofia uma ma le atoatoa Lona uiga ma le mamanu o Lona soifua o le aunoa ma se agasala i o tatou olaga ma tagata” (“O Le Areto Ola na Alu Ifo Mai le Lagi,” Liahona, Nov. 2017, 37).

Vitio e uiga i le alofa i le ChurchofJesusChrist.org.

• “Love One Another”

• “Families Sacrifice, Give, and Love”

• “Preparation of Thomas S. Monson: He Learned Compassion in His Youth”

Faaleleia o Lo Tatou Aoao Atu

Vaai e ala atu i fofoga o le Atua. Taumafai e vaai atu i tagata o lau vasega e faapei ona silasila i ai le Atua, ma o le a faaali atu e le Agaga ia te oe o latou taua ma gafatia paia. A e faia le mea lea, o le a taiala oe i au taumafaiga e fesoasoani ia i latou (tagai Aoao Atu i le Ala a le Faaola,6).