Afio Mai Faalua

O le Afio Mai Faalua, saunia e Harry Anderson

22–28 Me

Iosefa Samita—Mataio 1; Mataio 24–25; Mareko 12–13; Luka 21

“O Le a Sau le Atalii o le Tagata”

Manatua e amata lau tapenapenaga e aoao atu i le faitauina ma le agaga tatalo le Iosefa Samita—Mataio 1; Mataio 24–25; Mareko 12–13ma le Luka 21. Saili e oe lava ia musumusuga, ona iloilo ai lea o lenei otootoga mo ni manatu faaopoopo.

aikona o le fefaasoaai

Valaaulia le Fefaasoaai

Fai se lisi i le laupapa o faataoto a le Faaola o loo maua i le faitauga o lenei vaiaso, e pei o le laau o le mati, o le tagata lelei ma le gaoi, o auauna faamaoni ma auauna leaga, o taupou e toasefulu, o taleni, ma le mamoe ma ‘oti. Fai i tagata e faasoa mai upumoni sa latou aoaoina mai nei faataoto e mafai ona fesoasoani e saunia ai i latou mo le Afio Mai Faalua o le Alii. O a mea o latou faia e faaaoga ai nei upumoni i o latou olaga?

aikona o le aoao atu

Aoao Atu le Aoaoga Faavae

Iosefa Samita—Mataio 1:21–37

O valoaga e uiga i le Afio Mai Faalua o le Faaola e mafai ona fesoasoani ia i tatou ia feagai ai ma le lumanai i le faatuatua.

• O faailoga o le Afio Mai Faalua o le Faaola e ono faigata mo nisi o tagata o le vasega ona malamalama i ai. E ono fesoasoani ia i latou le galulue i vaega ma faailoa mai faailoga latou te maua i le Iosefa Samita—Mataio1:21–37. E ono fesoasoani foi latou te malamalama atili ai i le taua o nei faailoga pe a latou faatusatusaina i faailoga o le aualatele. Aisea e taua ai faailoga o le aualatele? E faapefea ona pei faailoga o le Afio Mai Faalua o faailoga o le auala? E faapefea ona eseese? E mafai foi ona e avatu i vaega taitasi ni fasipepa ua faafoliga i faailoga o le aualatele ma valaaulia i latou e tusi i luga o pepa taitasi se faailoga o le a muamua mai le Afio Mai Faalua. Tuu atu latou te faasoa mai mea sa latou maua, ma valaaulia le vasega e talanoaina faamaoniga o nei faailoga i le lalolagi i aso nei.

Iosefa Samita—Mataio 1:26–27, 38–55; Mataio 25:1–13

E tatau ona tatou saunia e le aunoa mo le Afio Mai Faalua o le Faaola.

• O faataoto i le Iosefa Samita—Mataio 1:26–27, 38–55 ma le Mataio 25:1–13 e mafai ona fesoasoani i tagata o le vasega ia iloa le taua o le saunia mo le Afio Mai Faalua. Valaaulia tagata o le vasega e suesue i nei fuaiupu ma faasoa mai mea latou te lagona o loo valaaulia i tatou e le Faaola e fai. Na tuu mai e Elder David A. Bednar se tasi o faaliliuga o le faataoto o taupou e toasefulu e ono fesoasoani (tagai “Punaoa Faaopoopo”). Aisea e tatau ai ona aafia i tatou taitoatasi i le liuaina mo i tatou lava? E faapefea ona tatou faia lea mea? O le a le mea ua faaopoopo e le Mataupu Faavae ma Feagaiga 45:56–67 i lo tatou malamalama i nei faataoto?

• A o e aoao e uiga i le toe afio mai o le Faaola, e mafai ona outou faitauina pe usu faatasi viiga e uiga i le Afio Mai Faalua (tagai “Iesu Keriso—Afio Mai Faalua” i le faasino autu i tua o le tusipese).

Mataio 25:14–46

I le Faamasinoga Faaiu, o le a tatou tuu atu ai i le Alii se tala o o tatou olaga.

• O le faataoto i taleni ma le faataoto i mamoe ma ‘oti e mafai ona musuia ai i tatou e mafaufau e uiga i le tala o o tatou olaga o le a tatou avatu i le Alii i le Faamasinoga Mulimuli. E mafai ona outou faitauina faatasi ia faaaoto ma valaaulia tagata taitoatasi o le vasega e faasoa mai se fesili se tasi e ono fesili atu ai le Faaola pe a tatou tuu atua se tala o o tatou olaga pe a faamasinoina i tatou. Tuu atu se taimi mo tagata o le vasega e fuafua ai mea o le a latou faatinoina i uunaiga latou te maua i le taimi o le talanoaga.

  mamoe ma ‘oti

  Sa faaaoga e Keriso mamoe ma ‘oti e aoao atu ai e uiga i le Faamasinoga Mulimuli (tagai Mataio 25:31–33).

• Ina ia musuia se talanoaga e uiga i le Mataio 25:34–40, e mafai ona e valaaulia tagata o le vasega e faasoa mai ni faataitaiga o tagata o faata’ita’i maia le lotoalofa o loo faamatala mai i nei fuaiupu. Tuu atu ia i latou se taimi e manatunatu loloto ai pe o ai o ono manaomia la latou auaunaga. O a ni nai auala faatino e mafai ona tatou fafagaina ai e fia aai, faaoofu i e ua le lavalava, ma asiasi atu i e mama’i?

aikona o punaoa

Punaoa Faaopoopo

O le suauu o le liua.

Na fautua mai e Elder David A. Bednar lenei faaliliuga o le faataoto o taupou e toasefulu:

“Mafaufau i le suauu o le suauu o le liua [tagai Mataio 25:4–9]. …

“Pe na manatu faapito ea taupou popoto ma lē mananao e faasoa atu, pe na latou ta’u sa’o atua e le mafai ona nonoina le suauu o le liuaina? Pe mafai ea ona e tuuina atu i se isi tagata le malosiaga faaleagaga lea e te maua mai i le usiusitai e le aunoa i poloaiga? Pe mafai ona pasi atu i se tasi o manaomia, le malamalama e maua mai i le suesue o tusitusiga paia ma le maelega ma le mafaufau loloto? Pe mafai ona sii atu i se tagata o loo feagai ma mafatiaga po o se luitau tele, le filemu e aumaia e le talalelei i se tagata faamaoni o le Au Paia o Aso e Gata Ai? O le tali manino lava i nei fesili o le leai.

“E pei ona faamamafa lelei mai e taupou popoto, e tatau ia i tatou taitoatasi ona ‘faatauina mo i tatou lava.’ Sa le’i faamatalaina e nei tamaitai musuia se faiga faapisinisi; ae, sa latou faamamafaina lo tatou tiutetauave faaletagata lava ia, e faamumu pea a tatou lamepa o molimau ma ia lava se sapalai o le suauu o le liuaina. O lenei suauu taua e maua mai le tasi le mataua i le taimi—‛o lea fuaiupu ma lea fuaiupu [ma] lea mataupu i lea mataupu’ (2 Nifae 28:30), ma le onosai ma le faapalepale” (“Faaliliuina i le Alii,” Liahona, Nov. 2012, 109).

Faaleleia o Lo Tatou Aoao Atu

Ia mautinoa o e aoao atu aoaoga faavae moni. “Faaauau ona e fesili ia te oe lava, ‘E faapefea e mea o loo ou aoaoina ona fesoasoani i tagata o lau vasega e fausia le faatuatua ia Keriso, salamo, osia ma tausia feagaiga ma le Atua, ma maua le Agaga Paia?’” (Aoao Atu i le Ala a le Faaola,20).