aufaigaluega i se tovine

8–14 Me

Mataio 19–20; Mareko 10; Luka 18

‘Se A se Mea O Toe Ou Te Lei Faia?

A o e sauni e aoao atu, mafaufau ma le agaga tatalo pe mafai faapefea ona e fesoasoani i tagata o le vasega e faasoa mai mea sa latou aoaoina pe lagonaina i le taimi o a latou lava suesuega.

aikona o le fefaasoaai

Valaaulia le Fefaasoaai

E ono fesoasoani le talanoaina i nisi taimi o aafiaga aoao o tagata o le vasega i le aoaoina o le talalelei e faaogatotonu i le aiga. O a aafiaga manuia e mafai ona latou faasoa mai? O a faalavefau po o luitau o latou feagai? O a fautuaga e mafai ona latou tuu atu e le tasi i le isi?

aikona o le aoao atu

Aoao Atu le Aoaoga Faavae

Mataio 19:3–9

O le faaipoipoga i le va o le alii ma le tamaitai e taua i le fuafuaga e faavavau a le Atua.

• Ua faateleina, le tatai ese o manatu o le lalolagi i le faaipoipoga mai upumoni e faavavau. Ina ia fesoasoani i lau vasega e aoao e uiga i le finagalo o le Atua e uiga i le faaipoipoga, e mafai ona e valaaulia i latou e faitau le Mataio 19:3–9 ma lisi i luga o le laupapa upumoni latou te maua e faatatau i le faaipoipoga. E mafai foi ona latou lisiina ni upumoni faaopoopo latou te maua i mau nei: Kenese 1:27–28; 1 Korinito 11:11; Mataupu Faavae ma Feagaiga 42:22; 49:15–17; 131:1–4; 132:19; ma le Mose 3:18, 21–24. E faapefea ona faamalosia nei upumoni i le “O Le Aiga: O Se Folafolaga i le Lalolagi”? (ChurchofJesusChrist.org).

Mataio 20:1–16

E mafai e tagata uma lava ona maua faamanuiga o le ola e faavavau, tusa lava pe o le a le taimi latou te talia ai le talalelei.

• O le a se mea e fesoasoani i tagata o lau vasega e faaaoga mataupu faavae o i le faataoto i le aufaigaluega i le tovine? E mafai ona e valaaulia ni nai tagata o le vasega e sauniuni se tala faatino o le faataoto e fai i le vasega. A uma le tala, e mafai e tagata na fai ma tagata faigaluega ona faasoa o latou lagona e uiga i le totogi sa latou maua ma le mafuaaga. O le a se mea o fautuaina mai i lenei faataoto e uiga i le malo o le lagi? O a ni malamalamaaga faaopoopo e maua e tagata o le vasega mai lenei faataoto mai le savali a Elder Jeffrey R. Holland “O Le Au Faigaluega i le Tovine”? (Liahona, Me 2012, 31–33).

Mataio 19:16–22; Mareko 10:17–27

O le a taiala e le Faaola i tatou ia latalata atu ia te Ia ao tatou ole atu mo Lana fesoasoani.

• E mafai faapefea ona e fesoasoani i tagata o le vasega e faailoa ma faaaoga mataupu faavae o i le tala i le taulealea mauoa? O se tasi faiga o le fai atu ia i latou e faitau le Mareko 10:17–27 ma mafaufau pe i ai se taimi na latou lagona ai e faapei o le taulealea mauoa. O le a se mea na fesoasoani ia i tatou e mulimuli ai i le fautuaga a le Faaola tusa lava pe sa faigata ona faia? Atonu o naunau tagata o le vasega e faasoa mai ni aafiaga na latou fesili ai “Se a se mea o toe ou te lei faia?” (Mataio 19:20) ma sa maua ai se uunaiga patino e faaleleia atili. Ina ia fesoasoani i tagata o le vasega o e atonu e lotovaivai i le taulai atu i mea latou te le o faia, e mafai ona e faasoa atu le faamatalaga i le “Punaoa Faaopoopo.”

• Atonu na faitau e tagata o le vasega se savali o le konafesi e faatatau i nei fuaiupu e pei ona fautuaina mai i le Sau, Mulimuli Mai ia te Au—Mo Tagata Taitoatasi ma Aiga. Valaaulia i latou e faasoa mai ni malamalamaaga na latou aoaoina.

alii lotomaualalo ma le Faresaio

O Le Telona ua Salamo ma le Faresaio Faafia-Amiotonu i le Malumalu, saunia e Frank Adams

Luka 18:9–14

E tatau ona tatou faalagolago i le alofa mutimutivale o le Atua, ae le o la tatou lava amiotonu.

• O le faataoto a le Faaola na faatusatusa ai le tatalo a le Faresaio ma le tatalo a le telona, e mafai ona fesoasoani ia te oe e faamamafaina ai le uiga faaalia e finagalo ai le Alii mai ia i latou o e saili e mulimuli ia te Ia. Ina ia fesoasoani i tagata o le vasega e faatatau lenei faataoto i o tatou aso, e mafai ona e valaaulia i latou e toetusi le tatalo a le Faresaio i se auala e faaaoga ai auiliiliga o aso nei ae faaalia ai uiga lava e tasi. E mafai ona latou faia le mea lava lenei i le tatalo a le telona ona fefaasoaai lea o mea sa latou tusia. E faapefea ona fesootai fuaiupu 15–17 ma le 18–24 i mea na aoao mai e le Faaola i lenei faataoto? E mafai foi ona e faasoa atu le faamatalaga lenei e faatatau i nei fuaiupu mai ia Elder Dale G. Renlund: “Ua manino le savali mo i tatou: o se tagata agasala ua salamo e latalata atili atu i le Atua nai lo le tagata faafia-amiotonu o le e tausalaina lena tagata agasala” (“O Lo Tatou Leoleo Mamoe Lelei,” Liahona, Me 2017, 31).

aikona o punaoa

Punaoa Faaopoopo

Aua nei o tatou lotomalie pe lotovaivai.

Na aoao mai Elder D. Todd Christofferson:

Afai tatou te fesili ma le lotofaamaoni, “Se a se mea o toe ou te lei faia? O le a le tuua i tatou e le [Atua] e taumatemate, ae i le alofa o le a Ia tali mai ai mo lo tatou fiafia. Ma o le a Ia tuu mai ia i tatou le faamoemoe.

“O se taumafaiga faifaipea, ma o le a matuai taufaafefe lava pe afai o lo tatou tauiviga mo le paia sa faia na o i tatou. O le mea moni fiafia e le o tuua lava na o i tatou. Ua ia i tatou le alofa o le Atua, o le alofa tunoa o Keriso, le mafanafana ma le taitaiga a le Agaga Paia, ma le faaaumea ma le faamalosiauga a le Au Paia i le tino o Keriso. Aua ne‘i faamalieina i tatou i le mea o tatou i ai, ae aua foi nei o tatou lotovaivai” (“O Le Areto Ola Na Alu Ifo Mai le Lagi,” Liahona, Nov. 2017, 39).

Faaleleia o Lo Tatou Aoao Atu

E manaomia e le Atua au taleni ma tomai tulaga ese. “E mafai ona e faamanuia fanau a le Atua e ala i lou aumaia o le alofa o ia te oe mo isi tagata, o meaalofa ua tuuina atu e le Atua ia te oe, ma ou aafiaga i le olaga. A o e auauna atu ma le faamaoni ma saili le fesoasoani a le Atua, o le a Ia faalauteleina oe, ma o le a e tuputupu ae i lou gafatia e aoao atu le talalelei i le ala a le Faaola” (Aoao Atu i le Ala a le Faaola,5).