“1–7 Me. Luka 12–17; Ioane 11: ‘Ia Tatou Olioli ia; aua ua Ou Maua La’u Mamoe na Leiloa,’” Sau, Mulimuli Mai ia te Au—Mo le Aoga Sa: Feagaiga Fou 2023 (2022)
“1–7 Me. Luka 12–17; Ioane 11,” Sau, Mulimuli Mai ia te Au—Mo le Aoga Sa: 2023
O Le Atalii Faamaumau Oa, saunia e Liz Lemon Swindle
1–7 Me
Luka 12–17; Ioane 11
“Ia Tatou Olioli ia; aua ua Ou Maua La’u Mamoe na Leiloa”
Amata lau tapenapenaga i le suesue ma le agaga tatalo o le Luka 12–17 ma le Ioane 11. O le a le “mamoe leiloa” i lau vasega ua e mafaufau i ai? Faaaoga le Sau, Mulimuli Mai ia te Au—Mo Tagata Taitoatasi ma Aiga ma le otootoga lenei ao e sailia le taitaiga a le Alii pe faapefea ona e taulimaina manaoga o lau vasega i le mea sili, tusa lava pe le o o mai i le vsega.
Valaaulia le Fefaasoaai
O le faaaogaina o se vaega taua o le aoaoina, o le mea lea ia valaaulia tagata o le vasega e faasoa mai pe na faapefea ona latou filifili e ola i se mea sa latou aoaoina mai tusitusiga paia i lenei vaiaso.
Aoao Atu le Aoaoga Faavae
E leai lava se ‘alofaga faapea e lava e teena ai le talalelei.
-
Ina ia fesoasoani i tagata o le vasega e suesue le faataoto i le talisuaga tele, e mafai ona e valaaulia i latou i se pati faafoliga o le a e talimalo ai. Tuu atu latou te faasoa maia ni mafuaaga latou te o mai ai pe e le o mai ai foi. Faitau faatasi le Luka 14:15–24 , ma talanoaina ia ‘alofaga na faia e tagata o i le faataoto ina ua valaaulia i latou i se tausamaaga sa faatusa i faamanuiaga o le talalelei. O a ‘alofaga o faia e tagata nei ua le talia ai valaaulia a le Faaola ia maua faamanuiaga a le Tama Faalelagi? Atonu e mafai e tagata o le vasega ona faasoa mai faamanuiaga sa latou maua ina ua latou faia osigataulaga e tatau ai ina ia ola i ni mataupu faavae patino o le talalelei.
E mafai ona tatou sailia i latou ua leiloloa ma olioli faatasi ma le Tama pe a toe foi mai.
-
E faapefea ona e tuuina atu i tagata o le vasega le avanoa e faasoa mai ai mea sa latou aoaoina e uiga i faataoto e tolu i le Luka 15? Mafaufau e tofi atu i tagata taitasi o le vasega se tasi o faataoto e toefaamanatu. E mafai ona latou vaavaai mo ma faasoa mai tali i fesili e pei o nei: O a upu i le faataoto ua faaalia ai lagona o le Tama Faalelagi e uiga ia i latou o e ua leiloloa? O a mea o fautua mai e faataoto e uiga i le auala e tatau ona tatou aapa atu ai i fanau uma a le Atua? E mafai e tagata o le vasega ona faasoa mai pe na faapefea ona maua e le Faaola i latou ina ua latou lagonaina ua leiloloa.
-
O le usuina faatasi o le “Pele i le Leoleo Mamoe” (Viiga, nu. 135, e mafai ona avea o se faaopoopoga anoa i le aoaoina atu o nei faataoto.
-
A o outou iloiloina faatasi le faataoto i le atalii faamaumau oa, e mafai ona aoga i tagata o le vasega le taulai atu i upu, faatinoga, ma talitonuga o tagata taitoatasi i le faataoto. O a mea tatou te aoao mai i tagata taitasi? Atonu e mafai ona tusia e tagata o le vasega se isi faaiuga i le faataoto lea e ese ai le uiga faaalia o le atalii matua i lona uso. O le a se mea o aoao mai ia i tatou i le fautuaga a le tamā i le faataoto, e uiga i o tatou lagona mo i latou o e leiloloa ma i latou e toe foi mai i le talalelei? (Tagai foi i le saunoaga a Elder Jeffrey R. Holland i le “Punaoa Faaopoopo.”) Pe e mafai foi ona e fai i le vasega e mafaufau faapea o i latou o le tamā i le faataoto lea. O le a se fautuaga faaopoopo latou te tuuina atu i le atalii matua e fesoasoani ia te ia ia fiafia i le agaigai i luma po o le manuia o isi?
O le loto faafetai mo o’u faamanuiaga o le a ou latalata atili ai i le Atua.
-
Valaaulia tagata o le vasega e faasoa mai mea sa latou aoaoina e uiga i le loto faafetai mai a latou suesuega o le Luka 17:11–19 ma le vitio “President Russell M. Nelson on the Healing Power of Gratitude” (ChurchofJesusChrist.org). Na faapefea ona faamanuiaina le lepela loto faafetai mo le faaalia o lona loto faafetai? E faapefea ona faamanuiaina i tatou pe a tatou faaalia le loto faafetai? E mafai e tagata o le vasega ona fautua mai ni auala e mafai ona tatou faaali atu ai lo tatou loto faafetai i le Atua ma isi.
O Iesu Keriso o le Toetu ma le Ola.
-
O se tasi auala e suesue ai le Ioane 11:1–46 o le fai lea i le vasega e feauauai e faitau ia fuaiupu ma valaaulia i latou e taofi pe a latou maua faamaoniga o le faatuatua ia Iesu Keriso. E mafai foi ona e fai i tagata o le vasega e mafaufau i manatu o tagata na aofia ai—e aofia ai le Faaola, o Aposetolo, Mareta, Maria, ma Lasalo. O le a se mea e mafai ona tatou aoaoina mai ia i latou taitoatasi? Atonu e mafai e tagata o le vasega ona faasoa mai ni aafiaga ina ua faamalosia lo latou faatuatua ia Iesu Keriso i le taimi o se tofotofoga.
Punaoa Faaopoopo
Aoao mai i le isi faamaumauoa.
Sa faia e Elder Jeffrey R. Holland lenei maitauga e uiga i le uso matua o le atalii faamaumau oa: “O lenei atalii e le o ita tele ua sau le isi i le fale ae ita o ia ona ua fiafia tele ona matua i ai. … E lei oo ia te ia le agaalofa ma le alofa mutimutivale, o le lautele o le alofa moni o se vaaiga mamao, e iloa ai o lenei toe foi mai e le o se faasagatau mai. O lona uso. A o augani atu lona tama ia te ia e vaai, o lē sa oti a ua toe ola mai. O lē sa leiloa a ua maua” (“O Le Isi Atalii Faamaumau Oa,” Liahona, Iulai 2002, 63).
Faaleleia o Lo Tatou Aoao Atu
Aapa atu i le tasi. E faapei o le leoleo mamoe i le faataoto a le Faaola (tagai Luka 15:4), “e mafai ona e aapa atu ia i latou o e ua misi mai lau vasega. O ou avanoa e aoao ma siitia tagata o le vasega ma fesoasoani ia i latou e o mai ia Keriso e faalautele atu i fafo atu o le potu aoga ma talaatu o i latou o e auai i au lesona masani” (Aoao Atu i le Ala a le Faaola,8).