Keriso i luma o Pilato

Ecce Homo, saunia e Antonio Ciseri

19–25 Iuni.

Mataio 27; Mareko 15; Luka 23; Ioane 19

“Ua Mae’a”

Amata lau tapenapenaga e aoao atu i le faitauina ma le agaga tatalo o le Mataio 27; Mareko 15; Luka 23; ma le Ioane 19. Saili ia ola agavaa mo le Agaga ina ia mafai ona e tuuina atu se molimau mamana e uiga i le Faaola ma Lana Togiola.

aikona o le fefaasoaai

Valaaulia le Fefaasoaai

Valaaulia tagata taitasi o le vasega e filifili se mataupu mai le faitauga o le vaiaso lenei ma faaalu ni nai minute e autilo faatopetope i ai, ma vaavaai mo se upu, se fasifuaitau, po o se faamatalaga o aoao ai i latou i se mea anoa e uiga i le Faaola ma Lana misiona. Tuu atu ia i latou ni avanoa e faasoa mai ai ni mea sa latou maua ma faamatala mai pe aisea e anoa ai ia i latou.

aikona o le aoao atu

Aoao Atu le Aoaoga Faavae

Mataio 27; Mareko 15; Luka 23; Ioane 19

O le naunautai o Iesu Keriso e mafatia ua faaalia ai Lona alofa mo le Tama ma mo i tatou uma lava.

• Ina ia fesoasoani i le vasega ia malamalama pe faapefea i tala i puapuaga ma le maliu o le Faaola i luga o le satauro ona faapupula mai ai Lona alofa, taumafai se gaoioiga faapea: Avatu i tagata taitasi o le vasega se fatu pepa, ma valaaulia i latou e tusi i luga o a latou fatu se fasifuaitau mai le 1 Korinito 13:4–7 e faamatala ai le alofa mama. Ona fai lea i ai e saili i le Mataio 27; Mareko 15; Luka 23; po o le Ioane 19 ma tusi i le isi itu o a latou fatu ni nai fuaiupu lea e faaalia ai le faatinoga e le Faaola o le alofa lea e faamatalaina i fasifuaitau na latou filifilia. Tuu atu ia i latou e faasoa mai mea ua latou maua. O a ni aafiaga ua fesoasoani ia i tatou e malamalama ai i le alofa o le Faaola?

  pale tuitui

  Na “taataai [e fitafita] ia laau tuitui ua fai a’i le pale, ua faapaleina ai o ia” (Mareko 15:17)

• O ata e mafai ona vaai faalemafaufau ai tagata i nisi o mea na tutupu sa latou faitau i ai i lenei vaiaso. Atonu e mafai ona e vaevaeina le vasega i ni vaega ma atofa atu se ata i vaega taitasi (tagai “Punaoa Faaopoopo” mo ata fautuaina). E mafai e tagata o le vasega ona faitau ia fuaiupu o loo faamatala mai ai mea o loo faaalia i la latou ata. Ona mafai lea ona latou faasoa mai o latou manatu ma lagona e uiga i nei mea na tutupu—e aofia ai le ala e fesoasoani ai le ata ia i latou e malamalama atili ai i le Togiola a le Faaola. E mafai foi ona e mafaufau e faaali ia vitio “Jesus Is Condemned before Pilate” ma le “Jesus Is Scourged and Crucified” (ChurchofJesusChrist.org). Fautuaina tagata o le vasega e molimau atu i le Faaola ma Lana Togiola.

Mataio 27:11–60

Sa muai vaai ia perofeta anamua i mafatiaga ma le Faasatauroga o le Faaola.

• Na valoia e perofeta anamua le tele o mea e tutupu i toe itula o le Faaola. O se tasi auala e fesoasoani ai i tagata o le vasega e vaai i lenei mea o le avatu lea i tagata taitasi o se mau se tasi pe sili atu foi o i le “Punaoa Faaopoopo” ma fai i ai e sue ni fuaiupu i le Mataio 27 o loo faaali mai ai pe na faapefea ona faataunuuina mau. E mafai ona e faia se siata e fetaui ma valoaga ma o latou faataunuuga. E faapefea e nei valoaga ona faamalolosia lo tatou faatuatua ia Iesu Keriso?

Mataio 27:27–49; Mareko 15:16–32; Luka 23:11, 35–39; Ioane 19:1–5

E le mafai e mea faafeagai ona taofi le galuega a le Atua.

• Ina ia fesoasoani i tagata o le vasega ia feagai ma le faamaoni ma mea faafeagai a o latou ola faamaoni i lo latou faatuatua, e mafai ona e valaaulia i latou e faitau fuaiupu e faamatala ai sauaga na feagai ma le Faaola (tagai Mataio 27:27–49; Mareko 15:16–32; Luka 23:11, 35–39; Ioane 19:1–5). O le a se mea o mafai ona tatou aoao mai tali a le Faaola e mafai ona fesoasoani tatou te faafetaia’ia ai mea faafeagai? O a nisi faataitaiga o le feagai ma mea faafeagai e mafai ona fesoasoani ia i tatou? (Tagai, mo se faataitaiga, Iosefa Samita—Talafaasolopito 1:24–25.)

Luka 23:34–43

Ua ofo mai e le Faaola mo i tatou le faamoemoe ma le faamagaloga.

• E oo lava i Ona toe taimi, sa faaauau pea e le Faaola ona ofo atu le faamoemoe ma le faamagaloga. Mafaufau i ni auala e musuia ai tagata o le vasega e mulimuli i Lana faataitaiga. Mo se faataitaiga, e mafai ona e fai i le afa o le vasega e faitau le Luka 23:34–38 (e aofia ai le fuaiupu 34, vaefaamatalagai, lea o loo i ai malamalamaaga mai le Faaliliuga a Iosefa Samita) ma le isi vaega e faitau le Luka 23:39–43. E mafai e tagata o le vasega ona faasoa mai mea na latou aoaoina e uiga i le Faaola mai a latou fuaiupu atofaina. E mafai faapefea ona tatou mulimuli i le faataitaiga a le Faaola?

aikona o punaoa

Punaoa Faaopoopo

Ata o sauaga, mafatiaga, ma le maliu o Iesu.

• O Pilato o loo Fafano Ona Lima (ChurchofJesusChrist.org; Mataio 27:11–25)

• O Keriso ma se Pale Tuitui (ChurchofJesusChrist.org; Mataio 27:26–31)

• O Iesu Keriso o loo Amo Lona Satauro (ChurchofJesusChrist.org; Ioane 19:13–18)

• O Le Faasatauroga (ChurchofJesusChrist.org ma le Tusi Ata o le Talalelei, nu. 57; Luka 23:33–46; Ioane 19:23–37)

• Falelauasiga o Iesu (ChurchofJesusChrist.org ma le Tusi Ata o le Talalelei, nu. 58; Ioane 19:38–42)

O mau o loo valoia ai faamasinoga ma le maliu o Iesu Keriso.

• Isaia 53:5, 7

• 1 Nifae 19:9

• Isaia 50:6

• Salamo 69:21

• Salamo 22:16

• 1 Nifae 19:10

• Salamo 22:18

• Isaia 53:12

• Salamo 22:7–8

• Salamo 22:1

• Isaia 53:9

Faaleleia o Lo Tatou Aoao Atu

Saili le malosi mai le Faaola. “I au taumafaiga e ola ma aoao atili e pei o le Faaola, o le a i ai lava taimi e te toilalo ai. Aua le lotovaivai; ae, tuu atu ia avea ou sese ma vaivaiga e liliu atu ai oe i le Tama Faalelagi ma le Faaola” (Aoao Atu i le Ala a le Faaola,14).