O Iesu o loo fetalai atu ia Peteru i tafatafa o le matafaga

Fafaga Au Mamoe, saunia e Kamille Corry

26 Iuni–2 Iulai

Mataio 28; Mareko 16; Luka 24; Ioane 20–21

“Ua Toetu o Ia”

A o lei vailiilia manatu faafaiaoga i lenei otootoga, faitau le Mataio 28; Mareko 16; Luka 24; ma le Ioane 20–21, ma manatunatu loloto pe faapefea ona faaaoga nei mataupu e faamalolosia ai le faatuatua o i latou e te faiaoga ai.

aikona o le fefaasoaai

Valaaulia le Fefaasoaai

Ina ia fesoasoani i le vasega e faasoa mai mea sa latou aoaoina ia latou lava suesuega patino ma suesuega faaleaiga, fai i ai e tusi i lalo se upumoni mai le faitauga o lenei vaiaso latou te manatu e tatau ona faasoa atu i le “lalolagi uma” (tagai Mareko 16:15). I le faaiuga o le vasega, fesili ia i latou pe na latou maua nisi upumoni faaopoopo latou te mananao e faasoa mai.

aikona o le aoao atu

Aoao Atu le Aoaoga Faavae

Mataio 28; Mareko 16; Luka 24; Ioane 20

Ona sa toetu Iesu, o le a toetutu foi i tatou.

• E mafai ona e tuuina atu i tagata o le vasega ni nai minute e toefaamanatu ai le faitauga atofaina o lenei vaiaso ma le “Toetu” i le Bible Dictionary ma tusi i lalo upumoni sa latou aoaoina e uiga i le Toetu. Tuu atu latou te faasoa mai mea sa latou tusia, ma fautuaina tagata o le vasega e sii mai o latou lima pe a faalogo o faasoa mai e se tasi se upumoni e tutusa ma mea sa latou tusia. Aisea e taua ai nei upumoni ia i tatou? E faapefea ona latou faatosinaina a tatou sootaga? E faapefea ona latou faatosinaina a tatou filifiliga?

Luka 24:13–35

E mafai ona tatou valaaulia le Faaola e “mau ma i tatou.”

• Ina ia fesoasoani i tagata o le vasega e vaai i sootaga i le va o o latou aafiaga ma le aafiaga o soo i le auala i Emau, tusi se auala i luga o le laupapa, ma valaaulia le vasega e tusi ia faamatalaga o le tala i le Luka 24:13–35 i le tasi itu o le auala. Ona, tusi lea i le isi itu o le auala, o mea e ogatusa ma o latou lava aafiaga o e mulimuli ia Iesu Keriso. Mo se faataitaiga, e mafai ona latou tusia Ua punitia o la’ua mata (Luka 24:16) i le isi itu o le auala ma le O nisi taimi tatou te le iloa ai tosinaga a le Alii i o tatou olaga i le isi itu. E mafai faapefea ona tatou valaaulia le Faaola e “mau faatasi ma i tatou.”

Ua faaali atu le Keriso Toetu i le Au Aposetolo

Na aoao e Iesu ia Toma, “aua le masalo vale, ae ia talitonu“ (Ioane 20:27).

Ioane 20:19–29

“Amuia i latou e lei vaai, ae talitonu mai pea.”

• E mafai ona avea lau vasega o le Aoga Sa o se nofoaga e faamalolosia ai e tagata o le vasega le faatuatua o le tasi ma le isi i mea e le o mafai ona latou vaai i ai. Atonu e mafai ona e amata i le fai atu i se tasi e aotele mai le aafiaga o Toma i le Ioane 20:19–28. E mafai foi ona e faaalia le vitio “Blessed Are They That Have Not Seen, and Yet Have Believed” (ChurchofJesusChrist.org). E mafai e tagata o le vasega ona lisi i luga o le laupapa ni nai mea ua poloaiina i tatou e le Atua e talitonu i ai e aunoa ma le vaai i ai. Ona mafai lea ona e fai atu ia i latou e faasoa mai ni aafiaga na faamalosia ai a latou molimau e uiga i nei mea ma faamanuiaga na oo mai ia i latou a o latou faatinoina le faatuatua.

Ioane 21:1–17

Ua valaaulia i tatou e le Faaola e fafaga Ana mamoe.

• O le a se mea e ono fesoasoani i tagata o le vasega e talia le valaaulia a le Faaola e “fafaga [Ana] mamoe”? E mafai ona e amata i le valaaulia o i latou e faitau le leoa le Ioane 21:15–17 ae sui le igoa o Simona i o latou lava igoa ma le “a’u tamai mamoe” ma le “a’u mamoe” i igoa o tagata latou te manatu e finagalo le Alii latou te auauna atu i ai—mo se faataitaiga, o tagata latou te auauna i ai, o tuaoi, po o tagata latou te iloa i le galuega po o le aoga. A mavae ni nai minute, e mafai e tagata o le vasega ona faasoa mai o latou lagona uunai na maua. O le a se mea ua tatou aoaoina e uiga i le Faaola mai Ana faatinoga i le Ioane 21:4–13? O le a se mea e mafai ona tatou faia e fafaga ai tamai mamoe ma mamoe a le Faaola? O le saunoaga a Elder Gary E. Stevenson i le “Punaoa Faaopoopo” e ono fesoasoani e tali ai le fesili lenei.

aikona o punaoa

Punaoa Faaopoopo

E mafai faapefea ona tatou “fafaga [Ana] mamoe”?

Sa faamalamalama mai e Elder Gary E. Stevenson le ala e mafai ai ona tatou faataunuuina le poloaiga a le Alii e fafaga Ana mamoe:

“O ai le leoleo mamoe? O alii, tamaitai, ma tamaiti uma i totonu o le malo o le Atua o se leoleo mamoe. E le manaomia se valaauga. Mai le taimi tatou te tutu a’e ai mai le vai o le papatisoga, ua valaauina ai i tatou i lenei galuega. Tatou te aapa atu i le alofa i isi ona o le mea lena na poloaiina i tatou e lo tatou Faaola e fai. Soo se taimi lava e oo ai o tatou tuaoi i ni mafatiaga faaletino pe faaleagaga, tatou te taufetuli atu e fesoasoani. Tatou te tauave avega a le tasi ma le isi ina ia māmā. Tatou te faanoanoa faatasi ma i latou o ē faanoanoa. Tatou te faamafanafana i latou o e manaomia le faamafanafanaga [tagai Mosaea 18:8–9]. Ua faamoemoeina ma le alofa e le Alii lenei mea mai ia i tatou. Ma o le a oo mai le aso o le a tatou tali atu ai mo le tausiga tatou te faia e auauna atu ai i Lana lafu [tagai Mataio 25:31–46]” (“Leoleoina o Agaga,” Liahona, Nov. 2018, 111).

Faaleleia o Lo Tatou Aoao Atu

Faaavanoa se taimi e fefaasoaai ai le au a’oa’o. “A faasoa atu e tagata aoao mea na latou aoaoina, e le gata ina latou lagona le Agaga ma faamalosia a latou lava molimau, ae latou te uunaia isi tagata o le vasega ia iloa upumoni mo i latou lava. … Tuu ese se taimi mo tamaiti aoga e faasoa ai i lesona uma—i nisi tulaga, e te ono iloa ai o nei talanoaga o le lesona lea” (Aoao atu i le ala a le Faaola,30).