motu o tagata i luga o le auvai ma papatisoina i le vaitafe

Aso o le Penetekoso, saunia e Sidney King

3–9 Iulai.

Galuega 1–5

“E Fai Foi Outou ma Molimau ia te Au”

Afai e te faitau i le Galuega 1–5 ma saili le taitaiga a le Agaga, o le a e maua musumusuga e uiga i le po o a upumoni o loo i mataupu o le a fesoasoani i lau vasega ia atili faalagolago atoa ai i le Agaga Paia ma avea ma molimau faamaoni o le Alii o Iesu Keriso.

aikona o le fefaasoaai

Valaaulia le Fefaasoaai

O loo tele ni fuaitau ma ni mataupu faavae anoa i le Galuega 1–5. O se tasi o auala lelei lava e iloa ai po o le fea e sili ona taua ma talafeagai i tagata o lau vasega, o le tuu atu lea ia i latou e ta’u mai ia te oe po o le a le mea sa tu matila ia i latou i a latou suesuega. O le a faapefea ona e valaaulia lenei ituaiga o fefaasoaaiga? E mafai ona faigofie lava e pei o le tuuina atu ia i latou o ni nai minute e sue ma faasoa mai ai se fuaiupu mai le Galuega 1–5 lea sa latou lagonaina ai le leo o le Alii o tautala atu ia i latou.

aikona o le aoao atu

Aoao Atu le Aoaoga Faavae

Galuega 1:1–8; 2:37–39; 4:1–13, 31–33

E faatonutonu e Iesu Keriso Lana Ekalesia e ala mai le Agaga Paia.

• O le faitau e uiga i aafiaga a Aposetolo e mafai ona fesoasoani i tagata o lau vasega ia iloa ai auala e mafai ona latou maua ai le mana ma le taitaiga mai le Agaga Paia i o latou valaauga ma tofiga o le Ekalesia. O se tasi o auala e toefaamanatu ai aafiaga o loo i le Galuega 1–5 o le tusi i luga o le laupapa Na fesoasoani le Agaga Paia i Aposetolo e taitai le Ekalesia i le: ona valaaulia lea o tagata o le vasega e sue i le Galuega 1:1–8; 2:37–39; ma le 4:1–13, 31–33, ma vaavaai mo auala e faauma ai le fuaiupu. Ona mafai lea e tagata o le vasega ona faasoa mai ni aafiaga na fesoasoani ai le Agaga Paia ia i latou i nei auala. Aisea na manaomia ai e Aposetolo le Agaga Paia—ma aisea tatou te manaomia ai o Ia?

Galuega 1:15–26

O Aposetolo a Iesu Keriso e valaauina e le Atua e ala i faaaliga.

• Mafaufau e valaaulia tagata o le vasega e faamatala mai pe faapefea ona faia e se pisinisi le filifilia o se sui mo se tofiga faapitoa. O a ni faailoga latou te vaavaai i ai? Fai i tagata o le vasega e faatusatusa lenei mea i le ala na valaauina ai le Aposetolo o Matatia (tagai Galuega 1:15–26; tagai foi 1 Samuelu 16:1–13) ma faatasi ai ma saunoaga a Peresitene Gordon B. Hinckley i le “Punaoa Faaopoopo” o loo faamatala mai ai le ala e valaauina ai Aposetolo i aso nei. E faapefea e le auala a le Atua mo le filifilia o taitai ona aafia ai lo tatou faatuatua i taitai ua Ia valaauina? E mafai e tagata o le vasega ona faasoa mai pe na faapefea ona latou maua se molimau faapea o aposetolo ma perofeta o aso nei ua valaauina e Ia.

Galuega 2:37–47

E musuia e le Agaga Paia i tatou e faatino mea ua tatou aoaoina.

• A o suesue e tagata o le vasega ia tusitusiga paia i le fale ma faatasi i le vasega i vaiaso taitasi, atonu e masani ona latou lagonaina le “tuia lea o latou loto” (Galuega 2:37). Atonu e te lagona le musuia e fesoasoani ia i latou e o atu i se isi laasaga e ala i le fesili, “O le a se mea tatou te faia?” (Galuega 2:37). Faitau faatasi le Galuega 2:37–47 valaaulia tagata o le vasega e sue ia mea sa faia e lenei vaega o tagata e 3,000 o se taunuuga o le valaaulia a Peteru. Atonu foi e mafai ona latou faasoa mai ni auala na latou galulue ai i musumusuga mai a latou suesuega o le afioga a le Atua. Ma atonu o le a e sefeina se taimi i le faaiuga o le vasega mo tagata taitoatasi e fesili ai ia i latou lava i le fesili lea, “O le a se mea ou te faia?” ona tusifaamaumau lea o o latou lagona.

O Peteru o loo ataata ma talai atu ma manu‘a i foliga

E ui lava ina pueina ma sasaina, ae sa talai atu ma le lototoa e Peteru le talalelei.

Galuega 3; 4:1–21; 5:12–42

A o faatumulia i tatou i le Agaga Paia, e mafai ona tatou faasoa atu le talalelei ma le lototoa.

• E mafai e tagata o le vasega ona toefaamanatu le Galuega 3; 4:1–21; 5:12–42, ma vaavaai mo faataitaiga a Peteru o molimau atu ma le lototoa. Pe e mafai ona latou matamata i vitio nei: “Peter Preaches and Is Arrested,” “Peter and John Are Judged,” po o le “Peter and John Continue Preaching the Gospel” (ChurchofJesusChrist.org). O le a le uiga o le tautala “i le afioga a le Atua ma le lototoa”? (Galuega 4:31). E faapefea ona fesoasoani le Agaga Paia ia i tatou e faasoa atu le talalelei ma le lototoa? E faapefea ona ese lenei ituaiga o lototoa mai le fefinauai? Atonu o loo i ai ni aafiaga o tagata o le vasega e faasoa mai i se mea sa latou, po o se tasi foi latou te iloa, puipuia ai pe molimau atu ma le lototoa e uiga i le talalelei.

aikona o punaoa

Punaoa Faaopoopo

O le valaauina o se sui o le Toasefululua.

Sa faasoa mai e Gordon B. Hinckley le malamalamaaga manino lenei e uiga i le faagasologa o le valaauina o se Aposetolo fou: “O le taualumaga e tulaga ese lava i le ekalesia a le Alii. E leai se sailia mo le tofi, leai se tauvaga mo tofiga, leai ni faatosinaga e faalauiloa ai uiga auaumama o se tasi. Faatusatusa auala a le Alii i auala a le lalolagi. O le auala a le Alii e filemu, o se auala o le toafimalie, e aunoa ma se vevesi vale po o ni totogi i tupe. E aunoa ma le manatu faapito po o le faamaualuga po o le naunau. I lalo o le fuafuaga a le Alii, o i latou e i ai le tiutetauave e filifili ai tofi e faatautaia i se fesili aupito taua lea: ‘O ai o le a tofia e le Alii?’ O se iloiloga totoa ma le filemu. Ma e i ai le tele o tatalo ina ia maua le faamaoniga a le Agaga Paia ua sao le filifiliga” (“God Is at the Helm,” Ensign, Me 1994, 53).

Faaleleia o Lo Tatou Aoao Atu

Valaaulia Tagata Aoao e Faatino. E masani ona musuia i tatou e le Agaga Paia e faatino mea ua tatou aoaoina (tagai Galuega 2:37). Ina ua tupu lenei mea i tagata sa aoao atu e Peteru, sa ia tuuina atu se valaaulia (tagai Galuega 2:38). Mafaufau pe mafai faapefea ona e mulimuli i le faataitaiga a Peteru.