O Paulo o loo aoao atu i luga o le mauga

24–30 Iulai

Galuega 16–21

“Ua Valaaulia i Matou e le Alii e Folafola Atu le Talalelei”

A o lei tilotilo i lenei otootoga, ia faitau ma le agaga tatalo le Galuega 16–21 faatasi ai ma tagata o lau vasega i le mafaufau. E mafai ona faaopoopo atu manatu nei i le musumusuga e te maua mai le Agaga.

aikona o le fefaasoaai

Valaaulia le Fefaasoaai

Mafaufau e valaaulia tagata o le vasega e faasoa mai se fuaitau mai le Galuega 16–21 na faamanatu atu ai ia i latou se aafiaga sa i ai i le faasoaina atu o le talalelei.

aikona o le aoao atu

Aoao Atu le Aoaoga Faavae

Galuega 16–21

I le avea ai ma tagata o le Ekalesia a le Faaola, tatou te molimau atu e uiga ia te Ia ma faasoa atu Lana talalelei.

• O se tasi o savali iloga i le Galuega 16–21 o le taua o le Agaga Paia i le faasoaina atu o le talalelei. Mo se faataitaiga, e mafai e tagata o le vasega ona suesue i auala na fesoasoani ai le Agaga Paia ia Paulo ma Sila i le Galuega 16:6–15. Aisea tatou te manaomia ai le Agaga Paia pe a tatou faasoa atu le talalelei? (tagai 2 Nifae 33:1; Mataupu Faavae ma Feagaiga 33:8–10; 42:14; 100:5–8). Atonu e mafai e tagata o le vasega ona fefaasoaai i aafiaga i se taimi sa taialaina ai e le Agaga Paia a latou taumafaiga e faasoa atu le talalelei.

• E mafai faapefea e aafiaga a Paulo ona fesoasoani i tagata o le vasega ia maua le lototele pe a uunaia i latou e faasoa atu a latou molimau? Mafaufau e fai atu i tagata taitasi o le vasega e toefaamanatu se tasi o tala nei: Galuega 16:16–34; 17:16–34; 18:1–11. Fai atu ia i latou e faasoa mai se faamaoniga latou te maua i le lototele ma le lototoa o Paulo. O a upumoni sa aoao atu e Paulo (ma malamalama i ai) na tuuina atu ia te ia le to’a i lana savali? Aisea tatou te le mautonu ai i nisi taimi e faasoa atu le talalelei, ma e faapefea ona fesoasoani le Faaola ia i tatou? Uunaia tagata o le vasega e mafaufau i se auala se tasi e mafai ona latou mulimuli ai i le faataitaiga a Paulo ma faasoa soo atu a latou molimau ia Keriso (o le vitio “I‘ll Go Where You Want Me to Go” [ChurchofJesusChrist.org] e mafai ona fesoasoani).

Galuega 17:16–34

O tatou o fanau a le Atua.

• I luga o le Mauga o Areopako, sa aoao atu ai Paulo e uiga i le Tama Faalelagi i se vaega o tagata o e sa itiiti so latou iloa e uiga i le natura moni o le Atua. Ina ia suesue i nei aoaoga, e mafai e tagata o le vasega ona faitau le Galuega 17:24–31 ma tusi i le laupapa ia upumoni latou te maua e uiga i le Tama Faalelagi, lo tatou sootaga ma Ia, ma o tatou sootaga o le tasi i le isi. Ona mafai lea ona latou faasoa mai ni aafiaga sa latou lagona ai le moni o le faamatalaga a Paulo e faapea, e “le mamao o Ia [le Atua] ma i tatou taitoatasi” (fuaiupu 27).

• A o outou iloiloina faatasi nei fuaiupu, mafaufau e talanoaina le upumoni o loo aoao mai i le fuaiupu 29: “O fanau i tatou a le Atua.” E mafai ona e tusia i luga o le laupapa Ona o i tatou o fanau a le Atua, … ma afai tatou te lei iloa o i tatou o fanau a le Atua, … Valaaulia tagata o le vasega e fautua mai ni auala e faauma ai fuaiupu nei. Mo se faataitaiga, ua faapefea e le meamoni faapea o i tatou o fanau a le Atua ona aoaoina i tatou e uiga ia i tatou lava ma le ala tatou te taulimaina ai isi? Faamata e ese faapefea o tatou olaga pe ana faapea tatou te le iloa e uiga i lo tatou sootaga moni ma le Atua? O le a le mea ua faaopoopo mai e le saunoaga a Elder Dallin H. Oaks i le “Punaoa Faaopoopo” i lenei talanoaga?

  o le pepe o loo siiina

  O i tatou taitoatasi o se atalii po o se afafine o le Atua.

aikona o punaoa

Punaoa Faaopoopo

O i tatou uma lava o fanau a le Atua.

O loo faasoa mai i le“O Le Aiga: O Se Folafolaga i le Lalolagi” upumoni e faavavau e uiga i lo tatou sootaga ma le Atua: “O tagata soifua uma—alii ma tamaitai—ua foafoaina i le faatusa o le Atua. O i latou taitoatasi o se atalii po o se afafine agaga faapelepele a ni matua faalelagi, ma, o lea ua tofu ai ma se natura paia ma se taunuuga” (ChurchofJesusChrist.org).

Sa saunoa Elder Dallin H. Oaks o le Korama a Aposetolo e Toasefululua i le taua o le vaai muamua ma le faamuamua ia i tatou lava o ni fanau faaleagaga o le Atua:

“Ia faaeteete i le ala e te faafoliga i ai oe lava. Aua e te faafoligaina pe faamatalaina oe lava i ni uiga auaumama e le tumau. Na pau lava le uiga auaumama e tasi e tatau ona faamatalaina ai i tatou o lenei, o i tatou o se atalii po o se afafine o le Atua. O lena mea moni e maualuga atu i lo isi uiga uma, e aofia ai le lanu, galuega, uiga po o foliga faaletino, mamalu, po o mafutaga foi faaletapuaiga. …

“Ua i ai lo tatou faitalia, ma e mafai ona tatou filifilia soo se uiga po o foliga e faamatala ai i tatou. Ae e tatau ona tatou iloa pe a oo ina tatou filifili e faamatala i tatou lava, pe faailoa atu foi i tatou lava i ni uiga e le tumau pe faatauvaa i tulaga o le faavavau, ua itiiti lo tatou faamamafa atu o le mea e sili ona taua e uiga ia i tatou, ae ova faamamafa i mea e matua le taua lava. O lenei mea e mafai ona taitai ifo ai i tatou i le auala sese ma faatuai ai lo tatou alualu i luma e faavavau” (“Be Wise” Brigham Young University–Idaho devotional, Nov. 7, 2006], byui.edu).

Faaleleia o Lo Tatou Aoao Atu

Ia valaaulia le autalavou e avea ma se vaega o lau lesona. Afai e te aoaoina le autalavou, ia manatua e masani lava ona latou malamalama i mea o loo aafia ai a latou uo. A molimau atu pe aoao atu e se tagata talavou se aoaoga faavae, e mafai ona ootia ai isi talavou i se auala e le mafai ona e faaluaina. Tuu atu i le autalavou ni avanoa e aoao ai le tasi i le isi. (Tagai Aoao Atu i le Ala a le Faaola,29.)