Paulo i le falepuipui

31 Iulai–6 Aokuso

Galuega 22–28

“O Se Auauna ma se Molimau”

Faitau le Galuega 22–28 ma se tatalo i lou loto ina ia musuia oe e le Agaga Paia ia iloa mea e taulai atu i ai o le a fesoasoani ai i tagata o lau vasega. Tusifaamaumau soo se manatu e oo atu i lou mafaufau; e mafai ona avea nei mea ma amataga o lau fuafuaga faafaiaoga.

aikona o le fefaasoaai

Valaaulia le Fefaasoaai

Fai atu i tagata o le vasega e tusi i lalo se mau fesootai mai le Galuega 22–28 na faagaeetia ai i latou i lenei vaiaso. Ao mai a latou tali ma faitau faatasi ni nai fuaiupu. Valaaulia nisi o tagata o le vasega e faasoa mai pe aisea ua taua ai nei fuaiupu ia i latou.

aikona o le aoao atu

Aoao Atu le Aoaoga Faavae

Galuega 22:1–21; 26:1–29

O se molimau o se tautinoga o le upumoni e faavae i luga o le malamalama po o le talitonuga patino.

• O le molimau a Paulo ia Feso ma le Tupu o Akeripa e mafai ona avea o se avanoa e talanoa ai le uiga o le tuuina atu o le molimau. E mafai ona e fai i tagata o le vasega e toefaamanatu le Galuega 22:1–21 ma le 26:1–29. O le a se mea ua tatou aoao mai i le faataitaiga a Paulo e uiga i le tuuina atu o le molimau? O a ni mataupu faavae faaopoopo e uiga i le tuuina atu o le molimau, ua tatou aoaoina mai le saunoaga a Elder M. Russell Ballard i le “Punaoa Faaopoopo”? O le usuina po o le taina o le viiga “Molimau” (Viiga, nu. 74) e mafai ona valaaulia ai le Agaga i le tou talanoaga.

• E ui lava sa lei sailia e Paulo le molimau faaleagaga sa ia mauaina i le ala i Tamaseko, ae sa ia faaaluina le taimi na totoe o lona olaga e galue ai i le faatumauina ma le puipuia o lana molimau (tagai Galuega 22:10, 14–16; 26:19). O le faataitaiga a Paulo e mafai ona fesoasoani i lau vasega ia malamalama ai o se molimau e manaomia ai le galue ma le ositaulaga. Ina ia amata se talanoaga e uiga i lenei mea, atonu e mafai e se tagata o le vasega ona faamatala mai lana taumafaiga ia avea ma se tagata musika, tusiata, po o se tagata taalo talenia. E faapefea ona talitutusa le atiaeina o se tomai faapena ma le mauaina ma le faamalosia o se molimau? O a ni taumafaiga e tatau ona tatou faia ia maua ma faamalosia ai se molimau? (tagai foi Alema 5:46).

Galuega 26:9–23

Ua i ai se tatou tiutetauave e auauna atu i isi.

• Sa valaauina e le Alii ia Paulo e fai ma “se auauna” (Galuega 26:16), ae o le a le uiga o lenei upu? Ina ia fesoasoani i tagata o le vasega e suesue pe faapefea ona latou auauna atu i isi, pe i ai pe leai se tofiga aloaia, e mafai ona e tusia i luga o le laupapa se fesili e pei O le a le uiga o le auauna atu? Valaaulia tagata o le vasega e vaavaai mo tali i punaoa nei: Mataio 20:25–28; Galuega 26:16–18; 3 Nifae 18:29–32; Jean B. Bingham, “Auauna Atu e pei ona Faia e le Faaola,” Liahona, Me 2018, 104–7. A o latou faasoa mai mea na latou maua, uunai i latou e talanoaina auala e mafai e i tatou uma ona auauna atu ai i isi, e aofia ai i o tatou valaauga i le Ekalesia. E mafai foi ona e faaali le vitio“The Miracle of the Roof” (ChurchofJesusChrist.org).

Galuega 27

Afai tatou te uai atu i perofeta a le Alii, o le a Ia taiala i tatou ma puipui i tatou mai le tiapolo.

• Valaaulia tagata o le vasega e talanoa e uiga i le tali a le taitai o le toaselau ina ua valoia e Paulo o le vaa o le a mafatia i le “tele o mea e faaleagaina” ma o le a ma’umau ai ola (tagai Galuega 27:10–11). Aisea na tali atu ai faapea le taitai o le toaselau? Atonu e mafai e tagata o le vasega ona faasoa mai mea semanu latou te fai atu ai i le taitai o le toaselau e fesoasoani ia te ia ia faatuatua ai i le valoaga a Paulo. O a nisi lesona tatou te aoao mai i le Galuega 27 e uiga i le mulimuli i auauna a le Alii? Atonu na i ai ni aafiaga o tagata o le vasega i se taimi sa latou mulimuli ai i le taitaiga a perofeta e tusa lava pe sa ese mai manatu o tagata o siomia i latou. Valaaulia ni nai tagata o le vasega e faasoa mai o latou aafiaga.

aikona o punaoa

Punaoa Faaopoopo

Tuuina atu o le molimau.

Sa saunoa Elder M. Russell Ballard e faatatau i le molimau a Paulo i luma o le Tupu o Akeripa ma aoao mai lona uiga mo i tatou i le tuuina atu o le molimau:

“Ua tatau ona saga taulai atu a tatou sauniga molimau i le Faaola, o aoaoga faavae o le talalelei, o faamanuiaga o le Toefuataiga, ma aoaoga a tusitusiga paia. Ua tatau ona sui a tatou tala, o faamatalaga o ni malaga, ma lauga i ni molimau mama atoatoa. O i latou ua tofia e lauga ma faiaoga i a tatou sauniga po o fonotaga, e tatau ona faia i le mana o aoaoga faavae ia e le gata o le a faalogoina ae ia lagonaina foi, siitia ai agaga o tatou tagata ma faamalamalamaina ai. …

“… E ui lava ina lelei i taimi uma le faaali atu o le alofa ma le faafetai, ae o na uiga e le o i ai le ituaiga molimau e faamumuina se afi o le talitonu i olaga o isi. O le tuuina atu o se molimau, o le ‘molimau atu lea e ala i le mana o le Agaga Paia; ia tuuina atu se tautinoga paia o le upumoni e faavae i le malamalama po o le talitonuga patino’ [Taiala i Tusitusiga Paia, “Molimau,” scriptures.ChurchofJesusChrist.org]. O le tautinoga manino o le upumoni, e maua ai se eseesega i olaga o tagata. O le mea lena e suia ai loto. O le mea lena e mafai e le Agaga Paia ona faamaonia i loto o fanau a le Atua” (“Molimau Mama Atoatoa,” Liahona, Nov. 2004, 41).

Faaleleia o Lo Tatou Aoao Atu

Saunia mamao. “Ao e mafaufau loloto pe faapefea e mataupu faavae o le talalelei o loo e aoaoina ona faamanuia ai tagata o lau vasega, o manatu ma musumusuga o le a oo mai i le gasologa o lou olaga i aso uma—ao e alu atu i le galuega, faia feau i le fale, pe fegalegaleai ma aiga ma uo. Aua le mafaufau i sauniuniga faaleagaga o se mea e te faaavanoaina se taimi e fai ai, ae o se mea e te faia e le aunoa” (Aoao Atu i le Ala a le Faaola,12).