“14–20 Aokuso. Roma 7–16: ‘Faatoilaloina o le Leaga i le Lelei,’” Sau, Mulimuli Mai ia te Au—Mo le Aoga Sa: Feagaiga Fou 2023 (2022)
“14–20 Aokuso. Roma 7–16,” Sau, Mulimuli Mai ia te Au—Mo le Aoga Sa: 2023
14–20 Aokuso
Roma 7–16
“Faatoilaloina o le Leaga i le Lelei”
Faitau le Roma 7–16, ma tusifaamaumau ni lagona uunai e te maua e uiga i le ala e fesoasoani ai i tagata o le vasega ia aoao mai tusitusiga paia. A o e mafaufau loloto i ou lagona uunai, e mafai ona taitai atu ai i ni gaoioiga anoa e aoao ai.
Valaaulia le Fefaasoaai
Mafaufau e faitau le Roma 10:17 ma le 15:4 ma fai atu i tagata o le vasega e faasoa mai mau mai le Roma 7–16 lea e fausia ai lo latou faatuatua ia Iesu Keriso pe avatu ai ia i latou le faamoemoe.
Aoao Atu le Aoaoga Faavae
E mafai ona avea i tatou ma “suli-faatasi ma Keriso.”
-
I le avea ai ma Au Paia o Aso e Gata Ai, ua tatou talitonu o fasifuaitau e pei o “suli lava o le Atua” ma le “suli faatasi ma Keriso” o lona uiga, faatasi ai ma le fesoasoani a Iesu Keriso, e mafai ai ona tatou faapei o le Tama Faalelagi ma maua mea uma o loo i ai ia te Ia (Roma 8:17; tagai foi Mataupu Faavae ma Feagaiga 132:20–21). Ina ia fesoasoani i tagata o le vasega ia iloa pe faapefea ona aoao atu lenei aoaoga faavae i tusitusiga paia atoa, e mafai ona e valaaulia i latou e fai ni paga po o ni vaega toalaiti ma suesue nisi o mau o loo lisiina i le “Punaoa Faaopoopo.” Ona mafai lea e tagata o le vasega ona faasoa mai mea na latou aoaoina ma talanoaina pe aisea e taua tele ai lenei aoaoga faavae.
-
E mafai ona fesoasoani le tala faatusa ua tuuina mai e Elder Dallin H. Oaks i le “Punaoa Faaopoopo” i tagata o le vasega e talanoaina ai auala e mafai ona tatou saunia ai e avea ma “suli lava o le Atua” (Roma 8:17). O a nisi o “tulafono ma mataupu faavae” o loo faatatau i ai Peresitene Oaks? O le a se eseesega na te faia i o tatou olaga i le iloa e mafai ona avea i tatou ma “suli lava o le Atua, ma suli faatasi ma Keriso”? (Roma 8:17).
“O ai e tatau ona faateaeseina i tatou mai i le alofa o Keriso?”
-
O le talanoaina faatasi o le Roma 8 e mafai ona tuuina mai ai se avanoa e fesoasoani ai i tagata o le vasega ia lagona le alofa o le Faaola. Mafaufau e faaali atu se ata o Iesu Keriso (tagai otootoga o lenei vaiaso i le Sau, Mulimuli Mai ia te Au—Mo Tagata Taitoatasi ma Aiga) a o faitauina le Roma 8:18, 28, 31–39 o se vasega. E mafai ona e valaaulia tagata o le vasega e faasoa mai soo se manatu po o ni lagona latou te maua pe a uma ona faitau nei fuaiupu. Atonu e naunau nisi o le vasega e faasoa mai pe na faapefea ona latou maua ni molimau i upumoni ua latou maua i nei fuaiupu.
O poloaiga uma a le Atua ua faataunuuina i le poloaiga ia alofa atu.
-
Ina ia fesoasoani i tagata o le vasega ia iloa le ala o loo “faamalamalama faapuupuu ai” poloaiga uma i le poloaiga ia alofa i lou tuaoi (Roma 13:9), valaaulia i latou e fai se lisi i luga o le laupapa o poloaiga uma lava e mafai ona latou mafaufau i ai. Faitau faatasi le Roma 13:8–10 ma le Mataio 22:36–40, ma talanoa o se vasega i le sootaga i le va o le alofa i le Atua ma o tatou tuaoi ma le usitaia o poloaiga taitasi ua lisiina i luga o le laupapa. E faapefea ona suia e lenei upumoni le ala tatou te mafaufau ai e uiga i poloaiga ma le usiusitai? Mo se faataitaiga, o le a se mea o fautua mai e lenei upumoni e uiga i le faamoemoega o poloaiga?
“Aua nei tatou … toe fefaamasinoai.”
-
Ina ia tuuina atu ni anofaamatalaga i le Roma 14, atonu e te faailoa atu e faapea, sa finau nisi o le Au Paia i Roma o le tasi ma le isi e uiga i tu ma aga faaleaganuu, e pei o le faiga masani e aai ai ma le faamamaluina o aso malolo. O a ni tulaga faapena o tatou feagai ai i aso nei? Atonu e mafai e tagata o le vasega ona vaai vave i le Roma 14 ma tuuina mai i se fuaiupu se tasi le aotelega o le fautuaga a Paulo. O le a se fautuaga e mafai ona tatou faasoa atu i le tasi ma le isi e uiga i le auala e aloese ai mai le faamasino atu? Atonu e mafai e tagata o le vasega ona maua manatu i le savali a Peresitene Dieter F. Uchtdorf “O Le e Alofa Atu e Alofaina Mai,” Liahona, Me 2012, 70–77.
Punaoa Faaopoopo
Mauaina “o mea uma ua i ai i [le] Tamā” (Mataupu Faavae ma Feagaiga 84:38).
-
“Becoming Like God” (Gospel Topics, topics.ChurchofJesusChrist.org)
Sa faamatala mai e Elder Dallin H. Oaks le faataoto lenei:
“Na iloa e se tamā mauoa afai na te tuuina atu ana oa i luga o se tamaitiiti o le e le’i atiina a’e le atamai ma le malosi na manaomia, atonu o le a maumau ai le tofi. Na fai atu le tamā i lona atalii:
“’O au mea uma ua i ai, ou te manao e tuuina atu ia te oe—e le gata i lo’u tamaoaiga, ae faapea foi lo’u tulaga ma le tauleleia i luma o tagata. O na mea ua ia te a’u e faigofie ona ou avatu ia te oe, peitai o le ituaiga tagata ua i ai a’u, o le mea lena e tatau ona maua e oe lava ia. O le a e agavaa mo lou tofi e ala i lou aoaoina o mea sa ou aoaoina, ma ola e pei ona ou ola ai. O le a ou tuuina atu ia te oe tulafono ma mataupu faavae na ou maua ai le poto ma lo’u tauleleia. Ia e mulimuli i a’u faataitaiga, ia ausia mea ua ou ausia, ona avea ai lea o oe e faapei o a’u, ma o mea uma foi ua ia te au o le a fai ia mou’” (“The Challenge to Become,” Ensign, Nov. 2000, 32).
Faaleleia o Lo Tatou Aoao Atu
Saili punaoa e lagolago ai mataupu faavae. E faaopoopo atu i manatu e aoao atu ai o loo i lenei otootoga, e mafai ona e suia teisi gaoioiga mai le otootoga o le vaiaso lenei i le Sau, Mulimuli Mai ia te Au—Mo Tagata Taitoatasi ma Aiga e faaaoga i lau vasega. (Tagai foi Aoao Atu i le Ala a le Faaola, 17–18.)