Korinito anamua

Korinito, Eleni i Saute, o le Nofoaga Autu o Fonotaga ma Faafiafiaga Lautele, atavali na saunia e Balage Balogh Balogh/www.ArchaeologyIllustrated.com

21–27 Aokuso

1 Korinito 1–7

“A Ia Maopoopo Lava”

Na aoao mai Elder Jeffrey R. Holland, o le tele lava o tagata “e o mai [i le lotu] e saili se aafiaga faaleagaga” (“A Teacher Come from God,” Ensign, May 1998, 26). A o e faitau i le 1 Korinito 1–7, ia mafaufau ma le agaga tatalo i mea e mafai ona e faia e fesoasoani ai e fatuai ni aafiaga faaleagaga i lau vasega.

aikona o le fefaasoaai

Valaaulia le Fefaasoaai

Fuafua e valaaulia tagata o le vasega e tusi i lalo auala na latou faatinoina ai mea ua latou aoaoina mai tusitusiga paia. Fai atu i ni nai tagata o le vasega e faasoa mai mea na latou tusia.

aikona o le aoao atu

Aoao Atu le Aoaoga Faavae

1 Korinito 1:10–17;3

O tagata o le Ekalesia a Keriso e taumafai malosi ia lotogatasi.

• O le talanoaina o nai mataupu muamua o le 1 Korinito atonu o se avanoa lea e atiinae ai le autasi sili atu o tagata o le uarota. E mafai ona e amata i le fai atu i tagata o le vasega e talanoa e uiga i se kalapu, vaega au, po o se faalapotopotoga sa latou auai sa i ai se lagona maoae o le autasi. Aisea na lagona ai e lenei vaega le matuai lotogatasi? Ona outou suesue lea i nisi o aoaoga a Paulo e uiga i le autasi o loo i le 1 Korinito 1:10–13; 3:1–11. O a mea o aoao mai e nei fuaiupu, faapea ma o tatou aafiaga, i mea e fesoasoani e fatuai ai le autasi ae o a foi mea e lamatia ai? O a ni osigataulaga e tatau ona tatou faia ina ia ausia ai le lotogatasi? O a faamanuiaga e oo mai ia i latou e lotogatasi? Tagai foi i le talafaatusa a Sister Sharon Eubank i le “Punaoa Faaopoopo.”

• O loo faaaoga e Paulo le faatusa o se fale e uunaia ai le autasi i le 1 Korinito 3:9–17. E mafai faapefea e lenei faataoto ona fesoasoani i lau vasega ia malamalama lelei ai i le autasi? Mo se faataitaiga, a uma ona faitau faatasi nei fuaiupu, e mafai ona tuu atu i tagata taitoatasi o le vasega se poloka ma galulue faatasi ai e fau se mea. O le a le agaga lea e avea ai i tatou ma “aufaigaluega [faufale] faatasi ma le Atua”? (1 Korinito 3:9). O faapefea ona fausia e le Atua i tatou taitoatasi? O le a le mea o loo tatou fauina faatasi o ni uso a Au Paia? O a ni mea e mafai ona tatou faia o se uarota lotogatasi lea e le mafai ona tatou faia o ni tagata taitoatasi?

1 Korinito 1:17–31; 2; 3:18–20

Ina ia ausia le galuega a le Atua, tatou te manaomia le poto o le Atua.

• O se manatu lenei e fesoasoani ai i lau vasega ia faalagolago i le Atua: Vaevae tagata o le vasega i ni vaega ma fai atu ia i latou e faitau vave le 1 Korinito 1:17–31; 2; po o le 3:18–20 e sue ai upu e pei o le poto ma le valea. Ona mafai lea ona latou fefaasoaai i a latou vaega mea o loo aoao mai i nei fuaiupu e uiga i le poto i le galuega a le Alii. O a ni mea e uiga i le talalelei lea e foliga mai e valea i nisi o tagata? O faapefea ona faaalia i nei mea le poto o le Atua? Atonu e mafai foi e tagata o le vasega ona fefaasoaai aafiaga na latou faatuatuaina ai le poto o le Atua, nai lo o latou lava poto, e faataunuu ai Lana galuega.

1 Korinito 6:9–20

E paia o tatou tino faaletino.

• Ina ia amata se talanoaga e uiga i nei fuaiupu, atonu e te manao e tusi i luga o le laupapa ni fesili faapepei: O le a le vaaiga o loo finagalo le Alii tatou te vaai ai i o tatou tino? E faapefea ona ese lea mai le ala o loo manao Satani ia tatou mafaufau ai e uiga i o tatou tino? O le a le uiga o le, o o tatou tino o malumalu o le Agaga Paia? Valaaulia tagata o le vasega e sue tali i nei fesili i le 1 Korinito 6:9–20 (tagai foi Mataupu Faavae ma Feagaiga 88:15; Mose 6:8–9).

• E mafai ona aofia ai i le tou talanoaga e uiga i le paia o o tatou tino se talanoaga e uiga i le tulafono o le legavia. Atonu e mafai ona e fesili atu i tagata o lau vasega po o a ni mea ua latou aoao mai ia Paulo—faapea foi ma isi punaoa a le Ekalesia—e mafai ona fesoasoani ia i latou e faamatala atu ai i isi le mafuaaga e taua ai le legavia. O nisi o nei punaoa e mafai ona aofia ai mea ua lisiina i le “Punaoa Faaopoopo.”

aikona o punaoa

Punaoa Faaopoopo

“O eseesega e mafai ona liua i avanoa.”

Sa faamatala e Sister Sharon Eubank le auala e ausia ai e ‘au alo vaa faatautava le lotogatasi:

E tatau i le ‘au alo vaa ona pulea lo latou tutoatasi ‘ina’inā ma i lea lava foi taimi ia faamaoni i o latou gafatia taitasi. E le manumalo ni tuuga ona e tusapau tagata uma. O auvaa lelei e i ai ni paluga lelei—o se tasi e taitaia, o se tasi e faaleoleo, o se tasi e tauina le taua, o se tasi e tausisia le filemu. E leai se tagata alo e sili atu le taua i se isi, o i latou uma o ni aseta i le vaa, ae afai e manaomia ona latou alo lelei faatasi, e tatau ona fetuunai tagata taitasi i manaoga ma gafatia o isi—o le tagata e pupuu lima e aapa teisi i luma, o le tagata e uumi lima e mimini teisi i totonu.

“E mafai ona liliu ia eseesega i se itu lelei nai lo le le lelei” (“E Ala i le Tuufaatasia o Lagona Tatou te Maua ai le Mana ma le Atua,” Liahona, Nov. 2020, 56; tagai Daniel James Brown, The Boys in the Boat: Nine Americans and Their Epic Quest for Gold at the 1936 Berlin Olympics [2013], 161, 179).

O faamanuiaga o le mama mai feusuaiga.

Jeffrey R. Holland, “Personal Purity,” Ensign, Nov. 1998, 76.

David A. Bednar, “Matou Te Talitonu i le Nofomama,” Liahona, Me 2013, 42.

“Chastity: What Are the Limits?,” “I Choose to Be Pure” (vitio), ChurchofJesusChrist.org

Faaleleia o Lo Tatou Aoao Atu

Molimau atu ia Iesu Keriso. O Paulo, sa “lei alu atu ma le sili o le upu ma le poto, [e] talai atu … le mau a le Atua” (1 Korinito 2:1). O lau molimau faatauvaa i le Faaola e mafai ona i ai se faatosinaga loloto.