sauniga faamanatuga

28 Aokuso–3 Setema

1 Korinito 8–13

“O Outou o le Tino o Keriso”

Na aoao mai Elder Richard G. Scott “e mafai ona tatou tuua le taitaiga e sili ona taua ma patino a le Agaga ia le faalogo i ai” pe afai tatou te le tusifaamaumauina ma tali atu “i uunaiga muamua lava e oo mai ia i [tatou]” (“Ina Ia Maua le Taitaiga Faaleagaga,” Liahona, Nov. 2009, 8).

aikona o le fefaasoaai

Valaaulia le Fefaasoaai

I le 1 Korinito 8–13, sa aoao atu ai e Paulo ia upumoni o le talalelei e faaaoga ai tala faatusa e pei o se tagata tamo‘e i se tuuga, o le tino o le tagata, ma “se sumepalo tagitagi” (tagai 1 Korinito 9:24–25; 12:13–26; 13:1). E mafai ona e fesili i tagata o le vasega po o a mea na latou aoaoina mai nei faatusatusaga. E faapefea ona fesoasoani faatusatusaga tatou te malamalama ai i upumoni o le talalelei?

aikona o le aoao atu

Aoao Atu le Aoaoga Faavae

1 Korinito 10:1–13

E saunia e le Atua se auala e sao ai mai faaosoosoga.

• E mafai faapefea ona e fesoasoani i tagata o le vasega ia iloa upumoni mamana o loo i le 1 Korinito 10:13? O le tasi manatu o le vaevae o le fuaiupu i ni fasifuaiupu pupuu, tuu atu fasifuaiupu taitasi i tagata eseese o le vasega, ma fai atu i tagata o le vasega e toe faaupu fasifuaiupu ia latou lava upu. Mo se faataitaiga, o le a se isi auala e faaupu ai le “ua faamaoni le Atua” po o le “tofotofoga e sili i se mea ua outou lavatia”? Ona mafai lea ona e toe faitauina le fuaiupu, e faaaoga ai nisi o faamatalaga a tagata o le vasega. Atonu e mafai e tagata o le vasega ona faasoa mai aafiaga na faapea ona latou iloa ai e moni lava folafolaga o i lenei fuaiupu. O a ni malamalamaaga faaopoopo e mafai ona tatou maua i nei fuaiupu mai le Alema 13:27–28?

• Nai lo o le nofonofo ai i tofotofoga faapitoa a se tagata, atonu e te manao e taulai atu le talanoaina o le 1 Korinito 10:13 i tofotofoga e pei ona faaupuina e Paulo, “e ese i lo tagata.” E mafai e tagata o le vasega ona amata i le faailoaina o tofotofoga na lapatai faasaga i ai Paulo o loo i fuaiupu 1–12. Atonu foi latou te fautuaina mai ni faataitaiga i onaponei o tofotofoga masani, e pei o tofotofoga ia le faamaoni, faitatala, po o le faamasino o isi. E mafai faapefea e se tagata, faatasi ai ma le fesoasoani a le Atua ona “sao ai” i nei tofotofoga?

1 Korinito 10:16–17; 11:23–30

O le faamanatuga e soofaatasi ai i tatou o ni tagata o le Ekalesia a Keriso.

• O nei fuaiupu e mafai ona musuia ai se talanoaga e uiga i auala e mafai ai e le faamanatuga ona soo faatasi lau uarota i au taumafaiga e avea atili e pei o le Faaola. E mafai ona e amata i le faitau i le 1 Korinito 10:16–17 ma suesue po o le a le uiga o le upu mafuta faatasi i le anotusi lenei (e mafai e se tagata ona vaavaai mo nisi faauigaga i se lolomifefiloi). E faapefea ona fesoasoani le fetagofi faatasi i le faamanatuga tatou te lagona atili ai le lotogatasi? E faapefea ona fesootai le fautuaga a Paulo “ia suesue ifo le tagata ia te ia” i lenei sini? (1 Korinito 11:28).

1 Korinito 12

O meaalofa faaleagaga ua tuuina mai ina ia manuia ai fanau uma a le Tama Faalelagi.

• Ina ia fesoasoani i tagata o le vasega ia vaai i faataitaiga o auala e fesoasoani ai le atinae o a latou meaalofa faaleagaga e siitia ai le Ekalesia, mafaufau e valaaulia i latou e mafaufau i meaalofa faaleagaga na maua e tagata i tusitusiga paia. Mo ni manatu, e mafai ona e tofia i latou e suesue i se mau faasino se tasi i le “Punaoa Faaopoopo” ma tau mai meaalofa faaleagaga ua latou manatu sa i ai i lena tagata. E mafai foi ona latou talanoa e uiga i meaalofa faaleagaga latou te vaaia i le tasi ma le isi. E faapefea ona avea meaalofa faaleagaga a nei tagata o se faamanuiaga ia i tatou uma? E mafai faapefea ona tatou faaaogaina a tatou meaalofa faaleagaga e faamanuia ai isi ma siitia ai le tino o Keriso, po o le Ekalesia? (tagai 1 Korinito 12:12–31; tagai foi 1 Korinito 14:12).

• Ina ia fesoasoani i tagata o le vasega ia malamalama pe faapefea ona atiina ae meaalofa faaleagaga, valaaulia i latou e faitau le 1 Korinito12:27–31; Moronae 7:48; 10:23, 30; Mataupu Faavae ma Feagaiga 46:8. O le a se mea o aoao mai e nei mau ia i tatou e uiga i le mauaina o meaalofa faaleagaga? E mafai faapefea e le atiinaeina o meaalofa faaleagaga ona faia i tatou ia avea atili e pei o Keriso? Valaaulia tagata o le vasega e filifili se meaalofa latou te mananao ia maua ma ia saili le fesoasoani a le Alii i le mauaina o lena meaalofa.

1 Korinito 13

O le alofa mama o le meaalofa faaleagaga aupito silisili lea.

• E mafai ona e fai i le vasega e mafaufau loloto ma le filemu i le 1 Korinito 13 ma mafaufau i se tagata latou te iloa o se faataitaiga lelei o se itu se tasi pe sili atu o le alofa mama lea o loo taua e Paulo. O nisi tagata o le vasega e mafai ona faamatalaina le tagata o loo latou mafaufau i ai faapea ma se aafiaga na faaalia ai e lenei tagata le alofa mama. E te ono lisiina foi vaega o le faamatalaga a Paulo i luga o le laupapa ma valaaulia tagata o le vasega e faasoa mai ni manatu e faatatau i le uiga o le ia “onosai” po o le “le faaitaitagofie” (1 Korinito 13:4–5). Na faapefea ona faataitaia e le Faaola nei uiga o le alofa mama? O a upumoni faaopoopo o loo aoao mai i le Moronae 7:46–48 e uiga i le alofa mama?

aikona o punaoa

Punaoa Faaopoopo

Faataitaiga mai tusitusiga paia o meaalofa faaleagaga.

• Kenese 40–41

• Ruta 1

• 1 Tupu 3:5–15

• Mataio 1:18–24; 2:13–15, 19–22

• Luka 1:26–38

• Ioane 11:20–27

• Galuega 3:1–8; 5:12–16

• Mamona 1:1–5

• Eteru 2:14–25; 3:1–20

• Mataupu Faavae ma Feagaiga 6:5, 10–12

• Mose 6:22–27, 31–43; 7:2–4, 13, 17–21

Faaleleia o Lo Tatou Aoao Atu

Ola i mataupu faavae e te aoaoina atu. O le ola i mataupu faavae o loo e aoaoina atu o le a fesoasoani e te molimau atu ai e uiga i na mataupu faavae ma le mamana faateleina. Na aoao mai Paulo, “Ua faapea foi le poloaiga a le Alii i e folafola le talalelei e maua mea a le tino i le talaiga o le talalelei” (1 Korinito 9:14).