faatanoa o le vai papatisoga i le malumalu

4–10 Setema

1 Korinito 14–16

“O Le Atua e Le o le Atua ia o le Faasoesa, a o le Filemu”

Ao lei toefaamanatua le otootoga lenei, faitau le 1 Korinito 14–16. Tusifaamaumau ou uluai lagona uunai i le po o a ni upumoni o le a fesoasoani i tagata o lau vasega, ma faaauau pea ona saili le taitaiga faaopoopo mai le Agaga ao e sauni e aoao atu.

aikona o le fefaasoaai

Valaaulia le Fefaasoaai

Tuu atu ni nai minute i tagata o le vasega e toefaamanatu ai le 1 Korinito 14–16 ma sue se fuaiupu latou te manatu e faapitoa ona anoa. Valaaulia i latou e sue se tagata o le vasega e mafai ona latou faasoa atu i ai la latou fuaiupu ma faamatala pe aisea ua latou filifilia ai.

aikona o le aoao atu

Aoao Atu le Aoaoga Faavae

1 Korinito 14

A tatou potopoto faatasi, e tatau ona tatou saili e siitia e le tasi le isi.

• Mafaufau e faaaoga aoaoga a Paulo i le 1 Korinito 14 e faamanatu ai i tagata o le vasega e mafai e i tatou uma ona faagaeetia—pe lagolago ma siitia—e le tasi le isi i le lotu. Atonu o se auala faigofie e toefaamanatu ai le mataupu lenei, o le tusi o se fesili i luga o le laupapa, e pei o le O le a le mea e tatau ona fai ma a tatou sini pe a tatou potopoto faatasi? Valaaulia tagata o le vasega e saili mo ni tali e mafai ona maua i le 1 Korinito 14. E mafai ona maua isi manatu i le Moronae 6:4–5 ma le Mataupu Faavae ma Feagaiga 50:17–23. A o faasoa mai e tagata o le vasega mea ua latou maua, mafaufau e fesili atu ia i latou pe faapefea so latou lagona i le ausiaina e lau vasega o nei sini. E mafai foi ona latou faasoa mai ni aafiaga ia sa latou lagonaina ai le faagaeetia e ala i se mea na faasoa mai e se tasi o le vasega.

1 Korinito 15

Ona sa toetu Iesu Keriso, o le a tatou toetutu uma ai.

• E mafai faapefea ona e faaaogaina le molimau a Paulo i le 1 Korinito 15 e faamalosia ai molimau a tagata o lau vasega i le Toetu? O se tasi o auala o le vaevae lea o le vasega i ni vaega se lua ma fai atu i se tasi o vaega e vaavaai i le 1 Korinito 15 mo taunuuga o le a tatou feagai pe ana fai e lei toetu Iesu Keriso. O le isi vaega e mafai ona vaavaai mo faamanuiaga ua tatou maua ona o Lona Toetu. Ona mafai lea ona tusi e vaega taitasi i luga o le laupapa mea ua latou aoaoina. O a ni mea e mafai ona latou faaopoopo atu ia latou lisi ina ua uma ona faitau i le saunoaga a Elder D. Todd Christofferson i le “Punaoa Faaopoopo”? Ina ia fesoasoani i tagata o le vasega ia lagona le Agaga i le taimi o le talanoaga lenei, mafaufau e faaali atu se ata o le Faaola toetu (tagai i le otootoga o le vaiaso lenei i le Sau, Mulimuli Mai ia te Au—Mo Tagata Taitoatasi ma Aiga) po o le taina pe usuina se viiga e uiga i le Toetu.

• Ona sa tali atu Paulo i tagata o e sa lei talitonu i le toetu, atonu o le a aoga ai i lau vasega le faatinoina o se tala i se tulaga talitutusa faapena. Mo se faataitaiga, e faapefea ona latou faamalosia le faatuatua o se isi uso i le Toetu? O a ni mea tatou te maua i le 1 Korinito 15 o le a fesoasoani ia i latou e faamatala ai le manaomia o le Toetu ma le faamaoniga o le Toetu o Iesu Keriso? O a nisi o mau e mafai ona latou faaaogaina? (Tagai, mo se faataitaiga, Luka 24:1–12, 36–46; Alema 11:42–45.)

  la oso

  Na aoao atu Paulo e uiga i le Toetu e ala i le faasino atu i “tino selesitila” e pei o le la (1 Korinito 15:40).

• O le1 Korinito 15 o se tasi lea o nai vaega o tusitusiga paia o loo taua ai papatisoga mo e ua oti (tagai fuaiupu 29; tagai foi Mataupu Faavae ma Feagaiga 128:18). Atonu e mafai e tagata o le vasega ona fefaasoaai i aafiaga na latou maua i le faia o papatisoga po o isi sauniga mo o latou tuaa. Aisea na faatatau atu ai Paulo i papatisoga mo e ua maliliu o le faamaoniga o le Toetu? Afai o le a aoga le talanoa i le pogai e tatau ai papatisoga mo e ua maliliu, tagai i le tusiga “Baptisms for the Dead” Gospel Topics, (topics.ChurchofJesusChrist.org). O le vitio “Glad Tidings: The History of Baptisms for the Dead” (ChurchofJesusChrist.org) o loo faamatala ai le auala na toefuatai mai ai le mataupu faavae lenei i o tatou aso.

aikona o punaoa

Punaoa Faaopoopo

Taua o le Toetu

Na aoao mai Elder D. Todd Christofferson:

“Mafaufau mo sina taimi i le taua o le Toetu i le iloaina atoatoa ai o le faasinomaga moni o Iesu le Nasareta ma foia ai finauga ma fesili faalefilosofia o le olaga. Afai e moni lava na toetu Iesu, o lona uiga e mautinoa lava o Ia o se tagata paia. E leai se tagata ola ua i ai ia te ia lava se mana e toe ola mai ai pe a oti. Ona sa toetu o Ia, e le mafai ai la ona faapea o Iesu ua na o se kamuta, se faiaoga, se aoao, po o se perofeta. Ona sa toetu o Ia, e ao ai ona faapea sa avea Iesu ma se Atua, o le Alo Pele foi e Toatasi o le Tama.

“O lea, o mea sa Ia aoao mai e moni; e le mafai ona pepelo le Atua.

“O lea, o Ia o le Foafoa o le lalolagi, e pei ona Ia fetalai mai.

“O lea, e moni le lagi ma seoli, e pei ona Ia aoao mai.

“O lea, e i ai se lalolagi o agaga lea sa Ia asiasi i ai ina ua mavae Lona maliu.

“O lea, o le a Ia toe afio mai, e pei ona fetalaia e agelu, ma ‘nofotupu patino i luga o le fogaeleele.’

“O lea, e i ai le toetu ma se faamasinoga faaiu mo tagata uma” (“O Le Toetu o Iesu Keriso,” Liahona, Me 2014, 113).

Faaleleia o Lo Tatou Aoao Atu

Saili e malamalama ia i latou e te aoaoina. E leai ni tagata se toalua e tutusa lelei; o tagata taitoatasi e te aoaoina e i ai se tulaga, manatu, ma ni taleni tulaga ese. Tatalo ia iloa auala e mafai ona e faaaogaina ai nei mea e faaaofia ai au tagata aoao. A o e malamalama lelei ia i latou o loo e aoaoina, e mafai ona e fatuina ni taimi aoaoina e anoa ma manatua pea mo i latou (tagai Aoao Atu i le Ala a le Faaola,7).