Iesu Keriso

11–17 Setema

2 Korinito 1–7

“Ia Outou Lelei ma le Atua”

A o e faitau i le 2 Korinito 1–7 i le vaiaso lenei, mafaufau i ni tagata faapitoa o le vasega—o i latou e o mai i le vasega ma i latou e le o mai. E mafai faapefea ona faamanuiaina i latou i mataupu faavae o nei mataupu?

aikona o le fefaasoaai

Valaaulia le Fefaasoaai

E mafai ona manuia tagata o le vasega mai le faalogo atu i manatu o le tasi ma le isi e uiga i le auala e atili aoga ai a latou suesuega o tusitusiga paia. Tuu atu ni nai minute mo lenei mea mai lea taimi i lea taimi.

aikona o le aoao atu

Aoao Atu le Aoaoga Faavae

2 Korinito 1:3–7; 4:6–10, 17–18; 7:4–7

O ō tatou tofotofoga e mafai ona avea o se faamanuiaga.

• O aafiaga na faamatalaina e Paulo ma le fautuaga sa ia tuuina mai i le 2 Korinito e mafai ona fesoasoani i tagata o le vasega e mafaufau ai i faamanuiaga e mafai ona oo mai mai i o latou tofotofoga. Ina ia amata se talanoaga, e mafai ona e fai atu i se tagata o le vasega e sau saunia e talanoa pe na faapefea ona faamanuiaina e se tofotofoga lona olaga po o se mea sa ia aoao mai i se isi tagata sa onosaia se tofotofoga. Ona e tuu atu lea i tagata o le vasega ni nai minute e toefaamanatu ai le 2 Korinito 1:3–7; 4:6–10, 17–18; ma le 7:4–7, e vaavaai mo le mea na aoao mai e Paulo e uiga i faamoemoega ma faamanuiaga o tofotofoga. Fai atu i tagata o le vasega e faasoa mai ni mea ua latou maua. Atonu e te fautua atu latou te faitau leotele le fuaiupu na latou maua ai se aoaoga faapitoa ona faasoa mai lea o se aafiaga po o se molimau e faatatau i lena aoaoga.

• Ina ia faaopoopo atu i lau talanoaga, mafaufau e usu faatasi e tagata o le vasega ni viiga e sili ona fiafia i ai o loo molimau mai i le mafanafana ma faamanuiaga e ofoina mai e le Tama Faalelagi ma le Faaola ia i tatou i taimi o tofotofoga—e pei o “Le Faavae Malosi” (Viiga, nu. 45). A uma ona pepese faatasi, e mafai ona e valaaulia tagata o le vasega e vaai se fasifuaitau i le 2 Korinito 1 ma le4 latou te lagona e fetaui ma le savali o le viiga.

2 Korinito 2:5–11

O le faamagalo atu o se faamanuiaga lea tatou te tuuina atu ma mauaina mai.

• Ua tofu i tatou uma ma aafiaga ina ua “faatupuina [e se tasi] le tiga” ia i tatou po o lo tatou aiga (fuaiupu 5). Atonu e mafai e tagata o le vasega ona suesue i le 2 Korinito 2:5–11, ma vaai mo le fautuaga mai ia Paulo e uiga i le ala e taulima ai se tagata sa faatiga ia i tatou. Mafaufau e valaaulia tagata o le vasega e toefaamanatu le Mataio 5:43–48 ma le Luka 15:11–32 e aoao atili ai e uiga i le ala e tatau ona tatou taulimaina ai i latou o e na faatiga ia i tatou. E faapefea ona tatou faaleaga i tatou lava ma isi pe a tatou filifili e le faamagalo atu?

2 Korinito 5:14–21

E ala i le Togiola a Iesu Keriso, e mafai ai ona tatou toe faalelei ma le Atua.

• E toatele tagata e o mai i le ekalesia ma se manao ia lagona le latalata atili i le Atua, ma o le talanoaina o le 2 Korinito 5:14–21 e mafai ona fesoasoani ia i latou. Ina ia amata, e tatau i tagata o le vasega ona sue le uiga o le upu lelei, atonu e amata i le sueina o le upu i le lolomifefiloi. O a ni malamalamaaga ua tuuina mai e lenei mea e uiga i le faalelei ma le Atua? O a ni malamalamaaga faaopoopo tatou te maua mai le faamatalaga “Atonement” i le Bible Dictionary? E faapefea ona fesoasoani nei malamalamaaga ia tatou malamalama ai i le 2 Korinito 5:14–21? Atonu e te manao e valaaulia tagata o le vasega e faasoa mai o latou lagona e uiga i le Faaola, o Lana Togiola lea e mafai ai ona tatou toe faatasi ma le Atua.

2 Korinito 7:8–11

O le tiga e tusa i le Atua e taitai atu ai i le salamo.

• O le2 Korinito 7:8–11 o loo aumaia ai se faamalamalamaga aoga o le tiga e tusa i le Atua ma lana matafaioi i le salamo. O le a se mea ua tatou aoaoina e uiga i le tiga e tusa i le Atua mai le 2 Korinito 7:8–11 ma upu a Peresitene Dieter F. Uchtdorf i le “Punaoa Faaopoopo”? Aisea e matuai taua ai le tiga e tusa i le Atua i le salamo?

• Atonu e te lagona le musuia e uunaia se talanoaga lautele atu e uiga i le salamo. Afai o lea, e mafai ona e faia se mea e pei o lenei: Tusi i luga o le laupapa O le salamo e . Fai atu i tagata o le vasega e sue ni auala e faauma ai le fasifuaitau lenei, e faaaoga ai mea ua latou aoaoina mai le 2 Korinito 7:8–11, faapea foi ma mau ma isi punaoa o loo maua i le tusiga o le Gospel Topics “Repentance” (topics.ChurchofJesusChrist.org). E ono mafai faapefea ona tatou faaaogaina nei aoaoga e fesoasoani ai i se tasi ia malamalama i le auala e salamo faamaoni ai?

aikona o punaoa

Punaoa Faaopoopo

O le tiga e tusa i le Atua e musuia ai le suia ma le faamoemoe.

Na faamalamalama mai e Peresitene Dieter F. Uchtdorf:

“O letiga e tusa i le Atua e musuia le suiga ma le faamoemoe e ala i le Togiola a Iesu Keriso. O letiga faalelalolagi e tosoa i tatou i lalo, aveesea ai le faamoemoe, ma faatosinaina i tatou ia lolo atu atili i faaosoosoga.

“O letiga e tusa i le Atua e taitai atu i le liua ma se suiga o le loto. Na te uunaia i tatou ia inoino i le agasala ae fiafia i le lelei. Na te uunaia i tatou ia tutu i luga ma savavali i le malamalama o le alofa o Keriso. O le salamo moni e faatatau i le suia, ae le o tiga ma mafatiaga” (“E Mafai Ona E Faia Nei Lava!,” Liahona, Nov. 2013, 56).

Faaleleia o Lo Tatou Aoao Atu

Ia faaaofia ai i latou o loo i ai i ni tauiviga. O nisi taimi o tagata o le vasega o loo i ai i ni tauiviga e na ona mananao lava ia faaaofia ina ia lagona le alofaina. Mafaufau e tuu atu ia i latou se tofiga ina ia auai i se lesona i le lumanai. Aua le fiu pe a latou le tali mai i au taumafaiga i le taimi muamua. (Tagai Aoao Atu i le Ala a le Faaola, 8–9.)