O Iesu o loo talanoa i se tamaitiiti

18–24 Setema

2 Korinito 8–13

“E Alofa le Atua i Le Ua Foai ma le Lotomalie”

Ao e faitau i le 2 Korinito 8–13, mafaufau e uiga i tagata e te aoaoina ma fuafua gaoioiga o le a fesoasoani ia latou iloa ai mataupu faavae o loo i nei mataupu. Ona toefaamanatu lea o le otootoga lenei mo ni manatu faaopoopo.

aikona o le fefaasoaai

Valaaulia le Fefaasoaai

O se tasi lenei o auala e valaaulia ai tagata o le vasega e faasoa mai mea sa latou aoaoina mai le 2 Korinito 8–13: fai atu i nisi o i latou e tusi i luga o le laupapa se fasifuaitau e sili ona fiafia i ai mai a latou faitauga ma faasoa mai pe aisea e taua ai nei fasifuaitau ia i latou.

aikona o le aoao atu

Aoao Atu le Aoaoga Faavae

2 Korinito 8:1–15; 9:6–15

E faasoa atu ma le fiafia e le Au Paia mea ua latou maua ia manuia ai i latou o e matitiva ma lē tagolima.

• Ua poloaiina e le Atua Lana Au Paia ia fesoasoani e tausi i latou o e le tagolima, ma o fasifuaitau i le 2 Korinito 8–9 e mafai ona musuia ai tagata o lau vasega i a latou taumafaiga. Ina ia fesoasoani ia latou maua nei fasifuaitau, e mafai ona e tusia i luga o le laupapa ni fesili e pei o le Aisea tatou te foai atu ai? ma le E faapefea ona tatou foai atu? E mafai ona sue e le afa o le vasega ia tali i le 2 Korinito 8:1–15, ae sue e le isi afa i le 2 Korinito 9:6–15. (Atonu e te faamatala atu, i le mataupu 8, fuaiupu 1–5, o loo tautala ai Paulo e uiga i le Au Paia i Maketonia o ni faataitaiga o le foai atu ma le matamau.) E mafai faapefea e mataupu faavae sa aoao mai e Paulo ona fesoasoani ia i tatou ia lelei atili ai lo tatou tausia o e matitiva ma e le tagolima?

2 Korinito 11:1–4

E tatau ona tatou taulai atu i “le tonu ia Keriso.”

• O nisi taimi e lagona ai e tagata o le Ekalesia le lofituina i manaoga o le olaga—e aofia ai mea latou te ono vaaia o manaoga o le avea ma se Au Paia o Aso e Gata Ai. O le fautuaga a Paulo e uiga i “le tonu ia Keriso” (2 Korinito 11:3) e mafai ona fesoasoani. Atonu foi e mafai ona outou faitau faatasi i le 2 Korinito 11:3 ma talanoaina po o le a le uiga o le fasifuaitau “le tonu ia Keriso”. E mafai foi ona e fai atu i tagata o le vasega e vaai faalemafaufau e faapea, ua valaaulia i latou e tusi mo se nusipepa, se faamatalaga o le talalelei a Iesu Keriso, e faatapulaa i le 100 upu. Tuu atu ia i latou le taimi e tusi ai a latou faamatalaga, ma tuu atu ia i latou e fefaasoaai i le tasi ma le isi mea na latou tusia. Afai latou te manaomia le fesoasoani, e mafai ona latou faasino i le Ioane 3:16–17; 3 Nifae 27:13–21; le saunoaga a Peresitene Dieter F. Uchtdorf i le “Punaoa Faaopoopo.” E mafai e tagata o le vasega ona faasoa mai ni manatu e uiga i le auala e “faafaigofie ai [la tatou] faiga o le avea ma soo.”

2 Korinito 12:5–10

Ua lava le alofa tunoa o le Atua e fesoasoani tatou te maua ai le malosiaga i o tatou vaivaiga.

• O le a sau tala e fai atu i se uo sa tatalo mo le toomaga mai se vaivaiga peitai ua ia lagona e lei talia mai lenei tatalo? Mafaufau e valaaulia tagata o le vasega e mafaufau loloto i lenei fesili ao latou faitau le leoa le 2 Korinito 12:5–10. Ona latou faasoa mai lea o ni malamalamaaga loloto mai nei fuaiupu atonu e fesoasoani ai i lenei tulaga. E mafai foi ona latou faasoa mai ni aafiaga i se taimi, sa latou maua ai le malosi i vaivaiga, e ala i le alofa tunoa o Iesu Keriso po o Lona mana paia ma le fesoasoani. O a auala na faia ai e lena aafaiga se faatosinaga i o latou olaga? Aisea e taua ai le faatuatuaina o le taimi a le Alii?

aikona o punaoa

Punaoa Faaopoopo

E mafai ona tatou faafaigofie lo tatou taulimaina o le ola ai i le talalelei.

Na aoao mai Peresitene Dieter F. Uchtdorf:

“Uso e ma tuafafine, o le ola i le talalelei e le manaomia ona faafaigata.

“E tuusao moni lava. E mafai ona faamatalaina faapenei:

• O le faalogo i le afioga a le Atua ma le faamoemoega naunautai e taitai atu ai i tatou e talitonu i le Atua ma faatuatuaina Ana folafolaga.

• O le faatele o lo tatou faatuatuaina o le Atua, o le faatele foi lea o le faatumulia o o tatou loto i le alofa mo Ia ma mo le tasi ma le isi.

• Ona o lo tatou alofa mo le Atua, ua tatou mananao ai e mulimuli ia te Ia ma tatou faaogatusa ai a tatou amioga ma Lana afioga.

• Ona tatou te alolofa i le Atua, ua tatou mananao ai e auauna atu ia te Ia; tatou te mananao ia faamanuia olaga o isi ma fesoasoani atu i e matitiva ma lē tagolima.

• O le faatele ona tatou savavali i lenei ala o le avea ma soo, o le faatele foi lena o lo tatou mananao ia aoao i le afioga a le Atua.

“Ma faapena ai lava, i laasaga taitasi e taitai atu i le isi laasaga ma faatumulia ai i tatou i le faatuatua, faamoemoe ma le alofa mama ua faateleina naua.

“E matagofie lona faigofie, ma e maeu lona aoga.

“Uso e ma tuafafine, afai o loo e manatu e le o matua aoga tele le talalelei ia te oe, ou te valaaulia oe ia taofi teisi lava, toe tagai i lou olaga mai se mea maualuga, ma faafaigofie lou auala i le avea ai ma soo. Taulai atu i aoaoga faavae autu, mataupu faavae, ma faaaogaaga o le talalelei. Ou te folafola atu o le a taiala ma faamanuia outou e le Atua i o outou ala i se olaga faamalieina, ma o le a mautinoa lava le aoga atili o le talalelei mo outou” (“E Aoga,” Liahona, Nov. 2015, 22).

Faaleleia o Lo Tatou Aoao Atu

Galulue faatasi ma tagata o le aiga. “O tagata e pito sili ona mamana lo latou faatosinaga i se tasi—mo le lelei po o le le lelei—e tele lava o i latou o loo i totonu o lona aiga. Ona o le aiga o le totonugalemu lena o le ola i le talalelei ma aoaoga, o au taumafaiga e faamalosia tagata o lau vasega e sili atu ona mataalia pe a e galue faatasi ma … tagata o le aiga” (Aoao Atu i le Ala a le Faaola,8).