Aldaw ti Pentecostes, ni Sidney King

Hulio 3–9

Dagiti Aramid 1–5

“Dakayto ti Saksik”

No basaem ti Dagiti Aramid 1–5 ket kalikagumam a gun-oden ti pannarabay ti Espiritu, umawatkanto iti pammaregta maipapan iti no ania a kinapudno kadagiti kapitulo ti mangtulongto kadagiti miembro ti klasem nga agpannuray a naan-anay iti Espiritu Santo ken agbalinda a napudno a saksi ni Apo Jesucristo.

Yawis ti Panagbibinninglay

Adu dagiti napapateg a bersikulo ken pagbatayan iti Dagiti Aramid 1–5. Maysa a naindaklan a wagas tapno matakuatan no ania ti kapatgan ken adda pannakainaigna kadagiti miembro ti klasem ket paibagam kadakuada kenka no ania ti makaay-ayo kadakuada iti panagadalda. Kasano a mayawismo daytoy a kita ti panagbibinninglay? Mabalin a simple a kas iti panangted kadakuada iti sumagmamano a minuto nga agsapul ken mangibinglay iti maysa a bersikulo manipud iti Dagiti Aramid 1–5 a nakariknaanda iti timek ti Apo a makisasao kadakuada.

Isuro ti Doktrina

Dagiti Aramid 1:1–8; 2:37–39; 4:1–13, 31–33

Iturong ni Jesucristo ti Simbaanna babaen ti Espiritu Santo.

• Ti panangbasa maipapan iti padpadas dagiti Apostol ket makatulong kadagiti miembro ti klasem a mangkita no kasano a makaawatda iti bileg ken pannarabay manipud iti Espiritu Santo kadagiti takem ken naituding nga aramidenda iti Simbaan. Maysa a wagas a mangrebyu kadagiti padas iti Dagiti Aramid 1–5 ket ti mangisurat iti pisarra ti Matulongan ti Espiritu Santo dagiti Apostol a mangidaulo ti Simbaan babaen ti: ket kalpasanna awisem dagiti miembro ti klase a mangsukisok iti Dagiti Aramid 1:1–8; 2:37–39; ken 4:1–13, 31–33, a mangsapsapul kadagiti wagas a pangileppasan iti binatog. Mabalin nga ibinglay dagiti miembro ti klase dagiti padasda a tinulongan ida ti Espirtu Santo kadagitoy a wagas. Apay a masapul dagiti Apostol ti Espiritu Santo—ken apay a masapultayo Isuna?

Dagiti Aramid 10:15–26

Inawagan ti Dios dagiti Apostol ni Jesucristo babaen iti paltiing.

• Ibilang ti panangawis kadagiti miembro ti klase a mangilawlawag no kasano ti panagpili iti kasukat para iti nangato a saad iti maysa a propesion. Ania dagiti kualipikasion a mabalin a sapsapulenda? Idawat kadagiti miembro ti klase nga idiligda daytoy iti no kasano a naawagan ni Apostol Matias (kitaen iti Dagiti Aramid 1:15–26; kitaen met iti 1 Samuel 16:1–13) ken dagiti balikas ni Presidente Gordon B. Hinckley iti “Dagiti Nainayon a Resources” a mangiladladawan no kasano a maawagan dagiti Apostol ita. Kasano a ti wagas ti panagpili ti Dios kadagiti lider ket makaapekto iti pammatitayo kadagiti lider nga inawaganna? Mabalin nga ibinglay dagiti miembro ti klase no kasano a nagun-odda ti pammaneknekda nga awaganna dagiti apostol ken propeta ita.

Dagiti Aramid 2:37–47

Paregtaennatayo ti Espiritu Santo nga agtignay iti no ania ti nasursurotayo.

• Bayat ti panangadal dagiti miembro ti klase iti nasantuan a kasuratan iti pagtaengan ken aggigiddan iti klase iti tunggal lawas, masansan a mariknada ti “napaladingitan ti pusoda” (Dagiti Aramid 2:37). Mabalin a mariknam ti pannakaparegta a mangtulong kadakuada a dumur-as babaen ti panangsaludsod iti,“Anianto ti aramidentayo?” (Dagiti Aramid 2:37). Aggigiddan a basaenyo ti Dagiti Aramid 2:37–47 nga aw-awisem dagiti miembro ti klase tapno agsukisok kadagiti banag nga inaramid daytoy a grupo ti 3,000 a tattao, kas bunga ti awis ni Pedro. Mabalinda pay nga ibinglay dagiti wagas a nakapagtignayanda iti pammaregta manipud iti panagadalda iti balikas ti Dios. Kalpasanna mabalinmo ti mangilatang iti oras iti gibus ti klase tapno saludsoden iti tunggal tao iti bagida ti “Anianto ti aramidek?” ket isuratda dagiti impresionda.

Iti baet ti pannakatiliw ken pannakamalmalona, situtured nga inkasaba ni Pedro ti ebanghelio.

Dagiti Aramid 3; 4:1–21; 5:12–42

No mapnotayo iti Espiritu Santo, maibinglaytayo ti ebanghelio nga addaan iti kinatured.

• Mabalin nga irebyu dagiti miembro ti klase ti Dagiti Aramid 3; 4:1–21; 5:12–42, a mangsapsapul kadagiti pagarigan a situtured a mangipanpaneknek ni Pedro. Wenno mabalinda a buyaen ti maysa kadagitoy a video: “Peter Preaches and Is Arrested,” “Peter and John Are Judged,” wenno ti “Peter and John Continue Preaching the Gospel” (ChurchofJesusChrist.org). Ania ti kayat a sawen ti agsarita “a situtured ti sao ti Dios”? (Dagiti Aramid 4:31). Kasano a tulongannatayo ti Espiritu Santo a mangibinglay a situtured ti ebanghelio? Kasano a naidumduma daytoy a klase ti kinatured iti mannakiriri? Mabalin nga adda dagiti padas nga ibinglay dagiti miembro ti klase nga isuda, wenno maysa a tao nga am-ammoda, ket situtured a nangsalaknib wenno nangipaneknek maipapan ti ebanghelio.

Dagiti Nainayon a Resources

Ti pannakaawag ti maysa a miembro ti Sangapulo-ket-dua.

Imbinglay ni Gordon B. Hinckley dagiti sumaganad a nalawag a pannakaammo ken pannakaawat [insights] maipapan iti proseso ti panangawag iti maysa a baro nga Apostol: “Naidumduma ti proseso iti simbaan ti Apo. Awan ti panagkalikagum para iti saad, awan ti panagmanipula para iti posision, awan ti panagkampania tapno mangitandudo kadagiti nasayaat a kababalin ti asino man. Pagdiligen ti wagas ti Apo ken ti wagas ti lubong. Naulimek ti wagas ti Apo, daytoy ti wagas ti talna, awan ti adu nga atension wenno panaggastos iti kuarta. Awanan daytoy iti panagimbubukod wenno parammag wenno ambision. Iti babaen ti plano ti Apo, dagiti addaan pagrebbengan a mangpili kadagiti opisial ket maiwanwan babaen ti maysa a napateg a saludsod: ‘Asino ti kukua koma ti Apo?’ Adda naulimek ken napanunotan a deliberasion. Ket kasapulan ti adu a panagkararag tapno maawat ti pammatalged ti Espiritu Santo nga umisu ti pili” (“God Is at the Helm,” Ensign, Mayo 1994, 53).

Panangpadur-as iti Panangisurotayo

Awisen dagiti agad-adal nga agtignay. Paregtaennatayo a masansan ti Espiritu Santo nga agtignay iti no ania ti masursurotayo (kitaen iti Dagiti Aramid 2:37). Idi napasamak daytoy kadagiti tao a sursuruan ni Pedro, inawisna ida (kitaen iti Dagiti Aramid 2:38). Ibilangmo no kasano a masurotmo ti pagwadan ni Pedro.