Kumbersion iti dalan nga agpa-Damasco, ni Michelangelo Merisi da Caravaggio

Hulio 10–16

Dagiti Aramid 6–9

“Ania ti Rebbeng nga Ipaaramidmo Kaniak?”

Adalem ti Dagiti Aramid 6–9 ken isuratmo dagiti impresionmo. Daytoyto ti mangtulong kenka nga umawat iti paltiing maipapan iti no kasano a matulongan nga umasideg nga ad-adda dagiti miembro ti klase ken ni Jesucristo babaen ti panangadalda kadagitoy a kapitulo.

Yawis ti Panagbibinninglay

Iti pisarra, isuratmo ti nagnagan ti sumagmamano a tao a nadakamat iti Dagiti Aramid 6–9, kas kada Esteban, Saul, Felipe, Ananias, Pedro, ken Tabita wenno Dorcas. Awisen ken paibinglay iti sumagmamano a miembro ti klase no ania ti nasursuroda manipud iti maysa kadagitoy a tao iti panagadalda itoy a lawas.

Isuro ti Doktrina

Dagiti Aramid 7

Ti panangsupring iti Espiritu Santo ket makaiturong iti panangumsi iti Mangisalakan ken dagiti katulonganna.

• Mabalin a rugian ti panaglilinnawag maipapan iti padas ni Esteban babaen ti panangawis kadagiti miembro ti klase a mangrebyu kadagiti balikas ni Esteban iti Dagiti Aramid 7:37–53. Ania dagiti patigmaan kadagiti balikas ni Esteban kadatayo ita? Mabalinmo ti mangipamaysa iti palawag ni Esteban iti Dagiti Aramid 7:51. Ania ti kaipapanan ti “panangsupring ti Espiritu Santo”? Tapno maawatan a nasaysayaat dagitoy a balikas, mabalin a paglilinnawagan dagiti miembro ti klase iti maysa wenno ad-adu pay kadagitoy a binatog: 2 Nephi 28:3–6; 33:1–2; Mosiah 2:36–37; Alma 10:5–6; and Alma 34:37–38. Apay a no dadduma “supringentayo ti Espiritu Santo”? Ania ti maaramidtayo tapno mailasintayo a nasaysayaat ken masurottayo dagiti parikna ti Espiritu Santo?

Dagiti Aramid 8:9–24

Nasken nga agbalin dagiti puspusotayo a “nalinteg iti imatang ti Dios.”

• Tapno adalen daytoy a pakaammuan a kas maysa a klase, mabalinmo nga isurat iti pisarra daytoy a salusod Asino ni Simon? Ania ti kayatna? ken Kasano a nagun-odna daytoy? Mangdutok iti tunggal miembro ti klase a mangbasa iti Dagiti Aramid 8:9–24, a mangsapsapul kadagiti sungbat kadagitoy a saludsod. Ania a kinapudno ti saan pay a naawatan ni Simon? Ania ti masursurotayo manipud iti padas ni Simon? Kasano a maaramidtayo a pudno dagiti puspusotayo a “nalinteg iti imatang ti Dios”? (bersikulo 21).

• Bayat iti bukodda a panagadal, mabalin a naisurat dagiti sumagmamano a miembro ti klase dagiti kababalin da Esteban ken Felipe a saan a nakita ni Simon (kitaen iti ti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia). No kasta, mabalinmo nga awisen ida a mangibinglay no ania ti nasarakanda. Mabalin met nga ibinglay dagiti miembro ti klase dagiti dadduma pay a pagarigan manipud iti Dagiti Aramid 6–9 kadagiti tao a napudno ti pusoda iti Dios, kas kada Felipe ken ti lalaki a taga Etiopia (kitaen iti Dagiti Aramid 8:26–40), ni Saul (kitaen iti Dagiti Aramid 9:1–22), ken ni Tabita (kitaen iti Dagiti Aramid 9:36–39).

  

  Tabita Bumangonka, ni Sandy Freckleton Gagon

Dagiti Aramid 8:26–39

Tulongannatayonto ti Espiritu Santo a mangiturong kadagiti dadduma ken ni Jesucristo.

• Tapno matulongan a mangipaawat kadagiti miembro ti klase no kasano a maiwanwanda dagiti dadduma ken ni Jesucristo (kitaen iti Dagiti Aramid 8:31), mabalinmo nga awisen ti dua a miembro ti klase nga agsinnangoda nga agtugaw ket basaenda ti dayalogo ni Pedro ken ti tao manipud iti Etiopia iti Dagiti Aramid 8:26–39. Mabalin a basaen ti maikatlo a miembro ti klase dagiti paset nga awan iti dayalogo. Ania ti masursurotayo manipud iti pagwadan ni Felipe maipapan iti panangisuro iti ebanghelio kadagiti dadduma?

• Tapno masukisok dagiti kabaruanan a pagarigan iti daytoy a pakaammuan iti Dagiti Aramid 8:26–39, mabalin nga ibinglay dagiti miembro ti klase dagiti padasda iti panangibinglay iti ebanghelio wenno iti panagkamengda iti Simbaan. Kasano a tinulongan ida ti Espiritu Santo? Kasano a nagtignay ti maysa a tao a kas mangiturong kadakuada? Awisem dagiti miembro ti klase a mangutob no asino ti mabalin nga iturongda iti ebanghelio.

Dagiti Aramid 9

No agtulnogtayo iti pagayatan ti Apo, makapagbalintayonto a ramit kadagiti imana.

• Masursuro dagiti miembro ti klase dagiti nabileg a kinapudno maipapan iti bukodda a kumbersion babaen ti panangadal iti padas ni Saul, agraman ti kinapudno a makapagbabawi ken makapagbalbaliw ti tunggal maysa no agtallugodda. Mabalinmo a paidasig kadagiti miembro ti klase ti padas ni Saul kadagiti padas ni Alma (kitaen iti Mosiah 17:1–4; 18; 26:15–21) ken kadagiti Anti-Nephi-Lehi (kitaen iti Alma 24:7–12). Ania ti inaramid ti Apo tapno matulonganna nga agbalin a napasurot dagitoy a tao? Kasano nga impakitada a sidadaanda nga agbalbaliw? Ania a mensahe ti masarakantayo para iti bukodtayo a biag manipud kadagitoy a pakaammuan?

• Tapno mairugi ti panaglilinnawag maipapan iti padas ni Saul, mabalinmo nga awisen ti sumagmamano a miembro ti klase a nakasagana a mangibinglay no ania ti masursuroda manipud iti tunggal benneg iti mensahe ni Presidente Dieter F. Uchtdorf iti “Waiting on the Road to Damascus” (Liahona, Mayo 2011, 70–77). Kasano a no dadduma aguraytayo iti bukodtayo a dalan nga agturong ti Damasco? Segun ken ni Presidente Uchtdorf, ania ti makatulong kadatayo a nasaysayaat a dumngeg iti timek ti Dios? Mabalinmo nga ibilang ti panangipabuya ti video a “The Road to Damascus” (ChurchofJesusChrist.org). Nalabit a mabalin nga ibinglay dagiti miembro ti klase dagiti padasda iti panagkalikagum ken panangsurot iti pagayatan ti Dios.

Panangpadur-as iti Panangisurotayo

Paneknekan ti maipapan ken ni Jesucristo. Kas maysa a mannursuro, matulongam dagiti miembro ti klase a mangbukel iti pammatida iti Mangisalakan, kas met laeng iti inaramid ni Felipe iti tao a taga Etiopia babaen ti panangisurona kenkuana manipud iti Isaias (kitaen iti Dagiti Aramid 8:26–37). No aramidem daytoy, masapul nga addaanka kadagiti padas a makapabileg iti pammati iti nasantuan a kasuratan. Mabalin a nabileg a puersa ti pammaneknek nga iburaymo iti panangtulongmo kadagiti miembro ti klase a mangpatibker kadagiti pammaneknekda ken ni Jesucristo.