Ni Jesus a makisarsarita ken Pedro iti igid ti baybay

Pakanem Ti Karnerok, ni Kamille Corry

Hunio 26–Hulio 2

Mateo 28; Marcos 16; Lucas 24; Juan 20–21

“Nagungaren”

Sakbay ti panangsukisok kadagiti kapanunotan iti panangisuro iti daytoy a balabala, basaem ti Mateo 28; Marcos 16; Lucas 24; ken Juan 20–21, ket utobem no kasano a mausar dagitoy a kapitulo a pangpapigsa iti pammati dagiti sursuruam.

icon iti panagbibinninglay

Yawis ti Panagbibinninglay

Tapno matulongan dagiti miembro ti klase a mangibinglay iti no ania ti nasursuroda iti bukod ken sangapamiliaan a panagadalda, paisurat kadakuada ti maysa a kinapudno manipud iti naituding a basaen iti daytoy a lawas a mariknada a nasken a maibinglay iti “isu amin a lubong” (kitaen iti Marcos 16:15). Iti gibus ti klase, saludsodem kadakuada no nasarakanda dagiti ania man a mainayon a kinapudno a kayatda nga ibinglay.

icon iti panangisuro

Isuro ti Doktrina

Mateo 28; Marcos 16; Lucas 24; Juan 20

Gapu ta nagungar ni Jesus, agungartayonto met.

• Mabalinmo nga ikkan ti sumagmamano a minuto dagiti miembro ti klase a mangrebyu ti naituding a basaenda iti daytoy a lawas ken ti “Panagungar” iti Pangiwanwan iti Nasantuan a Kasuratan ket isuratda dagiti kinapudno a nasursuroda maipapan iti Panagungar. Paibinglay iti sumagmamano kadakuada no ania ti insuratda, ket allukoyem dagiti miembro ti klase a mangingato kadagiti imada no mangngeganda ti maysa a tao a mangibinglay iti kinapudno a kapada ti insuratda. Apay a napateg kadatayo dagitoy a kinapudno? Kasano a maimpluensiaanda dagiti relasiontayo? Kasano a maimpluensiaanda dagiti pilitayo?

Lucas 24:13–35

Maawistayo ti Mangisalakan nga “agtalinaed kadatayo.”

• Tapno matulongan dagiti miembro ti klase a mangkita kadagiti pagnanaigan iti nagbaetan dagiti padasda ken ti padas dagiti disipulo iti kalsada nga agturong iti Emaus, mangidrowing iti maysa a kalsada iti pisarra, ket awisem dagiti miembro ti klase a mangisurat kadagiti detalye manipud iti pakaammuan iti Lucas 24:13–35 iti maysa pay a bangir ti kalsada. Kalpasanna, iti sabali a bangir ti kalsada, mabalinda nga isurat dagiti agpapada a makitada iti bukodda a padpadas kas pasurot ni Jesucristo. Kas pagarigan, mabalinda nga isurat ti “Dagiti matada nakullaapanda” (Lucas 24:16) iti maysa a paset ti kalsada ken No dadduma ditayo mailasin ti impluensia ti Apo iti biagtayo iti bangirna. Kasano a maawistayo ti Mangisalakan nga agtalinaed kadatayo?

Ti panagparang ti nagungar a Cristo kadagiti Apostol

Insuro ni Jesus ken ni Tomas, “Saanka a di mamati, no di ket mamatika” (Juan 20:27).

Juan 20:19–29

“Nagasat dagiti saan a nakakita, ket namatida.”

• Ti klasem iti Sunday School ket mabalin a maysa a lugar para kadagiti miembro ti klase tapno agpipinnapigsa iti pammati ti tunggal maysa kadagiti banag a saanda a makita. Nalabit a mairugim babaen ti panangidawatmo iti maysa a tao a manggupgop iti padas ni Tomas iti Juan 20:19–29. Mabalinmo pay nga ipabuya ti video a “Blessed Are They That Have Not Seen, and Yet Have Believed” (ChurchofJesusChrist.org). Mabalin nga ilista dagiti miembro ti klase iti pisarra ti sumagmamano a banag nga indawat ti Dios a patientayo uray ditay makita. Kalpasanna mabalinmo nga awisen ida a mangibinglay kadagiti padasda a nangpapigsa iti pammaneknekda kadagiti banag ken bendision a simmangbay kadakuada bayat ti panangipakitada iti pammatida.

Juan 21:1–17

Awisennatayo ti Mangisalakan a mangpakan kadagiti karnerona.

• Ania ti mabalin a makatulong kadagiti miembro ti klase nga umawat iti awis ti Mangisalakan a “mangpakan iti karnero[na]”? Mabalinmo nga irugi babaen ti panangawis kadakuada a mangbasa iti Juan 21:15–17 a siuulimek, a mangsukat iti nagan ni Simon iti bukodda a nagan ken “dagiti korderok” ken “dagiti karnerok” iti nagnagan dagiti tao a mariknada a kayat ti Apo a pagserbianda—kas pagarigan, dagiti tao a pagministerioanda, dagiti kaarruba, wenno tattao nga am-ammoda iti trabaho wenno eskuela. Kalpasan ti sumagmamano a minuto, mabalin nga ibinglay dagiti miembro ti klase dagiti impresion nga adda kadakuada. Ania ti masursurotayo manipud kadagiti aramid ti Mangisalakan iti Juan 21:4–13? Ania ti maaramidtayo a mangpakan kadagiti kordero ken karnero ti Mangisalakan? Ti palawag ni Elder Gary E. Stevenson iti “Dagiti Nainayon a Resources” ket mabalin a makatulong a mangsungbat iti daytoy a saludsod.

resources icon

Dagiti Nainayon a Resources

Kasano a mabalintayo a “pakanen dagiti karnero[na]?

Inlawlawag ni Elder Gary E. Stevenson no kasano a matungpaltayo ti bilin ti Apo a mangpakan kadagiti karnerona:

“Asino ti maysa a pastor? Ti tunggal lalaki, babai ken ubing iti pagarian ti Dios ket maysa a pastor. Saan a kasapulan ti maysa a takem (calling). Manipud iti kanito a nabuniagantayo, addaantayon iti annongen iti daytoy nga aramid. Asitgantayo dagiti sabali iti nagan ti ayat gapu ta daytoy ti bilin ti Mangisalakan nga aramidentayo. No agsagaba a mainaig iti temporal ken espiritual wenno dagiti kaarrubatayo, asitgantayo ida tapno tulongan ida. Siaayattayo a makipagbaklay iti imet ti tunggal maysa, tapno lumag-anda. Siaayattayo a makipagladingit kadagiti agladladingit. Manglinglingaytayo kadagiti makasapul iti pannakalinglingay [kitaen iti Mosiah 18:8–9]. Siaayat a mangnamnama ti Apo nga aramidentayo dagitoy. Ket dumtengto ti aldaw nga agsungbattayo iti panangaywantayo iti arbanna [kitaen iti Mateo 25:31–46]” (“Shepherding Souls,” Liahona, Nob. 2018, 111).

Panangpadur-as iti Panangisurotayo

Mangilatang iti oras a makaibinglay dagiti agad-adal. “No ibinglay dagiti agad-adal no ania ti nasursuroda, saanda laeng a marikna ti Espiritu ken mapapigsa dagiti bukodda a pammaneknek, no di ketdi maallukoyda pay dagiti miembro ti klase a mangtakuat kadagiti kinapudno para iti bagbagida. … Mangilatang iti oras a pakaibinglayan ti estudiante iti tunggal adalen—iti sumagmamano a gundaway, matakuatam a dagitoy a panaglilinnawag ket ti adalen” (Panangisuro iti Wagas ti Mangisalakan, 30).