Ni Pablo a mangisursuro iti turod

Hulio 24–30

Dagiti Aramid 16–21

“Inawagannatayo ti Apo a Mangikasaba iti Ebanghelio”

Sakbay ti panangkitam iti daytoy a balabala, nainkararagan a basaem ti Dagiti Aramid 16–21 nga adda iti panunotmo dagiti miembro ti klase. Dagiti sumaganad a kapanunotan ti mabalin a mangsuplemento iti pammaregta nga awatem manipud iti Espiritu.

icon iti panagbibinninglay

Yawis ti Panagbibinninglay

Ibilangmo ti panangawis kadagiti miembro ti klase a mangibinglay iti maysa a binatog manipud iti Dagiti Aramid 16–21 a mangipalagip kadakuada iti maysa a padasda iti panangibinglay iti ebanghelio.

icon iti panangisuro

Isuro ti Doktrina

Dagiti Aramid 16–21

Kas miembro iti Simbaan ti Mangisalakan, paneknekantayo Isuna ken ibinglaytayo ti ebangheliona.

• Ti maysa a napateg a mensahe iti Dagiti Aramid 16–21 ket ti kinapateg ti Espiritu Santo iti panangibinglay iti ebanghelio. Kas pagarigan, mabalin a basaen dagiti miembro ti klase no kasano a nakatulong ti Espiritu Santo kada Pablo ken Silas iti Dagiti Aramid 16:6–15. Apay a kasapulantayo ti Espiritu Santo no ibinglaytayo ti ebanghelio? (kitaen iti 2 Nephi 33:1; Doktrina ken Katulagan 33:8–10; 42:14; 100:5–8). Nalabit a makaibinglay dagiti miembro ti klase kadagiti padas idi tinarabay ida ti Espiritu Santo kadagiti panagkagumaanda a mangibinglay iti ebanghelio.

• Kasano a mausar dagiti padas ni Pablo a mangtulong kadagiti miembro ti klase a maaddaan iti tured no matignayda a mangibinglay kadagiti pammaneknekda? Idawatmo iti tunggal miembro ti klase a mangrebyu iti maysa kadagiti sumaganad a pakaammuan: Dagiti Aramid 16:16–34; 17:16–34; 18:1–11. Kiddawem ida a mangibinglay iti nabirokanda a pakakitaan iti kinatured ni Pablo. Ania dagiti kinapudno nga insuro (ken naawatan) ni Pablo a nangted kenkuana iti panagtalek iti mensahena? Apay a saantayo a kayat nga aramiden no dadduma ti mangibinglay iti ebanghelio, ken kasano a matulongannatayo ti Mangisalakan? Allukoyem dagiti miembro ti klase a mangpanunot iti maysa a wagas tapno surotenda ti pagwadan ni Pablo ken iburayda ti pammaneknekda ken ni Cristo nga ad-adda a masansan (ti video “I’ll Go Where You Want Me to Go” [ChurchofJesusChrist.org] ket makatulong).

Dagiti Aramid 17:16–34

Kaputotannatayo ti Dios.

• Iti Turod ti Mars, insuro ni Pablo maipapan iti Nailangitan nga Ama iti maysa a grupo dagiti tao a bassit ti ammoda maipapan iti pudno a kinatao ti Dios. Tapno agsukisok kadagitoy a pannursuro, mabalin a basaen dagiti miembro ti Dagiti Aramid 17:24–31 ket isurat iti pisarra dagiti kinapudno a nasarakanda maipapan iti Nailangitan nga Ama, ti relasiontayo Kenkuana, ken dagiti relasiontayo iti tunggal maysa. Mabalinda ngarud nga ibinglay dagiti padas a nakariknaanda iti kinapudno ti palawag ni Pablo a ti Dios “saan nga adayo iti tunggal maysa kadatayo” (bersikulo 27).

• Bayat nga us-usigenyo a sangkamaysa dagiti bersikulo, ibilang ti panaglilinnawag iti kinapudno a naisuro iti bersikulo 29: “Kaputotannatayo ti Dios.” Mabalinmo nga isurat iti pisarra ti Gapu ta annaknatayo ti Dios, … ken No saantayo nga ammo nga annaknatayo ti Dios, … awisem dagiti miembro ti klase a mangisingasing no kasano a makumpletoda dagitoy a sarita. Kas pagarigan, ania ti isurona kadatayo ti kinapudno nga annaknatayo ti Dios? maipapan iti bagbagitayo ken ti wagas a nasken a panangtratotayo iti tunggal maysa? Kasano a maiduma ti biagtayo no saantayo nga ammo ti maipapan iti pudno a pakainaigantayo iti Dios? Ania ti mainayon ti palawag ni Elder Dallin H. Oaks iti “Dagiti Nainayon a Resources” iti daytoy a panaglilinnawag.

  maladaga a maub-ubba

  Anak ti Dios ti tunggal maysa kadatayo.

resources icon

Dagiti Nainayon a Resources

Annaknatayo amin ti Dios.

“Ti Kaamaan: Maysa a Waragawag ti Lubong,” ket mangibinglay kadagiti agnanayon a kinapudno maipapan iti pakainaigantayo iti Dios: “Amin a tattao—lalaki ken babai—naparsua a kalanglanga ti Dios. Tunggal maysa ket maipatpateg nga espiritu nga anak a lalaki wenno babai dagiti nailangitan a nagannak, ket, iti kasta, tunggal maysa ket addaan iti nadiosan a kababalin ken pagtungpalan” (ChurchofJesusChrist.org).

Insao ni Presidente Dallin H. Oaks maipapan iti kinapateg ti panangkita iti bagbagitayo nga umuna ken kangrunaan kas naespirituan nga annak ti Dios:

“Agannadkayo no kasano ti panangiladawanyo iti bagiyo. Saanyo nga iladawan wenno ilawlawag ti bagiyo babaen ti sumagmamano a saan nga agbayag a kababalin. Ti maysa laeng a kababalin a nasken a mangiladawan kadatayo ket datayo ti anak a lalaki wenno anak a babai ti Dios. Rimbawan dayta a kinapudno ti amin a dadduma pay a kababalin, agraman ti puli, trabaho, pisikal nga ugali, dayaw, wenno uray pay ti pakikappengan a relihion. …

“Adda kadatayo ti kinawayatayo nga agpili, ken mabalintayo a pilien ti ania man a kababalin a mangilawlawag ti maipapan kadatayo. Ngem masapul a maammuantayo a no pilientayo nga ilawlawag ti maipapan iti bagbagitayo wenno mangidatag iti bagbagitayo babaen ti sumagmamano a kababalin a temporario wenno awan pategna iti agnanayon a balikas, ditayo mayunay-unay no ania ti kapatgan maipapan kadatayo, ket masobraantayo a mangyunay-unay nga ibaga no ania ti saan a napateg. Daytoy ti makaiturong kadatayo iti biddut a dana ket mangtubeng iti agnanayon a panagdur-astayo” (“Be Wise” [Brigham Young University–Idaho devotional, Nob. 7, 2006], byui.edu).

Panangpadur-as iti Panangisurotayo

Awisem dagiti agtutubo nga agbalin a paset ti lessonmo. No mangisuroka kadagiti agtutubo, laglagipem a masansan a kabaelanda a maawatan dagiti banag a mapadpadasan dagiti kapatadada. No mangiburay iti pammaneknek wenno mangisuro iti doktrina iti maysa nga agtutubo, mabalin a masagid ti dadduma pay nga agtutubo iti wagas a dimo mabalin a matulad. Ikkam dagiti agtutubo kadagiti gundaway a mangisuro iti tunggal maysa. (Kitaen iti Panangisuro iti Wagas ti Mangisalakan, 28.)