Hulio 31–Agosto 6

Dagiti Aramid 22–28

“Maysa a Ministro ken Saksi”

Basaem ti Dagiti Aramid 22–28 nga addaan iti kararag iti pusom tapno paregtaennakanto ti Espiritu Santo nga ammuen no ania ti ipamaysam wenno ipokus a mangtulongto kadagiti miembro ti klasem. Isuratmo dagiti ania man a kapanunotan nga umay iti panunotmo; dagitoy ket mabalin a rugi ti planom iti panangisuro.

Yawis ti Panagbibinninglay

Kiddawem kadagiti miembro ti klase a mangisurat kadagiti reperensia ti nasantuan a kasuratan manipud iti Dagiti Aramid 22–28 a nakaawisan ti riknada iti daytoy a lawas. Ummongem dagiti sungbatda ken basaen dagiti sumagmamano kadagiti bersikulo nga aggigiddan. Awisem ti sumagmamano kadagiti miembro ti klase nga ibinglayda no apay a napateg kadakuada dagitoy a bersikulo.

Isuro ti Doktrina

Dagiti Aramid 22:1–21; 26:1–29

Ti pammaneknek ket maysa a palawag iti kinapudno a maibatay iti bukod a pannakaammo wenno pammati.

• Ti pammaneknek ni Pablo kada Festo ken Ari Agrippa ket mabalin a maysa a gundaway tapno paglilinnawagan no ania ti kaipapanan ti mangiburay iti pammaneknek. Mabalinmo a kiddawen dagiti miembro ti klase a mangrebyu iti Dagiti Aramid 22:1–21 wenno 26:1–29 Ania ti masursurotayo manipud iti pagwadan ni Pablo maipapan iti panangiburay iti pammaneknek? Ania dagiti mainayon a pagbatayan maipapan iti panangiburay iti pammaneknek a masursurotayo manipud iti palawag ni Presidente M. Russell Ballard iti “Dagiti Nainayon a Resources”? Ti panangkanta wenno panangtukar ti himno a “Testimony” (Hymns, num. 137) ket mabalin a makaawis iti Espiritu iti panaglilinnawagyo.

• Nupay saan a nagkalkalikagum a magun-od ni Pablo ti naespirituan a panagsaksi nga inawatna iti dalan nga agturong iti Damasco, binubosna ti nabati pay a biagna a nagtartrabaho a mangpatalinaed ken mangsalaknib iti pammaneknekna (kitaen iti Dagiti Aramid 22:10, 14–16; 26:19). Makatulong ti pagwadan ni Pablo a mangipaawat iti klasem nga agkasapulan ti maysa a pammaneknek iti aramid ken sakripisio. Tapno mangirugi iti panaglilinnawag maipapan iti daytoy, nalabit a mabalin nga iladawan ti maysa a miembro ti klase ti panagkagumaanna nga agbalin a nalaing a musikero, artista wenno atleta. Kasano a ti panangpadur-as iti kasta a paglaingan ket maipada iti pananggun-od ken panangpapigsa iti maysa a pammaneknek? Ania dagiti panagkagumaan a nasken nga aramidentayo a manggun-od ken mangpapigsa iti maysa a pammaneknek? (kitaen pay iti Alma 5:46).

Dagiti Aramid 26:9–23

Addaantayo iti pagrebbengan nga agserbi kadagiti dadduma.

• Inawagan ti Apo ni Pablo nga agbalin a “maysa a ministro” (Dagiti Aramid 26:16), ngem ania ti kayat a sawen daytoy a balikas? Tapno matulongan dagiti miembro ti klase nga agsukisok no kasano a makapagministroda kadagiti dadduma, adda man wenno awan ti naituding nga aramiden, mabalinmo nga isurat iti pisarra ti maysa a saludsod kas iti Ania ti kayat a sawen ti agministro? Awisem dagiti miembro ti klase a mangsarak kadagiti sungbat kadagitoy sumaganad a resources: Mateo 20:25–28; Dagiti Aramid 26:16–18; 3 Nephi 18:29–32; Jean B. Bingham, “Ministering as the Savior Does,” Liahona, Mayo 2018, 104–7. Bayat ti panangibinglayda iti no ania ti nasarakanda, allukoyen ida a paglilinnawagan dagiti wagas a mabalintayo a makapagserbi kadagiti dadduma, agraman kadagiti takemtayo iti Simbaan. Mabalinyo pay a buyaen ti video “The Miracle of the Roof” (ChurchofJesusChrist.org).

Dagiti Aramid 27

No dumngegtayo kadagiti propeta ti Apo, tarabayendatayo ket salaknibandatayonto manipud iti dakes.

• Awisem dagiti miembro ti klase a pagsasaritan ti maipapan iti sungbat ti kapitan idi impadto ni Pablo a ti barko ket mangyegto iti rigrigat ken “adu a pagdaksan” ken adunto a biag ti mapukaw (kitaen iti Dagiti Aramid 27:10–11). Apay a kasdiay ti sungbat ti kapitan? Mabalin a mangibinglay dagiti miembro ti klase no ania ti mabalin a naisaoda iti kapitan tapno matulongan isuna a maaddaan iti pammati iti padto ni Pablo. Ania dagiti dadduma nga adalen a masursurotayo manipud iti Dagiti Aramid 27 maipapan iti panangsurot kadagiti katulongan ti Apo? Mabalin nga addaan iti padpadas dagiti sumagmamano a miembro ti klase idi sinurotda ti panangiturong dagiti propeta uray no maiduma daytoy kadagiti kapanunotan ti tattao iti aglawlawda. Awisem ti sumagmamano a miembro ti klase a mangibinglay kadagiti padasda.

Dagiti Nainayon a Resources 

Panangiburay iti pammaneknek.

Nagsarita ni Presidente M. Russell Ballard maipapan iti pammaneknek ni Pablo iti sango ni Ari Agrippa ken insurona no ania ti kayat a sawen kadatayo ti mangiburay iti pammaneknek:

“Dagiti mitingtayo iti panagpaneknek ket masapul nga ad-adda a naisentro iti Mangisalakan, dagiti doktrina ti ebanghelio, dagiti bendision ti Pannakaisubli, ken dagiti pannursuro dagiti nasantuan a kasuratan. Nasken a sukatantayo dagiti estoria, padas iti panangbiahe, ken panangisuro iti natarnaw a pammaneknek. Dagitay napagtalkan nga agsarita ken mangisuro kadagiti mitingtayo ket kasapulan nga aramidenda daytoy iti nadoktrinaan a bileg nga agpadanto a mangngeg ken marikna, a mangitagtag-ay kadagiti espiritu ken mangpadpadur-as kadagiti taotayo. …

“… Idinto a kanayon a nasayaat ti mangyebkas iti ayat ken panagyaman, saan a mangparnuay iti kasta a panangipeksa iti kita ti pammaneknek a mangparegtanto iti pammati iti biag dagiti dadduma. Ti mangiburay iti pammaneknek ket ‘mamaneknek babaen ti bileg ti Espiritu Santo; mangaramid iti napasnek a palawag iti kinapudno a maibatay iti bukod a pannakaammo wenno pammati’ [Pangiwanwan iti Nasantuan a Kasuratan, “Paneknekan,” scriptures.ChurchofJesusChrist.org]. Ti nalawag a palawag iti kinapudno ket mangaramid iti pagdumaan kadagiti biag dagiti tao. Dayta ti mangbalbaliw iti puspuso. Dayta ti maipatalged ti Espiritu Santo iti puspuso dagiti annak ti Dios” (“Pure Testimony,” Liahona, Nob. 2004, 41).

Panangpadur-as iti Panangisurotayo

Agsagana iti nasapsapa. Kabayatan ti panangutobmo no kasano a bendisionanto dagiti pagbatayan ti ebanghelio nga isursurom dagiti miembro ti klasem, umayto dagiti ideya ken impresion iti unos ti inaldaw a panagbiagmo—kabayatan ti panagbiahem a mapan iti trabahom, panangaramidmo kadagiti trabaho iti balay, wenno pannakipulapolmo iti kapamilia wenno gagayyem. Saanmo a panunoten ti naespirituan a panagsagana a kas maysa a banag a pagbubosam iti oras no di ketdi kas maysa a banag a kanayonmo nga ar-aramiden” (Panangisuro iti Wagas ti Mangisalakan, 12).