“Agosto 14–20. Taga Roma 7–16: ‘Abakem ti Dakes gapu iti Naimbag,’” Umaykayo, Sumurot Kaniak—Para iti Sunday School: Baro a Tulag 2023 (2022)
“Agosto 14–20. Taga Roma 7–16,” Umaykayo, Sumurot Kaniak—Para iti Sunday School: 2023
Agosto 14–20
Taga-Roma 7–16
“Abakem ti Dakes Gapu iti Naimbag”
Basaem ti Taga Roma 7–16, ken isuratmo dagiti impresion a maawatmo maipapan no kasano a makatulong kadagiti miembro ti klase a makasursuro manipud kadagiti nasantuan a kasuratan. Kabayatan nga ut-utobem dagiti panirigam, mabalin nga agtunda dagitoy kadagiti napnuan iti kaipapanan nga aktibidad.
Yawis ti Panagbibinninglay
Ibilang ti panangbasa iti Taga Roma 10:17 ken 15:4 ket dawatem nga iburay dagiti miembro ti klase dagiti nasantuan a kasuratan iti Taga Roma 7–16 a nangpatibker iti pammatida ken ni Jesucristo wenno ti nangted kadakuada iti namnama.
Isuro ti Doktrina
Makapagbalintayo a “makipagtawid ken Cristo.”
-
Kas dagiti Santo iti Ud-udina nga Aldaw, mamatikami a dagiti ragup dagiti balikas a kas “agtawid ti Dios” ken “makipagtawid ken ni Cristo” kayatna a sawen nga iti tulong ni Jesucristo, makapagbalintayo a kas iti Nailangitan nga Ama ken umawat iti amin nga adda Kenkuana (Taga Roma 8:17; kitaen met iti Doktrina ken Katulagan 132:20–21). Tapno matulongam dagiti miembro ti klase a mangkita no kasano a naisuro daytoy a doktrina iti intero a nasantuan a kasuratan, mabalinmo nga awisen ida nga agbukel iti kada paris wenno iti babassit a grupo ken adalen ti sumagmamano kadagiti nasantuan a kasuratan a nailista iti “Dagiti Nainayon a Resources.” Kalpasanna mabalin nga ibinglay dagiti miembro ti klase no ania ti nasursuroda ken paglilinnawaganda no apay a napateg unay daytoy a doktrina.
-
Ti analohia nga inted ni Presidente Dallin H. Oaks iti “Additional Resources” ket makatulong kadagiti miembro ti klase a paglilinnawaganda no kasano a makapagsaganatayo tapno agbalin nga “agtawid iti Dios” (Taga Roma 8:17). Ania dagiti sumagmamano kadagiti “paglintegan ken pagbatayan” a dinakamat ni Presidente Oaks? Ania ti pakaidumaan a maaramid daytoy iti panagbiagtayo a mangammo a makapagbalintayo nga “agtawid iti Dios, ken makipagtawid ken Cristo”? (Taga Roma 8:17).
“Asino ti mangisinanto kadatayo iti ayat ni Cristo?”
-
Ti sangkamaysa a panaglilinnawag iti Taga Roma 8 ket mabalin a mangted iti gundaway a mangtulong kadagiti miembro ti klase a mangrikna iti ayat ti Mangisalakan. Ibilang ti panangi-display iti ladawan ni Jesucristo (kitaen iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia) bayat ti panangbasayo iti Taga Roma 8:18, 28, 31–39 kas maysa a klase. Mabalinmo nga awisen dagiti miembro ti klase a mangiburay iti ania man a kapanunotan wenno riknada kalpasan a mabasada dagitoy a bersikulo. Mabalin a sumagmamano a miembro ti klase ti mangibinglay iti no kasano a nagun-odda ti pammaneknek maipapan kadagiti kinapudno a nasarakanda kadagitoy a bersikulo.
Naipatungpal amin a bilin ti Dios iti bilin nga agayat.
-
Tapno makatulong kadagiti miembro ti klase a mangkita no kasano nga amin a bilin ket “ababa a naipaawat iti” bilin nga ayatem ti kaarrubam (Taga Roma 13:9), awisem ida a mangilista iti pisarra ti amin a bilin a mapanunotda. Aggigiddankayo a mangbasa iti Taga Roma 13:8–10 ken Mateo 22:36–40, ket paglilinnawaganyo a kas maysa a klase ti pagnaigan ti managayat a Dios ken iti padatayo a tao ken ti panagtungpal iti tunggal maysa kadagiti bilin a nailista iti pisarra. Kasano a balbaliwan daytoy a kinapudno ti wagas a panagpanunottayo maipapan kadagiti bilin ken panagtungpal? Kas pagarigan, ania ti isingasingna daytoy a kinapudno maipapan iti panggep dagiti bilin?
“Ditay ngarud … agiinnukomen iti maysa ken maysa.”
-
Tapno mangted iti sumagmamano a konteksto iti Taga Roma 14mabalinmo a dakamaten dagiti sumagmamano a Santo iti Roma a nagsisinnupiat maipapan iti kaugalian a mainaig iti kultura, kas pagarigan ti pannangan ken panangrambak kadagiti piesta. Ania dagiti maipada a situasion a pakaipasanguantayo iti agdama? Nalabit a mabalin a basaen dagiti miembro ti klase ti Taga Roma 14 ket mangted iti maysa a binatog a pakagupgopan ti balakad ni Pablo. Ania a balakad ti maibinglaytayo iti tunggal maysa maipapan iti no kasano a liklikan ti panagbalin a managhusga? Nalabit a mabalin a sapulen dagiti miembro ti klase dagiti kapanunotan iti mensahe ni Presidente Dieter F. Uchtdorf ti “The Merciful Obtain Mercy,” Liahona, Mayo 2012, 70–77.
Dagiti Nainayon a Resources
Panangawat iti “amin nga adda [iti] Ama” (Doktrina ken Katulagan 84:38).
-
“Becoming Like God” (Gospel Topics, topics.ChurchofJesusChrist.org)
Insalaysay ni Presidente Dallin H. Oaks ti sumaganad a pangngarig:
“Ammo ti nabaknang nga ama a no nasken nga isu ti mangipaay iti kinabaknang iti maysa nga anak a saanna pay a napatan-ay iti kasapulan a sirib ken kinamanakem, nalabit a madadael ti tawid. Kinuna ti ama iti anakna:
“‘Amin nga adda kaniak tarigagayak nga ited kenka—saan laeng ti kinabaknangko, no di ketdi pay ti posision ken saadko kadagiti tao. Ta ti adda kaniak maitedko a silalaka kenka, ngem dayta kas iti siak nasken a gun-odem para iti bagim. Maikarikanto iti tawidmo babaen ti panangsursurom iti nasursurok ken babaen ti panagbiagmo kas iti panagbiagko. Itdekto kenka dagiti paglintegan ken pagbatayan a nakagun-odak iti sirib ken kinamanakem. Surotem ti pagwadak, a mangparparmek kas iti panangparmekko, ket agbalinkanto a kas kaniak, ket kukuamto ti amin nga adda kaniak’” (“The Challenge to Become,” Ensign, Nob. 2000, 32).
Panangpadur-as iti Panangisurotayo
Agsapul kadagiti resources a mangsuporta kadagiti pagbatayan. Mainayon kadagiti kapanunotan iti panangisuro iti daytoy a balabala, mabalinmo a balbaliwan dagiti aktibidad manipud iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia tapno usaren iti klasem. (Kitaen met iti Panangisuro iti Wagas ti Mangisalakan, 17–18.)