Corinto, Southern Greece, ti Forum ken Civic Center,, impinta ni Balage Balogh/www.ArchaeologyIllustrated.com

Agosto 21–27

1 Taga Corinto 1–7

“Naan-anay Koma ti Panagtitimpuyogyo”

Insuro ni Elder Jeffrey R. Holland a kaaduanna a tao ti “umay [iti simbaan] nga agkalkalikagum a manggun-od iti naespirituan a padas” (“A Teacher Come from God,” Ensign, Mayo 1998, 26). Bayat ti panangbasam iti 1 Taga Corinto 1–7, sikakararag nga utobem no ania ti maaramidmo tapno makatulong a mangparnuay iti naespirituan a padas iti klasem.

Yawis ti Panagbibinninglay

Ibilangmo ti panangawis kadagiti miembro ti klase a mangisurat no kasano nga inyakemda no ania ti nasursuroda manipud kadagiti nasantuan a kasuratan. Idawat kadagiti sumagmamano a miembro ti klase nga ibinglayda ti no ania ti insuratda.

Isuro ti Doktrina

1 Taga Corint 1:10–17; 3

Ikagumaan dagiti miembro ti Simbaan ni Cristo nga agkaykaysa.

• Ti panangilawlawag iti umuna a sumagmamano a kapitulo ti 1 Taga Corinto ket mabalin a maysa a gundaway a mangipasdek iti dakdakkel a panagkaykaysa kadagiti miembro ti ward. Mabalinmo nga irugi babaen ti panangidawat kadagiti miembro ti klase a pagsasaritaanda ti maipapan iti maysa a club, grupo, team wenno dadduma pay nga organisasion a nakaibilanganda nga addaan iti dakkel a panagkaykaysa. Apay a narikna daytoy a grupo ti panagkaykaysada unay? Kalpasanna mabalinmo ti agsukisok iti sumagmamano a pannursuro ni Pablo maipapan iti panagkaykaysa iti 1 Taga Corinto 1:10–13; 3:1–11. Ania ti isuro dagitoy a bersikulo, a karagpin dagiti padastayo, maipapan iti no ania ti makatulong a mangparnuay iti panagkaykaysa ken no ania ti mangpapeggad iti daytoy? Ania dagiti sakripisio nga ar-aramidentayo tapno magun-od ti panagkaykaysa? Ania dagiti bendision nga umay kadagiti nagkaykaysa? Kitaen met ti analohia ni Sister Sharon Eubank iti “Dagiti Nainayon a Resources.”

• Aramaten ni Pablo ti ladawan ti maysa a pasdek a mangyallukoy iti panagkaykaysa iti 1 Taga Corinto 3:9–17. Kasano a makatulong daytoy nga analohia iti klasem a makaawat a nasaysayaat iti panagkaykaysa? Kas pagarigan, kalpasan ti aggigiddan a panangbasada kadagitoy a bersikulo, saggaysaem nga ikkan dagiti miembro ti klase iti bloke ket palugodam nga agtitinnulongda a mangbukel iti maysa a banag. Iti ania a kaipapanan a datayo ti “bukbuklen ti Dios”? (1 Taga Corinto 3:9). Kasanonatayo a patpatibkeren a saggaysa ti Dios? Ania dagiti bukbuklentayo a sangsangkamaysa kas pada a Sasanto? Ania ti mabalintayo nga aramiden kas nagkaykaysa a ward a ditayo kabaelan nga aramiden kas indibidual?

1 Taga Corinto 1:17–31; 2; 3:18–20

Tapno maipatungpal ti aramid ti Dios, kasapulantayo ti sirib ti Dios.

• Daytoy ti maysa a kapanunotan a makatulong iti klasem nga agpannuray iti Dios: Bingayem dagiti miembro ti klase kadagiti grupo ket kiddawem kadakuada a mangbasa iti 1Taga Corinto 1:17–31; 2; wenno 3:18–20 a mangsuksukisok kadagiti balikas a kas iti sirib ken maag. Kalpasanna mabalin nga ibinglayda kadagiti grupoda no ania ti isuro dagitoy a bersikulo maipapan iti panagbalin a masirib iti aramid ti Apo. Ania dagiti banag maipapan iti ebanghelio a mabalin a kasla minamaag iti sumagmamano a tao? Kasano nga ipakita dagitoy a banag ti sirib ti Dios? Nalabit a mabalin pay nga ibinglay dagiti miembro ti klase dagiti padas a nakapagtalkanda iti sirib ti Dios, imbes nga iti bukodda, tapno ipatungpal ti aramidna.

1 Taga Corinto 6:9–20

Sagrado dagiti pisikal a bagitayo.

• Tapno mangirugi iti panaglilinnawag maipapan kadagitoy a bersikulo, mabalinmo nga isurat iti pisarra dagiti saludsod a kas iti sumaganad: Kasano ti kayat ti Apo iti panangibilangtayo iti bagitayo? Kasano a maigiddiat daytoy iti wagas a kayat ni Satanas a panangipagaruptayo kadagiti bagitayo? Ania ti kayatna a sawen a dagiti bagitayo ti templo ti Espiritu Santo? Awisem dagiti miembro ti klase a mangsarak kadagiti sungbat kadagitoy a saludsod iti 1 Taga Corinto 6:9–20 (kitaen met iti Doktrina ken Katulagan 88:15; Moises 6:8–9).

• Mairaman iti panaglilinnawag maipapan iti kinasagrado dagiti bagitayo iti pagsasaritaan maipapan iti linteg ti kinadalus ti dayaw. Nalabit a mabalinmo a saludsoden kadagiti miembro ti klase no ania ti masursuroda manipud ken ni Pablo—kasta met iti dadduma pay a resources iti Simbaan—makatulong kadakuada a mangilawlawag kadagiti dadduma no apay a napateg ti kinadalus ti dayaw. Mabalin a nairaman dagiti sumagmamano kadagitoy a resources kadagiti nakalista iti “Dagiti Nainayon a Resources.”

Dagiti Nainayon a Resources

“Agbalin dagiti pagsusupadian a pagsayaatan.”

Inladawan ni Sister Sharon Eubank no kasano a matun-oyan dagiti gunglo a gumagaod ti panagkaykaysa.

“Masapul a kontrolen dagiti aggaud ti naiget a wayawayada ket kasta met nga agtalekda iti bukodda a kabaelan. Saan a mangatiw iti lumba dagiti agpapada. Agtunos dagiti nasayaat a grupo—adda maysa a mangidaulo, maysa nga agiggem, maysa a lumaban iti laban, maysa a mangpatalna. Awan ti napatpateg nga aggaud ngem iti sabali, napateg amin iti bilog, ngem no aggigiddanda nga aggaud a nasayaat, masapul nga ibagayda iti kasapulan ken kabaelan ti dadduma—ti bassit ti takiagna ikadakkelna ti panaggaudna, ken ti at-atiddog a takiag, gumaud la basbassit.

“Makapagbalin dagiti pagsusupadian a pagsayaatan imbes a pagdaksan” (“Babaen ti Panagkaykaysa ti Rikna Magun-odtayo ti Bileg ti Dios,” Liahona, Nob. 2020, 56; kitaen iti Daniel James Brown, The Boys in the Boat: Nine Americans and Their Epic Quest for Gold at the 1936 Berlin Olympics [2013], 161, 179).

Dagiti bendision ti kinadalus iti seks.

Jeffrey R. Holland, “Personal Purity,” Ensign, Nob. 1998, 76.

David A. Bednar, “We Believe in Being Chaste,” Liahona, Mayo 2013, 42.

“Chastity: What Are the Limits?,” “I Choose to Be Pure” (videos), ChurchofJesusChrist.org

Panangpadur-as iti Panangisurotayo

Paneknekam ti maipapan ken ni Jesucristo. Ni Pablo ket “saan nga immay a binuyog ti kinalaing ti pagsasao wenno ti sirib, a mangiwarwaragawag … iti pammaneknek maipapan iti Dios” (1Taga Corinto 2:1). Ti simple a pammaneknekmo maipapan iti Mangisalakan ket mabalin nga addaan iti nauneg nga impluensia.