Agosto 28–Septiembre 3

1 Taga Corinto 8–13

“Dakayo ti Bagi ni Cristo”

Insuro ni Elder Richard G. Scott a “kabaelantayo a panawan ti kapatgan a personal a pannarabay ti Espiritu a di mangmangngegan” no ditay isurat ken denggen “dagiti pammalagip nga umay [kadatayo]” (“To Acquire Spiritual Guidance,” Liahona, Nob. 2009, 8).

Yawis ti Panagbibinninglay

Iti 1 Taga Corinto 8–13, insuro ni Pablo dagiti kinapudno ti ebanghelio a mangus-usar iti pangipadis (metaphor) kas iti tumataray iti paglulumbaan, bagi ti tao, ken ti “piangpiang nga umaweng” (kitaen iti Taga Corinto 9:24–25; 12:13–26; 13:1). Mabalinmo a saludsoden kadagiti miembro ti klase no ania ti nasursuroda manipud kadagitoy a panangidilig. Kasano a nakatulong dagitoy a panangidilig kadatayo tapno maawatantayo dagiti kinapudno iti ebanghelio?

Isuro ti Doktrina

1 Taga Corinto 10:1–13

Mangted ti Dios iti maysa a wagas tapno maliklikan ti sulisog.

• Kasano a matulongam dagiti miembro ti klase a mangtakuat kadagiti nabileg a kinapudno iti 1 Taga Corinto 10:13? Ti maysa a kapanunotan ket ti panangbingay ti bersikulo iti ababa a ragup ti balikas, ikkam iti maysa iti saba-sabali a miembro ti klase, ket maidawat kadagiti miembro ti klase nga ulitenda nga ibaga dagiti ragup ti balikas iti bukodda a balikas. Kas pagarigan, ania ti sabali pay a wagas a panangisao iti “napudno ti Dios” wenno “nasulisog iti nalablabes ngem iti kabaelam”? Mabalinmo nga uliten a basaen ti bersikulo a mangus-usar kadagiti sumagmamano nga insarita dagiti miembro ti klase. Mabalin a kabaelan dagiti miembro ti klase a mangibinglay iti padpadas a nakaammuanda a pudno dagiti kari iti daytoy a bersikulo. Ania dagiti dadduma pay a nalawag a pannakaammo ken pannakaawat a magun-odtayo kadagitoy a bersikulo manipud iti Alma 13:27–28?

• Imbes nga ipamaysam kadagiti maitudo a pannulisog ti asino man, mabalin a kayatmo nga ipokus ti panaglilinnawag iti 1 Taga Corinto 10:13 maipapan kadagiti pannulisog nga, iti balikas ni Pablo, “a di met simro kadagiti isu amin a tattao.” Mabalin nga irugi dagiti miembro ti klase babaen ti panangilasin kadagiti sulisog nga iballaag ni Pablo a maibusor iti bersikulo 1–12. Mabalinda pay nga isingasing dagiti kabaruanan a pagarigan dagiti gagangay a pannulisog, a kas kadagiti sulisog nga agbalin a naulbod, panagsaosao, wenno pananghusga kadagiti dadduma. Kasano a mabalin ti maysa a tao, iti tulong ti Dios, a “libasan” dagitoy a sulisog?

1 Taga Corinto 10:16–17; 11:23–30

Ti sakramento ti mamagkaykaysa kadatayo kas miembro ti Simbaan ni Cristo.

• Dagitoy a bersikulo ket makaparegta iti panaglilinnawag maipapan no kasano a mamagkaykaysa ti sakramento iti wardyo iti panagkagumaanyo nga agbalin nga ad-adda a kas iti Mangisalakan. Mabalinmo nga irugi babaen ti panangbasam iti 1 Taga Corinto10:16–17 ken panangsukisokmo no ania ti kaipapanan ti balikas a pannakairaman iti daytoy a konteksto (mabalin a sapulen ti maysa a tao iti diksionario dagiti posible a depinision). Kasano a makatulong kadatayo nga agbalin nga ad-adda a nakaykaysa ti pannakiranud iti sakramento? Kasano a mainaig iti daytoy a panggep a tun-oyen ti balakad ni Pablo a “tunggal maysa sukimatenna ti bagina”? (1 Taga Corinto 11:28).

1 Taga Corinto 12

Maited dagiti naespirituan a sagut tapno mairanud ti amin nga annak ti Nailangitan nga Ama.

• Tapno matulongan dagiti miembro ti klase a mangkita kadagiti pagarigan ti no kasano a makatulong ti panangpadur-as kadagiti naespirituan a sagut iti pannakaitandudo ti Simbaan, ibilangmo ti panangawis kadakuada a mangpanunot kadagiti naespirituan a sagut kadagiti tao iti nasantuan a kasuratan. Para kadagiti kapanunotan, mabalinmo a dutokan ida a mangsukisok iti maysa kadagiti reperensia ti nasantuan a kasuratan iti “Dagiti Nainayon a Resources” ket ibagada dagiti naespirituan a sagut a mapanunotda nga adda iti dayta a tao. Mabalinda a pagsasaritaan iti maipapan kadagiti naespirituan a sagut a makitada iti tunggal maysa. Kasano a parabur kadatayo dagitoy naespirituan a sagut dagiti tao? Kasano a mausartayo dagiti naespirituan a sagut a mangngaasi kadagiti sabali ken mangipasdek iti bagi ni Cristo, wenno iti Simbaan? (kitaen iti 1 Taga Corinto 12:12–31; kitaen met iti 1 Taga Corinto 14:12).

• Tapno matulongan dagiti mimebro ti klase a maawatan no kasano a mapadur-as dagiti naespirituan a sagut, awisem ida a mangbasa iti 1 Taga Corinto 12:27–31; Moroni 7:48; 10:23, 30; Doktrina ken Katulagan 46:8. Ania ti isuro kadatayo dagitoy nasantuan a kasuratan maipapan ti no kasano a magun-odtayo dagiti naespirituan a sagut? Kasano nga aramidennatayo nga ad-adda pay a kas ken ni Cristo ti panangpadur-as kadagiti naespirituan a sagut? Mangawis kadagiti miembro ti klase a pumili iti maysa a sagut a kayatda a gun-oden ken agkiddaw iti tulong ti Apo iti pananggun-od iti dayta a sagut.

1 Taga Corinto 13

Ti panagayat iti pada a tao [charity] ti kaindaklanan a naespirituan a sagut.

• Mabalinmo nga idawat kadagiti miembro ti klase a siuulimek a mangutob iti 1 Taga Corinto 13 ket panunotenda ti maysa a tao nga am-ammoda a nasayaat a pagwadan iti maysa wenno ad-adu nga aspekto ti panangayat iti pada a tao a dinakamat ni Pablo. Mabalin nga iladawan ti sumagmamano a miembro ti klase ti tao a napanunotda ken ti maysa a padas a nakaipakatan ti daytoy a tao iti panagayat iti pada a tao. Mabalinmo pay nga ilista iti pisarra dagiti paset ti panangiladawan ni Pablo ket awisem dagiti miembro ti klase a mangiburay no ania ti kaipapanan a ti tao nga addaan iti panagayat ket “managitured” wenno “saan a nalaka nga agluksaw” (1 Taga Corinto 13:4–5). Kasano nga impagwadan ti Mangisalakan dagitoy a kababalin ti panagayat iti pada a tao? Ania dagiti dadduma pay a kinapudno iti Moroni 7:46–48 a mangisuro kadatayo maipapan iti panagayat iti pada a tao?

Dagiti Nainayon a Resources

Dagiti pagarigan dagiti naespirituan a sagut iti nasantuan a kasuratan.

• Genesis 40–41

• Ruth 1

• 1 Ar-ari 3:5–15

• Mateo 1:18–24; 2:13–15, 19–22

• Lucas 1:26–38

• Juan 11:20–27

• Dagiti Aramid 3:1–8; 5:12–16

• Mormon 1:1–5

• Ether 2:14–25; 3:1–20

• Doktrina ken Katulagan 6:5, 10–12

• Moises 6:22–27, 31–43; 7:2–4, 13, 17–21

Panangpadur-as iti Panangisurotayo

Agbiagka a mayannanurot kadagiti pagbatayan nga isursurom. Ti panagbiag a mayannurot kadagiti pagbatayan nga isursurom ket mangtulongto kenka a nabilbileg ti panangipaneknekmo maipapan kadagitoy. Insuro ni Pablo, “Kasta met imbilin ti Apo a dagiti mangikasaba iti ebanghelio agbiagda koma gapu iti ebanghelio” (1Taga Corinto 9:14.