Septiembre 18–24

2 Taga Corinto 8–13

“Ti Dios Ayatenna ti Mangted a Siaayat”

Bayat ti panangbasam iti 2 Taga Corinto 8–13, panunotem maipapan kadagiti tao a sursuruam ken planuem dagiti aktibidad a makatulong kadakuada a mangtakuat kadagiti pagbatayan kadagitoy a kapitulo. Kalpasanna irebyu daytoy a balabala para kadagiti mainayon a kapanunotan.

Yawis ti Panagbibinninglay

Kastoy ti maysa a wagas a panangawis kadagiti miembro ti klase a mangibinglay no ania ti nasursuroda manipud iti 2 Taga Corinto 8–13: idawat ti sumagmamano kadakauada a mangisurat iti pisarra iti maysa a paggugustoda a ragup ti balikas ket iburayda no apay a dagitoy a ragup ti balikas napnuan pateg kadakuada.

Isuro ti Doktrina

2 Taga Corinto 8:1–15; 9:6–15

Siraragsak nga ibinglay dagiti Santo no ania ti adda kadakuada a mangbendision kadagiti napanglaw ken agkasapulan.

• Binilin ti Dios dagiti Santo a mangtulong a mangaywan kadagiti agkasapulan, ken mabalin a mangparegta dagiti binatog iti 2 Taga Corinto 8–9 kadagiti miembro ti klasem iti panagkagumaanda. Tapno makatulong kadakuada a mangsapul kadagitoy a binatog, mabalinmo nga isurat iti pisarra dagiti saludsod kas Apay a mangtedtayo? ken Kasano ti rumbeng a panangtedtayo? Mabalin a sukisoken ti kagudua ti klase dagiti sungbat iti 2 Taga Corinto 8:1–15, ket ti sabali a kagudua ket agsukisok iti 2 Taga Corinto 9:6–15. (Mabalinmo nga ilawlawag nga iti kapitulo 8, bersikulo 1–5, nagsao ni Pablo maipapan kadagiti Santo iti Macedonia kas pagwadan ti nawadwad a panagparabur.) Kasano a makatulong kadatayo dagiti pagbatayan nga insuro ni Pablo tapno nasaysayaat ti panangaywan kadagiti napanglaw ken agkasapulan?

2 Taga Corinto 11:1–4

Rumbeng koma nga agpokustayo iti “nadalus a siggalut a maipaay ken Cristo.”

• No dadduma marikna dagiti miembro ti Simbaan ti pannakatalipupos kadagiti kasapulan ti biag—agraman ti no ania a mabalin a makitada kadagiti kasapulan ti agbalin a maysa a Santo iti Ud-udina nga Aldaw. Ti balakad ni Pablo maipapan iti “nadalus a singgalut a maipaay ken Cristo” (2 Taga Corinto 11:3) ket makatulong. Nalabit a mabalin a basaenyo nga aggigiddan ti 2 Taga Corinto 11:3 ket ilawlawag no ania ti kayat a sawen ti ragup ti balikas a “nadalus a singgalut a maipaay ken Cristo.” Mabalin pay nga idawatmo kadagiti miembro ti klase a mangipapan a naawisda a mangisurat iti panangiladawan ti ebanghelio ni Jesucristo para iti maysa a pagiwarnak, nga addaan laeng iti 100 a balikas. Mangted kadakuada iti oras a mangisurat kadagiti panangiladawanda, ket paibinglay iti tunggal maysa no ania ti insuratda. No agkasapulanda iti tulong, mabalinda a kitaen iti Juan 3:16–17; 3 Nephi 27:13–21; ti palawag ni Presidente Dieter F. Uchtdorf iti “Dagiti Nainayon a Resources.” Mabalin a mangiburay dagiti miembro ti klase kadagiti kapanunotan no kasano a “mapasimple ti wagastayo iti kinadisipulo.”

2 Taga Corinto 12:5–10

Umdas ti parabur ti Mangisalakan a mangtulong kadatayo a mangsapul iti pigsa iti pagkapsutantayo.

• Ania koma ti masaom iti maysa a gayyem a nagkararag para iti tulong iti pagkuranganna ngem mariknana a saan a nasungbatan daytoy a kararag? Ibilangmo ti panangawis kadagiti miembro ti klase a mangutob iti daytoy a saludsod bayat ti naulimek a panangbasada iti 2 Taga Corinto 12:5–10. Kalpasanna mabalinda nga ibinglay dagiti nalawag a pannakaammo ken pannakaawat [insights] manipud kadagitoy a bersikulo a mabalin a makatulong iti daytoy a kasasaad Mabalinda pay nga ibinglay dagiti padas idi, babaen ti parabur ni Jesucristo, wenno ti nadiosan a bileg ken tulongna, nasarakanda ti pigsa iti pagkapsutan. Kasano a nangimpluensia iti biagda dayta a padas? Apay a napateg ti panagtalek iti panagoras ti Apo?

Dagiti Nainayon a Resources 

Mapasimpletayo ti wagas ti panagbiagtayo iti ebanghelio.

Insuro ni Presidente Dieter F. Uchtdorf:

“Kakabsat, saan a kasapulan a narikut ti panangibiag iti ebanghelio.

“Pudno a nalawag daytoy. Mabalin nga iladawan a kas iti daytoy:

• Ti idedengngeg iti balikas ti Dios nga addaan iti napasnek a panggep ket mangiturong kadatayo a mamati iti Dios ken ti agtalek kadagiti karina.

• Ti ad-adda a panagtalektayo iti Dios, ad-adda met a mapno ti puspusotayo iti ayat para Kenkuana ken iti tunggal maysa.

• Gapu iti ayattayo iti Dios, tarigagayantayo a sumurot Kenkuana ken agtignaytayo a mayannurot iti balikasna.

• Gapu ta ay-ayatentayo ti Dios, kayattayo ti agserbi Kenkuana; kayattayo ti mangbendision iti biag dagiti dadduma ken tumulong kadagiti nakurapay ken agkasapulan.

• Ti ad-adda a pannagnatayo iti daytoy a dana ti kinadisipulo, ad-adda met a tarigagayantayo ti agsursuro iti balikas ti Dios.

“Ket agtultuloy a kasta, tunggal addang a mangiturong iti sumaruno ken panangpunno kadatayo iti agtultuloy a panangpapigsa iti pammati, namnama, ken ayat iti pada a tao.

“Simple ti kinapintas daytoy, ket nangayed ti pannakaipaayna.

“Kakabsat, no panunotenyo a saan unay a maipatpatungpal ti ebanghelio iti biagyo, awisenkayo a maaddaan iti oras a mangamiris iti biagyo manipud iti nalawlawa a pannirigan, ket aramidenyo a simple no kasano ti panagbiagyo iti kinadisipulo. Ipokusyo dagiti pangrugian a doktrina, pagbatayan, ken pannakaaramat ti ebanghelio. Ikarik a tarabayen ken bendisionannakayto ti Dios iti danayo nga agturong iti makapnek a biag, ken ad-adda a makatulongto ti ebanghelio kadakayo” (“It Works Wonderfully,” Liahona, Nob. 2015, 22).

Panangpadur-as iti Panangisurotayo

Makitinnulong kadagiti miembro ti pamilia. “Dagiti tao nga addaan iti kabilgan nga impluensia iti maysa a tao—para iti pagsayaatan wenno pagdaksan—ket gagangay a dagiti tao a kaduana iti pagtaenganna. Gapu ta ti pagtaengan ti sentro ti panagbiag ken pagsursuruan iti ebanghelio, dagiti panagkagumaanmo a mangpatibker iti maysa a miembro ti klase ket agbalinto a kasamayan no makitinnulongka kadagiti … miembro ti pamilia” (Panangisuro iti Wagas ti Mangisalakan, 8).