Sinarungkaran ti nagungar a Mangisalakan ni Pablo iti pagbaludan (kitaen iti Dagiti Aramid 23:11). Wayawayaannatayo ni Jesucristo manipud iti “sangol ti pannakaadipen” (Taga Galacia 5:1).

Septiembre 25–Oktubre 1

Taga Galacia

“Magna iti Espiritu”

Bayat ti sikakararag a panagbasam ken panagutobmo iti Taga Galacia, isuronto ti Apo kenka no ania ti nasken nga ibinglaymo iti klasem. Ti panangisurat kadagiti impresionmo ket mangipakita iti panagyamanmo iti tulong ti Dios.

Yawis ti Panagbibinninglay

Ti panagadal iti nasantuan a kasuratan ket masansan nga agbanag iti napnuan kaipapanan a panaglilinnawag iti ebanghelio iti pamilia wenno gagayyem. Napasamak kadin daytoy kadagiti miembro ti klasem iti daytoy a lawas? Awisem ida a mangibinglay kadagiti padasda.

Isuro ti Doktrina

Taga Galacia 1:6–7; 3:1–5; 4:8–21; 5:1, 13–14

Mangidiaya ti ebanghelio ni Jesucristo iti wayawaya.

• Ti panagadal iti ania man a libro ti nasantuan a kasuratan ket nalaklaka no ammotayo no apay a naisurat daytoy. Gapu iti daytoy, nasayaat nga irugim ti panaglilinnawag maipapan kadagiti Taga Galacia nga addaan iti maysa a saludsod kas iti “Ania iti panagkunayo ti panggep ni Pablo iti panangisuratna iti daytoy a surat?” wenno “Ania ti problema a padpadasen ni Pablo a risuten?” Awisem dagiti miembro ti klase a mangsapul kadagiti pamugtuan iti Taga Galacia 1:6–7; 3:1–5; 4:8–21. Kasano nga addan kaipapanan ti mensahe ni Pablo ita nga agdama?

• Napanunot ti sumagmamano a Santo iti Galacia a kasapulanda nga ituloy ti panagbiag iti linteg ni Moises. Ken ni Pablo, kasla panagbiag daytoy iti “sangol ti pannakaadipen” a maidilig iti “wayawaya” nga indiaya ni Jesucristo kadatayo (Taga Galacia 5:1). Tapno matulongan dagiti miembro ti klase nga agsukisok kadagiti pannursuro ni Pablo maipapan iti wayawaya ken pannakaadipen, mabalinmo nga idawat kadakuada a mangibaga kadagiti ugali ken tignay a mangkedngan iti naespirituan a panagdakkel ken panagdur-as (kas kadagiti kannawidan iti kultura, dakes nga ugali, palso a pammati, wenno panangipokus kadagiti akinruar a tignayda imbes a ti kumbersionda). Segun iti Taga Galacia 5:1, 13–14, kasano a masarakantayo ti wayawaya manipud kadagitoy a kababalin wenno aramid? Kasano a mapadpadasantayo ti kinawayawaya a masarakan babaen ken Cristo? Kasano nga ilawlawagtayo iti sabali a ti ammona ket mangkeltay iti personal a kinawayawayana ti panangibiag iti ebanghelio?

Taga Galacia 5:16–26

No “magnatayo iti Espiritu,” awatentayonto ti “bunga ti Espiritu.”

• Adu a tao ti agkarigatan a mangilasin iti impluensia ti Espiritu. TiTaga Galacia 5 ket makatulong. Nalabit a mabalinmo nga idawat kadagiti miembro ti klase a mangsukisok iti Taga Galacia 5:22–25 a mangsarak kadagiti balikas ni Pablo a nausar a pangiladawan iti bunga ti Espiritu. Apay a ti bunga ket maysa a nasayaat a metapora para iti wagas a pangimpluensiaan kadatayo ti Espiritu? Nalabit a mabalin nga ibinglay dagiti miembro ti klase no kasano a nasaksianda daytoy a bunga iti biagda, wenno ti biag dagiti tao nga am-ammoda. Dagiti dadduma pay a resources a sukisoken ket karaman iti Mateo 7:16–18; Juan 14:26–27; Moroni 7:13–17; Doktrina ken Katulagan 11:12–13; ken dagiti balikas ni Presidente Gordon B. Hinckley iti “Dagiti Nainayon a Resources.”

Maawattayo ti “bunga ti Espiritu” no kalikagumantayo a gun-oden daytoy.

Taga-Galacia 6:7–10

No agmulatayo “iti Espiritu,” aganitayto kadagiti bendision iti umno a panawen.

• Ti panagadal iti Taga Galacia 6:7–10 a makatulong kadagiti miembro ti klase a mangpanunot a nasayaat maipapan kadagiti napaut a pagbanagan dagiti pilida. Tapno matulongan ida,mabalin a mangitugotka iti bukbukel iti nadumaduma a kita, kasta met dagiti mulmula, bungbunga, wenno natnateng nga agtubo manipud iti tunggal maysa kadagitoy a bukbukel (wenno mangitugotka kadagiti ladawan dagitoy a banag). Makapagtitinnulong dagiti miembro ti klase a mangiparis iti tunggal bukel iti banag a patauden daytoy. Kalpasanna mabalinda a basaen dagiti bersikulo 7–10 ket pagsasaritaanda no ania ti kayat a sawen ti “agmula a maipaay iti lasag” ken “iti Espiritu.” (Mabalin a makatulong ti mensahe manipud ken ni Elder Ulisses Soares iti “Dagiti Nainayon a Resources”.) Ania ti apitentayo no agmulatayo a maipaay iti lasag? Ania ti apitentayo no agmulatayo a maipaay iti Espiritu? (kitaen iti Taga Galacia 5:22–23).

• Marikna ti sumagmamano a miembro ti klase a “mabannog ti panagaramid iti naimbag” (Taga Galacia 6:9)—nalabit a dida sigurado nga agbunga dagiti panagkagumaanda. Ti panaglilinnawag iti Taga Galacia 6:7–10 ket makatulong. Tapno mayam-ammo dagitoy a bersikulo, mabalinmo nga awisen ti maysa a tao iti klase nga agsarita biit maipapan iti maysa a panawen idi kasapulanna ti anus idi pinadasna ti nangpadakkel iti maysa a banag. Ania ti maisuro kadatayo ti padas daytoy a tao, kasta met iti Taga Galacia 6:7–10, maipapan kadagiti panagkagumaantayo a “magna iti Espiritu”? (Taga Galacia 5:25).

Dagiti Nainayon a Resources 

Ti bunga ti Espiritu.

Insuro ni Presidente Gordon B. Hinckley: “Mailasinyo dagiti parikna ti Espiritu babaen dagiti bunga ti Espiritu—dayta a manglawlawag, mangpadur-as, dayta nasayaat ken mangpasingked ken mangitag-ay ken mangiturong kadatayo kadagiti nasaysayaat a pampanunot ken nasaysayaat a balikas ken nasaysayaat nga aramid ket naggapu iti Espiritu ti Dios” (Teachings of Presidents of the Church: Gordon B. Hinckley [2016], 121).

Panagmula iti Espiritu.

Inlawlawag ni Elder Ulisses Soares: “Ti mangimula iti Espiritu kayatna a sawen a ti amin a panunot, balikas, ken tignaytayo ti nasken a mangitag-ay kadatayo iti tukad ti kinadiosan dagiti nailangitan a nagannaktayo. Nupay kasta, ibasar ti nasantuan a kasuratan iti lasag kas pisikal wenno nailubongan a kasasaad ti gagangay a tao, a mangpalugod iti tao a a maimpluensiaan iti nasged a tarigagay, pagganasan, ken pannakagargari ti lasag imbes a panangsapul iti pammaregta manipud iti Espiritu Santo” (“Abide in the Lord’s Territory!,” Liahona, May 2012, 39).

Panangpadur-as iti Panangisurotayo

Tulongam dagiti sursuruam nga agpipinnaregta iti tunggal maysa. “Tunggal tao iti klasem ket nabaknang a paggapuan ti pammaneknek, nalawag a pannakaammo ken pannakaawat, ken padpadas iti panagbiag iti ebanghelio. Awisem ida nga agbibinninglay ken agpipinnaregta iti tunggal maysa” (Panangisuro iti Wagas ti Mangisalakan, 5).