“Oktubre 16–22. 1 ken 2 Taga Tesalonica: ‘An-anayan ti Pagkurkurangan iti Pammatiyo,’” Umaykayo, Sumurot Kaniak—Para iti Sunday School: Baro a Tulag 2023 (2021)
“Oktubre 16–22. 1 ken 2 Taga Tesalonica,” Umaykayo, Sumurot Kaniak—Para iti Sunday School: 2023
Oktubre 16–22
1 ken 2 Taga Tesalonica
“An-anayan ti Pagkurkurangan iti Pammatiyo”
Insuro ni Alma, “Saankayo nga agtalek iti asino man nga agbalin a mannursuroyo wenno ministroyo, malaksid no isu ti tao ti Dios, a mangsursurot iti pagayatanna ken mangtungtungpal kadagiti bilinna” (Mosiah 23:14). Ania ti kayat nga isingasing daytoy nasantuan a kasuratan maipapan iti no kasano ti nasken a panangisaganam iti bagim a mangisuro?
Yawis ti Panagbibinninglay
Mangted kadagiti miembro ti klase iti sumagmamano a minuto a mangbasa biit iti 1 ken 2 Taga Tesalonica ket mangsapul iti maysa a bersikulo a makaawis iti riknada. Awisem ida a mangibinglay kadagiti bersikuloda iti maysa a tao iti klase, ket kalpasanna idawatmo iti sumagmamano a paris a mangibinglay no ania ti nasursuroda manipud iti tunggal maysa.
Isuro ti Doktrina
1 Taga Tesalonica 1:5–8; 2:1–13
Masapul nga agikasaba dagiti katulongan ti Apo iti ebanghelio nga addaan iti sinseridad ken ayat.
-
Rinugian ni Pablo ti Suratna kadagiti Taga Tesalonica babaen iti panangipalagipna kadagiti Santo iti wagas a nakaibinglayanna ken dagiti dadduma iti ebanghelio kadakuada. Mabalin a nasayaat daytoy a gundaway nga amirisen dagiti miembro ti klasem no kumustan ti ar-aramidenda iti panangisuro ken panagsursuroda manipud iti tunggal maysa. Mabalinmo nga awisen dagiti miembro ti klase a mangbasa iti 1 Taga Tesalonica 1:5–8; 2:1–13 ket ilasin dagiti pagbatayan a mainaig iti panangibinglay iti ebanghelio a sisasamay. Kalpasanna mabalinda nga isurat dagiti saludsod a maibatay kadagitoy a bersikulo a mangtulongto kadakuada a mangamiris kadagiti panagkagumaanda a mangisuro iti ebanghelio iti dadduma. Kas pagarigan, mabalin a ti maysa a saludsod kas iti “Maysaak kadi a pagwadan dagiti banag nga ammok?” (kitaen iti 1 Taga Tesalonica 1:7). Kasano a ti panangsurot kadagiti pagbatayan iti daytoy a binatog ket makatulong kadatayo a nasaysayaat nga agserbi kadagiti sursuruantayo?
1 Taga Tesalonica 3:9–13; 4:1–12
No surotentayo ni Jesucristo, mapagbalinnatayo a nasantuan.
-
Insuro ni Pablo kadagiti Santo iti Tesalonica a “Saannatayo nga inayaban ti Dios a maipaay iti kinarugit, no di iti kinasanto” (1 Taga Tesalonica 4:7 Tapno mairugi ti panaglilinnawag, isurat iti pisarra ti “More Holiness Give Me”” (Hymns,, no.131). Idawat kadagiti miembro ti klase a mangilawlawag kadagiti kababalin ti kinasanto a nadakamat iti himno a kasla napateg kadakuada. Isurat iti pisarra ti Ad-adu a kinasanto, maited kaniak … , ket awisem dagiti miembro ti klase a mangsarak kadagiti balikas ken ragup ti balikas manipud iti 1 Taga Tesalonica 3:9–13; 4:1–12 a mangkumpleto iti binatog. Kasano a mapadur-astayo dagitoy a kababalin?
-
Ti awis nga agbalin a nasantuan ket kasla nakabutbuteng. Mabalin a makatulong daytoy no maawatan dagiti miembro ti klase a ti panangpadur-as iti kinasanto ket in-inut a proseso a kasapulan kadatayo a “rumang-ay a rumang-ay” iti panaglabas ti panawen (1 Taga Tesalonica 4:10). Tapno mailadawan daytoy a proseso, mabalinmo nga awisen ti maysa a miembro ti klase a mangisarita maipapan iti maysa a talento wenno naileppas a nagkasapulan iti agtultuloy a panagkagumaan iti adu a panawen, kas iti panagaramid iti kobre kama wenno panagtokar iti instrumento ti musika. Kasano a maipada daytoy iti proseso ti panagbalin a nasantuan? Awisem dagiti miembro ti klase a mangrebyu iti 1Taga Tesalonica 3:9–13; 4:1–12 ket ibinglayda dagiti nalawag a pannakaammo ken pannakaawat maipapan iti panagkagumaan a kasapulan tapno agbalin a nasantuan iti wagas nga iladawan ni Pablo. Ania ti nakatulong kadatayo a dumur-as iti kinasantuan?
1 Taga Tesalonica 4:11–12; 2 Taga Tesalonica 3:7–13
Nasken nga agtrabahotayo tapno maipaayantayo ti bagbagitayo ken dagiti agkasapulan.
-
Dagiti saludsod kas iti sumaganad ket makaparegta iti panaglilinnawag maipapan iti balakad ni Pablo maipanggep iti aramid: Ania dagiti bunga ti kinasadut? Ania dagiti bendision ti panagtrabaho? Ania iti panagkunam ti kayat a sawen ni Pablo iti balikas a “natalna” ken “sitatalna”? (1 Taga Tesalonica 4:11; 2 Taga Tesalonica 3:12). Mabalin a kayatmo nga isurat dagiti saludsod kas kadagitoy iti pisarra tapno utoben ken paglilinnawagan dagiti miembro ti klase bayat ti panangbasada iti 1 Taga Tesalonica 4:11–12 ken 2 Taga Tesalonica 3:7–13. Ania dagiti dadduma pay a nasantuan a kasuratan a makatulong kadatayo a makaawat iti kinapateg ti aramid ken dagiti peggad ti kinasadut? (kitaen dagiti naisingasing iti “Dagiti Nainayon a Resources”).
Ti ikakalilis iti kinapudno ket mapasamak sakbay ti Maikadua a Yaay ni Jesucristo.
-
Mabalin a makatulong a mangilawlawag iti sumagmamano kadagiti metapora nga inusar dagiti propeta a pangiladawan iti Ikakalilis iti Kinapudno, kas iti ti pannakatnag (kitaen iti 2 Taga Tesalonica 2:3), panagbisin (kitaen iti Amos 8:11–12), narawet a lobo a sumrek iti arban (kitaen iti Dagiti Aramid 20:28–30), ken dagiti aggagatel a lapayag (kitaen iti 2 Timoteo 4:3–4). Ibilang ti panangbingay kadagiti miembro ti klase iti kada paris ket idawat kadakuada a mangbasa iti maysa wenno ad-adu pay kadagitoy a nasantuan a kasuratan (wenno dadduma pay a piliem) ket iladawan no ania ti isuro dagiti bersikulo maipapan iti Dakkel nga Ikakalilis iti Kinapudno. Ania ti insuro dagiti propeta maipapan iti Ikakalilis iti Kinapudno ken ti epekto nga adda iti daytoy?
-
Numan saan a mapadasan ti Simbaan iti maysa manen nga “itatallikud” (2 Taga Tesalonica 2:3) a kas napasamak idi nagkauna a panawen, mabalin a mapadasan iti tunggal maysa kadatayo ti itatallikud. Ania ti isingasing iti 2 Taga Tesalonica 2 maipapan no kasano a mapasamak daytoy nga itatallikud (kitaen dagiti bersikulo 9–10) ken kasano a a maliklikantayo daytoy? (kitaen dagiti bersikulo 15–17).
Dagiti Nainayon a Resources
Dagiti nasantuan a kasuratan maipapan iti aramid ken kinasadut.
Panangpadur-as iti Panangisurotayo
Agusar iti nadumaduma a pamay-an. Mabalin a nalaka nga agbalin a komportable iti maysa a masinunuo nga estilo ti panangisuro, ngem dagiti nadumaduma a pamay-an iti panangisuro ti mangtulong iti nadumaduma a miembro ti klase. Agsapulka kadagiti wagas a mamagdumaduma iti panangisurom, kas iti panangusar kadagiti video, artwork, wenno musika wenno panangted iti gundaway a mangisuro kadagiti miembro ti klase (kitaen iti Panangisuro iti Wagas ti Mangisalakan, 22).