pamilia a kumitkita kadagiti ladawan

Oktubre 2–8

Taga-Efeso

“Maipaay iti Pannakapaan-anay dagiti Sasanto”

Dagiti pampanunot ken impresion maipapan iti no ania ken no kasano ti mangisuro ket umayto kenka bayat ti sikakararag a panagadalmo iti Taga Efeso, dagiti kallabes a mensahe ti sapasap a komperensia, daytoy a balabala, ken ti Umaykayo, Sumurot Kaniak—Para kadagiti Indibidual ken Pamilia.

icon iti panagbibinninglay

Yawis ti Panagbibinninglay

Ibilangmo ti panangawis kadagiti miembro ti klase a mangisurat iti pisarra iti maysa a binatog a pakagupgopan ti maysa a banag a nasursuroda iti panagadalda itoy a lawas. Pumilika iti sumagmamano a pakagupgopan, ket awisem dagiti miembro ti klase a nangisurat kadagitoy tapno mangibinglay kadagiti kapanunotanda.

icon iti panangisuro

Isuro ti Doktrina

Taga Efeso 2:19–22; 4:4–8, 11–16

Dagiti propeta ken apostol—ken datayo amin—ti mangpapigsa ken mamagkaykaysa iti Simbaan.

• Mabalinmo kadi ken ti klasem a mangbangon iti maysa a banag a mangiladawan no kasano a “nabangon iti pamuon dagiti apostol ken propeta” ti Simbaan ket no kasano a “kangrunaan a panuli a bato” ti Mangisalakan? (Taga Efeso 2:20). Nalabit a mabalin nga ikkan iti label dagiti miembro ti klase dagiti bloke wenno sinan-tasa a papel ket urnosenda nga agbalin a maysa a torre wenno piramid, a ni Jesucristo ken dagiti apostol ken propeta ti mangbukel iti batayan. Kalpasanna mabalinmo nga ipakita no ania ti mapasamak no naikkat ni Cristo wenno dagiti apostol ken propetana. Apay a ti kangrunaan a panuli a bato ti nasayaat a metapora para ken ni Jesucristo ken ti akemna iti Simbaan? (Para iti pannakailawlawag ti maysa a kangrunaan a panuli a bato, kitaen iti “Dagiti Nainayon a Resources.”) Mabalin a sukisoken dagiti miembro ti klase ti Taga Efeso 2:19–22; 4:11–16 para kadagiti bendision a maawattayo gapu kadagiti apostol, propeta, ken dadduma pay a lider ti Simbaan. Ania ti maaramidtayo tapno mabangontayo ti biagtayo kadagiti pannursuroda?

bato a panuli ti maysa a pasdek

Ni Jesucristo ti panuli a bato ti Simbaan.

• No dimngeg iti sapasap a komperensia dagiti miembro ti klasem manipud pay idi maudi a nagkikitakayo, awisem ida a mangisarita no kasano a nakatulong dagiti banag a naisuro kabayatan ti komperensia a mangipatungpal kadagiti panggep a nadakamat iti Taga Efeso 4:11–16

• Nalabit a mabalinmo nga ikkan dagiti miembro ti klase iti kanito a mangilista kadagiti “aramiden” wenno pagrebbengantayo a kas miembro iti Simbaan ni Cristo (kitaen iti Taga Efeso 4:1)—kas pagarigan, maysa nga ag-ministerio a kabsat a lalaki wenno ministering brother wenno sister, maysa a nalinteg a naganak, maysa a disipulo ni Cristo, ken dadduma pay. Kalpasanna mabalinda ti makisinnukat iti listaan iti sabali pay a miembro ti klase, basaenda ti Taga Efeso 4:4–8, 11–16, ket ibinglayda no kasano a makatulong a mangitandudo iti bagi ni Cristo ti panangtungpal kadagiti pagrebbenganda iti listaanda. Kasano a makapagtrabahotayo a sangkamaysa tapno agbalin a nakaykaysa iti “maysa nga Apo, maysa a pammati, maysa a pammautisar”?

Taga Efeso 5:25–6:4

Ti panangsurot iti pagwadan ti Mangisalakan ket makapapigsa kadagiti relasion iti pamilia.

• Tapno matulongan dagiti miembro ti klase a mangyaplikar ti balakad ni Pablo maipapan kadagiti pagnanaigan iti pamilia, mabalin a mangisuratka kadagiti sumaganad a saludsod iti pisarra: Kasano a masurottayo ti pagwadan ti Mangisalakan iti panangtratotayo kadagiti miembro ti pamiliatayo? (kitaen iti Taga Efeso 5:25). Ania ti kayat na a sawen kenka ti “dayawem ni amam ken ni inam”? (Taga Efeso 6:1–3). Kasano a padakkelentayo dagiti annaktayo iti “alagaden ken pammagbaga ti Apo”? (Taga-Efeso 6:4). Mabalin a paglilinnawagan dagiti miembro ti klase dagitoy a saludsod, iti kada grupo wenno kas maysa a klase, bayat ti panangbasada kadagiti nainaig a nasantuan a kasuratan. Mabalinmo nga awisen dagiti miembro ti klase a mangibinglay kadagiti pagwadan a nakitadan kadagiti tao nga agbibiag iti wagas nga inladawan ni Pablo.

Taga Efeso 6:10–18

Ti kabal ti Dios ket makatulongto a mangsaluad kadatayo manipud iti dakes.

• Ania ti makatulong a mangparegta kadagiti miembro ti klase a mangikagumaan a mangikawes iti sibubukel a kabal ti Dios iti tunggal aldaw? Mabalin a mangisaganaka iti maysa nga aktibidad a pangiparisan dagiti miembro ti klase kadagiti pedaso ti kabal kadagiti pagbatayan wenno saguday nga ibagida, kas nailadawan iti Taga Efeso 6:14–17. Kasano a makatulong ti tunggal pedaso ti kabal a mangsaluad kadatayo manipud iti kinadangkes? (Para iti sumagmamano a tulong, kitaen iti “Dagiti Nainayon a Resources.”) Kasano a maikawestayo daytoy a kabal? Ania ti maaramidtayo a mangilasin ken mangpapigsa kadagiti ania man a pagkapsutan iti kabaltayo?

resources icon

Dagiti Nainayon a Resources 

Ania ti kangrunaan a panuli a bato?

Ti kangrunaan a panuli a bato ket ti umuna a bato a naikabil iti maysa a pundasion. Agserbi daytoy kas pangitudo a punto [reference point] para iti rukod ken pannakaikabil ti dadduma pay a bato, a nasken a maibatog iti kangrunaan a panuli a bato. Gapu ta daytoy ti mangbagkat iti dagsen ti dadduma pay a paset ti pasdek, nasken a solido, natibker, ken mapagpannurayan ti kangrunaan a panuli a bato (kitaen iti “The Cornerstone,” Ensign, Jan. 2016, 74–75).

Ti kabal ti Dios.

Sibabarikes iti kinapudno:Mayarig daytoy a pedaso ti kabal iti maysa a sinturon a naibarikes iti aglawlaw ti siket. Ti balikas a naibarikes mabalin a kaipapananna pay ti napabileg, napapigsa, wenno napatibker.

Kabal ti kinalinteg:Ti kalasag ket magsaluad iti puso ken dadduma pay a napapateg a paset ti bagi.

Naitapar iti dapan ti pannakaisagana ti ebanghelio ti kappia:Maitudo daytoy iti nasaluad a panangkalub iti saka ti soldado.

Ti kalasag ti pammati:Ti saripda ket mabalin a mangsaluad iti dumani ania man a paset ti bagi manipud iti nadumaduma a panagdarup.

Bistukol ti pannakaisalakan:Ti bistukol ket mangsaluad iti ulo.

Ti kampilan ti EspirituTi espada ket mangpalugod kadatayo nga agtignay a maibusor iti kabusor.

Panangpadur-as iti Panangisurotayo

Agkagumaan para iti ayat a kas ken ni Cristo. Dagiti pannakilangenmo kadagiti sursuruam ket nasken a maparegta iti ayat. Mabendisionankanto ken dagiti sursuruam no agkararagka tapno mapadur-as ti ayat a kas ken ni Cristo ket agkalikagumka a manggun-od kadagiti wagas a mangipakita iti daytoy (kitaen iti Panagisuro iti Wagas ti Mangisalakan, 6; Moroni 7:48).