Oktubre 9–15

Taga Filipos; Taga Colosas

“Maaramidko ti Amin a Bambanag gapu ken Cristo a Mamapigsa Kaniak”

Rugian babaen ti panagbasa iti Taga Filipos ken Taga Colosas, ken nainkararagan nga utobem ti doktrina a kayat ti Apo nga isurom. Agpaiwanwanka iti Espiritu bayat ti panangibilangmo kadagiti saludsod ken resources a mabalinmo nga usaren a mangisuro iti daytoy a doktrina.

Yawis ti Panagbibinninglay

Awisen dagiti miembro ti klase a mangibinglay iti maysa a balikas wenno ragup ti balikas a manggupgop no ania ti nasursuroda manipud iti Taga Filipos ken Taga Colosas ket kalpasanna ilawlawagda no apay a pinilada dayta a balikas wenno ragup ti balikas. Allukoyen ida a mangiburay kadagiti bersikulo iti nasantuan a kasuratan kas paset ti panangilawlawagda.

Isuro ti Doktrina

Taga Filipos 2:1–5, 14–18; 4:1–9; Taga Colosas 3:1–17

Agbalintayo a “baro” bayat ti panangibiagtayo iti ebanghelio ni Jesucristo.

• Mabalin a kayatmo a tulongan dagiti miembro ti klase a mangiladawan iti panunotda no ania ti kaipapanan ti “uksobenyo ti tao a daan” ken “ikawesyo ti tao a baro” babaen ken ni Jesucristo (Taga Colosas 3:9–10). Tapno maaramid daytoy, mabalinmo nga ipakita ti sakbay ken kalpasan a ladladawan ti maysa banag a daan a napabaro (kas iti maysa a piraso ti alikamen, maysa a balay wenno maysa a bisikleta). Mabalin a paglilinnawagan dagiti miembro ti klase no kasano nga agbalintayo a “baro” babaen ti pammati ken ni Jesucristo ken ti kinatallugodtayo nga agbiag iti ebangheliona. Kas paset iti daytoy a panaglilinawag, idawatmo iti kagudua ti klase nga adalenda ti Taga Filipos 2:1–5, 14–18; 4:1–9 ken ti sabali pay a kagudua ti klase adalenda met ti Taga Colosas 3:1–17, a mangilaslasin kadagiti kababalin ti “daan a tao” ken ti “baro a tao.” Mabalinmo pay nga awisen ti sumagmamano a miembro ti klase a mangibinglay no kasano a ti kaadda ti pammati ken ni Jesucristo ken panagbiag iti ebangheliona ket nakatulong kadakuada nga agbalin a baro a tao.

Taga Filipos 4:1–13

Makasaraktayo iti rag-o ken ni Cristo, ania man dagiti kasasaadtayo.

• Nupay dagiti kasasaadtayo ket maigiddiat iti kasasaad ni Pablo, makasursurotayo amin manipud iti kinaayatna nga agbalin a kontento ken agrag-o iti amin a kasasaad ti biagna. Tapno mairugi ti panaglilinnawag iti daytoy a topiko, mabalinmo nga irebyu ti sumagmamano a pannubok a napadasan ni Pablo (kitaen, kas pagarigan, iti 2 Taga Corinto 11:23–28). Kalpasanna mabalinmo nga idawat kadagiti miembro ti klase a mangrebyu iti Taga Filipos 4:1–13 tapno saraken ti balakad nga inted ni Pablo a makatulong kadatayo nga agrag-o, uray pay kadagiti panawen ti pannubok.

• Nalabit a mabalin nga isalaysay dagiti padas dagiti miembro ti klase idi nariknada “ti talna ti Dios, a daegenna ti amin a pannakaawat” (Philippians 4:7) wenno idi nariknada a napapigsada “gapu ken ni Cristo” (verse 13) tapno maipatungpal ti maysa a banag a saanda koma a naaramid.

• No kayatmo a sukisoken daytoy a topiko iti ad-adu pay, mabalinmo nga idawat iti maysa a miembro ti klase a mangibinglay iti sumagmamano a makaparegta a pakaammuan wenno palawag. manipud iti mensahe ni Presidente Russell M. Nelson “Joy and Spiritual Survival” (Liahona, Nob. 2016, 81–84). Wenno mabalin a buyaen ti klase ti video “Trial of Adversity” (ChurchofJesusChrist.org). Kasano a matunton dagiti tao iti mensahe ni Presidente Nelson wenno ti babai iti video ti ragsak iti likud dagiti rigatda?

• Gapu ta umad-adun ti dakes iti lubong ita, mairanudto dagiti miembro ti klasem manipud iti balakad ni Pablo nga “agpanunot maipapan” kadagiti banag a nadalus, makaay-ayo, ken addaan iti naimbag a damag, kinasingpet, wenno kinadayaw (Taga Filipos 4:8). Nalabit a mabalinmo nga idutok iti tunggal miembro ti klase (wenno babassit a grupo dagiti miembro ti klase) ti maysa kadagiti kababalin a nakalista iti Taga Filipos 4:8 wenno Pagannurotan ti Pammati 1:13. Mabalin nga usaren ti tunggal maysa ti Topical Guide tapno agsapulda kadagiti nasantuan a kasuratan maipapan iti naidutok kadakuada a kababalin ken ibinglayda iti klase no ania ti nasarakanda. Mabalinda pay nga ibinglay dagiti padas maipapan iti dayta a kababalin iti biag dagiti tao. Kasano a “tun-oyentayo dagitoy a banag”?

Taga Colosas 1:12–23; 2:2–8

No “maparamuttayo” ken ni Jesucristo, mapapigsatayo a maibusor kadagiti nailubongan nga impluensia.

• Ti pammaneknek ni Pablo iti Mangisalakan a masarakan iti Taga Colosas 1:12–23; 2:2–8 ket mangted iti napintas a gundaway para kadagiti miembro ti klase a mangutob ken mangpapigsa iti pammatida. Mabalin a sukisoken dagiti miembro ti klase a dagitoy a bersikulo tapno mangsarak kadagiti banag a mangpapigsa iti pammatida ken ni Jesucristo. Ania ti kayat a sawen ti “maparamutkayo ken mapadakkelkayo ken ni [Jesucristo]”? (Taga Colosas 2:7). Ti ladawan ti maysa a kayo iti balabala iti daytoy a lawas iti Umaykayo, Sumurot Kaniak—Para kadagiti Indibidual ken Pamilia ken ti video a “Spiritual Whirlwinds” (ChurchofJesusChrist.org) ket makatulong kadagiti miembro ti klase a paglilinnawagan daytoy a bersikulo. Ania ti makapapigsa wenno makapakapsut kadagiti ramut ti maysa a kayo? Kasano a ti “maparamut ken mapadakkel ken ni [Jesucristo]” ket mangpapigsa kadatayo a maibusor kadagiti nailubongan nga impluensia? (kitaen iti Taga Colosas 2:7–8; kitaen met iti Helaman 5:12; Ether 12:4).

• Mabalinmo nga awisen dagiti miembro ti klase a mangilista kadagiti banag iti Taga Colosas 1:12–23; 2:2–8 a mangisuro no ania dagiti mabalin a liklikantayo a “makaallilaw a sursuro” a mabalin a “mangkayaw” iti pammatitayo ken ni Cristo (Taga Colosas 2:8). Kasano a makapagtitinnulongtayo iti tunggal maysa kadagiti panagkagumaantayo a mangsurot iti Mangisalakan ken mangliklik kadagiti panangallilaw ni Satanas?

Panangpadur-as iti Panangisurotayo

Usaren ti musika. Ti sagrado a musika ti mangyawis iti impluensia ti Espiritu Santo. Makaparnuay daytoy iti naraem nga aglawlaw ken mangparegta iti panagkumit ken tignay. Ibilangmo no kasano nga agbalin a paset ti klasem ti “panagsisinnuro ken panagbibinnanalakad babaen kadagiti salmo ken himno” (Taga Colosas 3:16; kitaen met iti Panangisuro iti Wagas ti Mangisalakan, 22).