puente a pagbuniagan iti templo

Septiembre 4–10

1 Taga Corinto 14–16

“Ti Dios Saan a Dios ti Riri, No Di ti Talna”

Sakbay ti panangrebyu iti daytoy a balabala, basaen iti 1 Taga Corinto 14–16. Isuratmo dagiti umuna nga impresionmo maipapan iti no ania dagiti kinapudno a mangtulongto kadagiti miembro ti klasem, ken agtultuloy nga agkalikagum a manggun-od iti nayon pay a pannarabay manipud iti Espiritu bayat ti panagisaganam a mangisuro.

icon iti panagbibinninglay

Yawis ti Panagbibinninglay

Mangted iti sumagmamano a minuto nga irebyu dagiti miembro ti klase ti 1 Taga Corinto 14–16 ket sarakenda ti maysa a bersikulo a mariknada a napateg unay. Awisem ida a mangsapul iti maysa a tao iti klase a mabalinda a pangibinglayan iti bersikuloda ket ilawlawagda no apay a pinilida daytoy.

icon iti panangisuro

Isuro ti Doktrina

1 Taga Corinto 14

No agguummongtayo a sangkamaysa, nasken nga itandudotayo ti tunggal maysa.

• Ibilangmo ti panangusar kadagiti pannursuro ni Pablo iti 1 Taga Corinto 14 a mangipalagip kadagiti miembro ti klase a makaitandudotayo amin—wenno makatulong ken makaitag-ay—iti tunggal maysa iti simbaan. Maysa a simple a wagas a mangrebyu iti daytoy a kapitulo ket ti mangisurat iti maysa a saludsod iti pisarra, a kas iti Ania ti nasken a panggeptayo a tun-oyen no agguummongtayo a sangkamaysa? Awisem dagiti miembro ti klase nga agsukisok kadagiti mabalin a sungbat iti 1 Taga Corinto 14. Masarakan dagiti dadduma pay a kapanunotan iti Moroni 6:4–5 ken Doktrina ken Katulagan 50:17–23. Bayat ti panangibinglay dagiti miembro ti klase no ania ti nasarakanda, ibilang ti panagsaludsod kadakuada no kasano ti mariknada iti ar-aramiden ti klasem iti panangipatungpal kadagitoy a panggep a tun-oyen. Mabalinda pay nga ibinglay dagiti padas a nakariknaanda iti pannakaparegta iti maysa a banag nga imbinglay ti maysa a miembro ti klase.

1 Taga Corinto 15

Gapu ta nagungar ni Jesucristo, agungartayonto amin.

• Kasano ti panangusarmo iti pammaneknek ni Pablo iti 1 Taga Corinto 15 tapno mapapigsa ti pammaneknek dagiti miembro ti klasem maipapan iti Panagungar? Maysa a wagas ket mabalin a bingayen ti klase iti dua a grupo ket pasarak iti maysa a grupo iti 1 Taga Corinto 15 dagiti bunga ti pakaipasanguantayo koma no saan a nagungar ni Jesucristo. Mabalin a saraken ti sabali pay a grupo dagiti bendision nga awatentayo gapu iti Panagungarna. Kalpasanna isurat ti tunggal grupo iti pisarra no ania ti nasursuroda. Ania dagiti mabalin pay a mainayon iti listaanda kalpasan ti panangbasada iti palawag ni Elder D. Todd Christofferson iti “Dagiti Nainayon a Resources”? Tapno matulongan dagiti miembro ti klase a makarikna iti Espiritu kabayatan daytoy a panangilawlawag, ibilang ti panangi-display iti maysa a ladawan ti nangungar a Mangisalakan (kitaen iti balabala itoy a lawas iti Umaykayo, Sumurot Kaniak—Para kadagiti Indibidual ken Pamilia) wenno agpatukar wenno agkanta iti maysa a himno maipapan iti Panagungar.

• Gapu iti panangsungbat ni Pablo kadagiti tao a saan a mamati iti panagungar, mabalin a pagimbagan ti klasem iti panangyakemda iti isu met la a situasion. Kas pagarigan, kasano a mapapigsada ti pammati ti maysa nga ipatpateg iti Panagungar? Ania ti masarakantayo iti 1 Taga Corinto 15 a makatulong kadatayo a mangilawlawag iti panagkasapulan ken pakakitaan ti Panagungar ni Jesucristo? Ania dagiti dadduma pay a nasantuan a kasuratan a mausartayo? (Kitaen, kas pagarigan, iti Lucas 24:1–12, 36–46; Alma 11:42–45.)

  singising ti init

  Insuro ni Pablo maipanggep iti Panagungar babaen iti panangdakamatna iti “ bagbagi a nailangitan” a kas iti init (1 Taga Corinto 15:40).

• 1 Taga Corinto 15 ti maysa kadagiti sumagmamano a lugar iti nasantuan a kasuratan a nakadakamatan dagiti panagbuniag para kadagiti natay (kitaen iti bersikulo 29; kitaen met iti Doktrina ken Katulagan 128:18). Nalabit a mabalin nga ibinglay dagiti miembro ti klase ti ragsak a napadasanda kabayatan ti panangannong kadagiti panagbuniag wenno iti dadduma pay nga ordinansa para kadagiti kapuonanda. Apay a mabalin nga inbasar ni Pablo dagiti panagbuniag para kadagiti natay a kas pakakitaan ti Panagungar? No makatulong tapno mailawlawag no apay a kasapulan ti panangbuniag kadagiti natay, kitaen iti artikulo iti Gospel Topics “Baptisms for the Dead” (topics.ChurchofJesusChrist.org). Ti video a “Glad Tidings: The History of Baptisms for the Dead” (ChurchofJesusChrist.org) ti mangilawlawag no kasano a naisubli daytoy a pagbatayan iti panawentayo.

resources icon

Dagiti Nainayon a Resources

Kinapateg ti Panagungar.

Insuro ni Elder D. Todd Christofferson:

“Ibilangmo iti apagkanito ti kinapateg ti Panagungar iti panangrisut iti umuna ken kangrunaan ti amin iti pudno a kinatao ni Jesus iti Nazaret ken dagiti nakaro a panagsusupiat ken panagduadua iti pilosopia maipapan iti biag. No pudno a nagungar ni Jesus, ngarud Isu ti nadiosan a nabiag. Awan ti gagangay a mortal nga addaan iti pannakabalin iti bagina nga agbiag manen kalpasan ti ipapatayna. Gapu ta nagungar Isuna, saan koma a nakapagbalin nga allawagi, mannursuro, rabbi, wenno propeta laeng ni Jesus. Gapu ta nagungar Isuna, nasken a nagbalin idi a Dios ni Jesus, uray ti Bugbugtong nga Anak ti Ama.

“Ngarud, pudno ti insurona; saan a makapagulbod ti Dios.

“Ngarud, Isu ti Namarsua ti daga, kas kinunana.

“Ngarud, pudno ti langit ken impierno, kas insurona.

“Ngarud, adda maysa a lubong dagiti espiritu, a sinarungkaranna kalpasan ti ipapatayna.

“Ngarud, umayto manen Isuna, kas kinuna dagiti anghel, ket ‘agturay mismo iti daga.’

“Ngarud, adda panagungar ken maudi a panangukom para iti amin” (The Resurrection of Jesus Christ,”,” Liahona, Mayo 2014, 113).

Panangpadur-as iti Panangisurotayo

Kaam-ammom dagiti sursuruam. Awan dua a tao nga agpadpada ti langada; addaan ti tunggal tao a sursuruam iti naidumduma a nagtaudan, pannirigan, ken sumagmamano a talento. Agkararagka tapno maammuam no kasano a mausarmo dagitoy a makatulong iti pannakiraman dagiti sursuruam. Bayat ti nasaysayaat a pannakaawatmo kadagiti sursuruam, makaparnuayka iti napnuan kaipapanan ken nakallalagip a kanito iti panangisuro para kadakuada (kitaen iti Panangisuro iti Wagas ti Mangisalakan, 7).