Si Pablo nagsulat og epistola

Agosto 7–13

Mga Taga-Roma 1–6

“Ang Gahom sa Dios aron Pagluwas”

Mainampoong mobasa sa Mga Taga-Roma 1–6 nga maghunahuna sa mga sakop sa imong klase. Makatabang kini kanimo nga mahimong sensitibo sa mga pag-aghat sa Espiritu samtang mangandam ka sa pagtudlo.

pagpaambit nga icon

Dapita ang Pagpaambit

Ikonsiderar ang paghatag sa mga sakop sa klase og pipila ka minuto sa pagsiksik sa Mga Taga-Roma 1–6 alang sa bersikulo nga ang Espiritu Santo mitabang kanila nga mas makasabot. Dayon mahimo silang mopaambit sa bersikulo nga ilang gipili ngadto sa usa ka tawo nga naglingkod sa duol.

icon sa pagtudlo

Itudlo ang Doktrina

Mga Taga-Roma 1:16–17

“Dili ko ikaulaw ang Maayong Balita [ni Kristo].”

• Daghang tawo ang nakasinati diin sila gisaway tungod sa ilang tinuohan. Aron matabangan ang mga sakop sa klase kon sila adunay ingon nga mga kasinatian, mahimo nimo silang dapiton sa pagbasa sa Mga Taga-Roma 1:16–17 ug sa paghunahuna og mga higayon gikan sa basahon sa Mga Buhat diin gipakita ni Pablo nga wala niya gikaulaw ang ebanghelyo. Tingali ang mga sakop sa klase makapaambit usab og mga rason nga sila mobati og kaulaw sa ebanghelyo ni Jesukristo. O makapaambit sila og mga kasinatian diin sila o ang uban mipakita nga sila wala maulaw sa ebanghelyo.

  mga sakop sa klase nga miisa sa ilang mga kamot

  Kita mahimong dili maulaw sa pagpaambit sa atong mga pagpamatuod sa ebanghelyo.

Mga Taga-Roma 2:28–29

Ang tinuod nga pagkadisipulo makita diha sa atong kinasingkasing nga pasalig, dili lang sa atong mga lihok.

• Unsaon nato sa pagtimbang-timbang ang atong kaugalingong pagkadisipulo? Ang tambag ni Pablo ngadto sa mga taga-Roma makatabang kanato nga mahinumdom aron matutokan pa “sa kasingkasing [ug] buhat kini sa Espiritu sa Dios,” (Mga Taga-Roma 2:29) kaysa mga buhat nga makita. Aron matabangan ang imong klase nga makasabot sa tambag ni Pablo, mahimo nimong isulat ang teksto gikan sa Mga Taga-Roma 2:28–29 diha sa pisara. Pulihi ang pulong nga Judio og Santos sa Ulahing mga Adlaw ug ang pulong nga sirkunsisyon og ang pakigsaad. Unsa ang madugang niining kausaban ngadto sa atong pagsabot sa mga pagtulun-an ni Pablo? Mahimo usab nga imong hisgotan ang mga ehemplo sa mga butang nga atong gibuhat isip mga miyembro sa Simbahan nga mas makahuloganon ug gamhanan kon mabuhat “sa kasingkasing ug buhat kini sa Espiritu sa Dios,” (Mga Taga-Roma 2:29).

Mga Taga-Roma 3–6

“Diin midaghan ang sala, labaw pang midagaya ang grasya.”

• Unsaon nimo sa pagtabang ang mga sakop sa klase nga masabtan ang mga pagtulon-an ni Pablo mahitungod sa Hugot nga pagtuo, mga buhat, ug grasya? Ikonsiderar ang pagpaambit sa mosunod nga duha ka sitwasyon aron matabangan sila nga makasabot nga dili gyod nato tan-awon ang atong maayong buhat isip usa ka paagi sa pagproweba sa atong katakos, ni atong tan-awon ang grasya ni Kristo isip usa ka rason aron makapangatarungan sa atong mga sayop ug mga sala. Ang mga sakop sa klase makapangita alang sa mga kamatuoran diha sa Mga Taga-Roma 3:20–31; 5:1–2; 6:1–2, 21–23 nga makatabang nilang Gloria ug Justin. Unsa pay ubang kamatuoran diha sa “Dugang nga mga Kapanguhaan” ang makatabang nila aron masabtan ang kaimportante sa matarong nga mga buhat ug sa grasya ni Kristo?

  Sitwasyon 1

  Usa ka higala ginganlan og Gloria mibati nga nabug-atan sa iyang mga paningkamot nga mahimong matinud-anon nga disipulo. Naningkamot siya og maayo sa pagbuhat sa tanang butang nga iyang gibati nga kinahanglan niyang buhaton, apan kasagaran mabalaka siya nga ang iyang mga paningkamot dili igo. “Igo ba ang akong kamaayo?” naghunahuna siya. “Dawaton ba ako sa Ginoo?”

  Sitwasyon 2

  Usa ka higala ginganlan og Justin wala kaayo mabalaka mahitungod sa paghimo og matarong nga mga pagpili. Nagtuo siya ni Jesukristo, nagtambong sa iyang mga miting sa simbahan, ug usa siya ka mahigugmaong amahan ug usa ka buotan nga silingan. Apan, mipili siya nga dili motuman sa mga sumbanan nga makapasarang niya alang sa rekomend sa templo. Sa dihang ang pamilya ug mga higala misulay sa pag-awhag kaniya nga mangandam alang sa templo, mitubag siya, “Maayo man ko nga tawo. Ako adunay pagtuo ni Kristo. Gibayaran na Niya ang bugti sa akong mga sala, ug dili man siguro ko Niya isalikway pagawas sa celestial nga gingharian tungod sa maong ginagmay nga mga problema.”

mga kapanguhaan nga icon

Dugang nga mga Kapanguhaan

Hugot nga pagtuo, grasya, ug mga buhat.

Sitwasyon 1

• Ether 12:27

• Moroni 10:32–33

• J. Devn Cornish, “Igo ba ang Akong Kamaayo? Makasulod Ba Ko Didto?,” Liahona, Nob. 2016, 32–34

• Si Presidente Dieter F. Uchtdorf nagtudlo: “Ang kaluwasan dili makuha pinaagi sa pagkamasulundon; kini gipalit pinaagi sa dugo sa Anak sa Dios. … Ang grasya usa ka gasa sa Dios, ug ang atong tinguha nga magmasulundon sa matag sugo sa Dios mao ang paghatag sa atong mortal nga kamot sa pagdawat niining sagradong gasa gikan sa atong Langitnong Amahan” (Ang Gasa sa Grasya,” Liahona, Mayo 2015, 109–10).

Sitwasyon 2

• Santiago 2:17–26

• Helaman 12:23–24

• D. Todd Christofferson, “Magpabilin Kamo sa Akong Gugma;” Liahona, Nob. 2016, 48–51

• Si Presidente Uchtdorf nagtudlo: “Kon ang grasya gasa sa Dios, nan ngano nga ang pagsunod sa mga sugo sa Dios importante kaayo? Nganong maghasol sa mga sugo sa Dios—o sa paghinulsol, tungod lang nianang butanga? … Ang atong pagkamasulundon sa mga sugo sa Dios nahimo isip usa ka natural nga resulta sa atong walay katap[o]sang gugma ug pasalamat alang sa kaayo sa Dios. Kini nga matang sa tinuod nga gugma ug pasalamat milagrosong mohiusa sa atong mga buhat sa grasya sa Dios” (“Ang Gasa sa Grasya,” 109).

Pagpalambo sa Atong Pagtudlo

Ang imong tawag dinasig. Isip usa ka magtutudlo, ikaw gitawag sa Ginoo sa pagpanalangin sa Iyang mga anak. Gusto sa Ginoo nga molampos ka, mao nga samtang magpakabuhi ka nga takos sa Iyang tabang, mohatag Siya kanimo sa pagpadayag nga imong gitinguha. (Tan-awa sa Pagtudlo sumala sa Pamaagi sa Manluluwas, 5.)