Si Pablo diha sa bilanggoan

Hulyo 31–Agosto 6

Mga Buhat 22–28

“Usa ka Tigpangalagad ug usa ka Saksi”

Basaha ang Mga Buhat 22–28 uban sa pag-ampo diha sa imong kasingkasing nga ang Espiritu Santo modasig kanimo kon unsay tutokan nga makatabang sa mga sakop sa imong klase. Irekord ang bisan unsang mga ideya nga mosantop sa hunahuna; mahimo nga kini maoy sinugdanan sa imong plano sa pagtudlo.

pagpaambit nga icon

Dapita ang Pagpaambit

Hangyoa ang mga sakop sa klase sa pagsulat sa pakisayran sa kasulatan gikan sa Mga Buhat 22–28 nga nakapadani nila karong semanaha. Pundoka ang ilang mga tubag ug basaha ang pipila sa mga bersikulo. Dapita ang pipila ka sakop sa klase sa pagpaambit kon nganong kini nga mga bersikulo makahuluganon ngadto kanila.

icon sa pagtudlo

Itudlo ang Doktrina

Mga Buhat 22:1–21; 26:1–29

Ang pagpamatuod usa ka pamahayag sa kamatuoran base sa personal nga kahibalo o gituohan.

• Ang pagpamatuod ni Pablo ngadto nila ni Festo ug Hari Agripa mahimong usa ka oportunidad sa paghisgot kon unsay buot ipasabot sa paghatag og pagpamatuod. Mahimo nimong hangyoon ang mga sakop sa klase sa pagrebyo sa Mga Buhat 22:1–21 ug 26:1–29. Unsay atong makat-onan gikan sa ehemplo ni Pablo mahitungod sa paghatag og pagpamatuod? Unsa ang dugang nga mga baroganan mahitungod sa paghatag og pagpamatuod ang atong makat-onan gikan sa pamahayag ni Elder M. Russell Ballard diha sa “Dugang nga mga Kapanguhaan”? Ang pagkanta o pagtukar sa himno nga “Pagpamatuod” (Mga Himno, nu.81) mahimong makatabang sa pagdala sa Espiritu ngadto sa inyong panaghisgotan.

• Bisan kon wala magtinguha si Pablo sa espirituwal nga pagsaksi nga iyang nadawat didto sa dalan paingon sa Damasco, gigahin niya ang nahabilin sa iyang kinabuhi sa pagtrabaho nga mapabilin ug mapanalipdan ang iyang pagpamatuod (tan-awa sa Mga Buhat 22:10, 14–16; 26:19). Ang ehemplo ni Pablo makatabang nga masabtan sa imong klase nga ang pagpamatuod nagkinahanglan og buhat ug sakripisyo. Aron sa pagsugod og usa ka panaghisgotan mahitungod niini, tingali ang usa ka sakop sa klase mahimo nga mohulagway sa iyang paningkamot nga mahimong usa ka hanas nga musikero, artist, o atleta. Sa unsang paagi nga ang pagpalambo sa maong kahanas susama sa pagbaton ug pagpalig-on sa pagpamatuod? Unsa nga mga paningkamot ang kinahanglan natong himoon aron makabaton ug makapalig-on sa pagpamatuod? (tan-awa usab sa Alma 5:46).

Mga Buhat 26:9–23

Kita adunay responsibilidad sa pagpangalagad sa uban.

• Gitawag sa Ginoo si Pablo aron mahimong “usa ka tigpangalagad” (Mga Buhat 26:16), apan unsa may gipasabot niini nga pulong? Aron matabangan ang mga sakop sa klase sa pagsuhid kon sa unsang paagi nga sila makapangalagad ngadto sa uban, aduna o walay pormal nga buluhaton, mahimo nimong isulat diha sa pisara ang usa ka pangutana sama sa Unsa may gipasabot sa pagpangalagad? Dapita ang mga sakop sa klase sa pagpangita og mga tubag diha sa mosunod nga mga kapanguhaan: Mateo 20:25–28; Mga Buhat 26:16–18; 3 Nephi 18:29–32; Jean B. Bingham, “Pagpangalagad sama sa Gibuhat sa Manluluwas,” Liahona, Mayo 2018, 104–7. Samtang mopaambit sila sa unsay ilang nakit-an, awhaga sila sa paghisgot og mga paagi nga makapangalagad kitang tanan sa uban, lakip na diha sa atong mga calling sa Simbahan.

Mga Buhat 27

Kon mopatalinghog kita sa mga propeta sa Ginoo, Siya mogiya ug manalipod kanato gikan sa daotan.

• Dapita ang mga sakop sa klase sa paghisgot mahitungod sa tubag sa kapitan sa mga sundalo sa dihang si Pablo nanagna nga ang barko adunay “dakong kadaot” ug mga kinabuhi mawala (tan-awa sa Mga Buhat 27:10–11). Ngano kaha nga mibati og ingon niana ang kapitan sa mga sundalo? Tingali ang mga sakop sa klase makapaambit kon unsa kaha ang ilang masulti ngadto sa kapitan sa mga sundalo aron matabangan siya nga makabaton og hugot nga pagtuo sa panagna ni Pablo. Unsa pay laing mga leksiyon ang atong makat-onan gikan sa Mga Buhat 27 mahitungod sa pagsunod sa mga sulugoon sa Ginoo? Ang ubang mga sakop sa klase mahimong adunay mga kasinatian sa dihang misunod sila sa direksiyon sa mga propeta bisan kon lahi kini gikan sa mga opinyon sa mga tawo sa ilang palibot. Dapita ang pipila ka sakop sa klase sa pagpaambit sa ilang mga kasinatian.

mga kapanguhaan nga icon

Dugang nga mga Kapanguhaan

Paghatag og pagpamatuod.

Si Elder M. Russell Ballard namulong mahitungod sa pagpamatuod ni Pablo atubangan ni Hari Agripa ug nagtudlo kon unsay gipasabot niini ngari kanato kon unsa ang kahulogan niining paghatag og pagpamatuod alang kanato:

“Ang atong mga miting sa pagpamatuod [testimony meetings] kinahanglang magsentro kabahin sa Manluluwas, sa mga doktrina sa ebanghelyo, sa mga panalangin sa Pagpahiuli, ug sa mga pagtulon-an sa mga kasulatan. Kinahanglang atong pulihan ang mga istorya, pagsugilon sa kaagi, ug mga lektyur sa lunsay nga mga pagpamatuod. Kadtong gisaligan sa pagpamulong ug sa pagtudlo diha sa atong mga miting kinahanglang mobuhat sa ingon uban sa gahom sa doktrina nga madungog ug mabati, mobayaw sa mga espiritu ug makabalaan sa atong mga katawhan. …

“… Samtang maayo gayod sa kanunay ang pagpadayag og gugma ug pasalamat, ang mao nga pagpadayag wala makahatag sa matang sa pagpamatuod nga makapasiga og kalayo diha sa mga kinabuhi sa uban. Ang paghatag og pagpamatuod mao ‘ang pagsaksi pinaagi sa gah[o]m sa Espiritu Santo; sa paghimo og ligdong nga deklarasyon sa kamatuoran nga gibase sa personal nga kahibalo o pagtuo’ [Ang Giya ngadto sa mga Kasulatan, “Pagpamatuod,” scriptures.ChurchofJesusChrist.org]. Ang klaro nga pamahayag sa kamatuoran makahatag og kalainan sa mga kinabuhi sa katawhan. Mao kana ang makapausab sa mga kasingkasing. Mao kana ang ikumpirmar sa Espiritu Santo diha sa mga kasingkasing sa mga anak sa Dios” (“Lunsay nga Pagpamatuod,” Liahona, Nob. 2004, 41).

Pagpalambo sa Atong Pagtudlo

Pangandam daan. “Samtang mamalandong ka kon sa unsang paagi ang mga baroganan sa ebanghelyo nga imong gitudlo mopanalangin sa mga sakop sa imong klase, ang mga ideya ug mga pag-aghat moabot sa kada adlaw sa imong kinabuhi—samtang mopadulong ka sa trabaho, magbuhat sa mga buluhaton sa balay, o makig-istorya sa pamilya ug mga higala. Ayaw hunahunaa ang espirituhanong pagpangandam isip usa ka butang nga gahinan nimo og panahon apan isip usa ka butang nga kanunay nimong gibuhat” (Pagtudlo sumala sa Pamaagi sa Manluluwas, 12).