“Agosto 14–20. Mga Taga-Roma 7–16: ‘Dag-a ang Da[o]tan pinaagi sa Maayo’” Dali, Sunod Kanako—Alang sa Sunday School: Bag-ong Tugon 2023 (2022)
“Agosto 14–20. Mga Taga-Roma 7–16,” Dali, Sunod Kanako—Alang sa Sunday School: 2023
Agosto 14–20
Mga Taga-Roma 7–16
“Dag-a ang Da[o]tan pinaagi sa Maayo”
Basaha ang Mga Taga-Roma 7–16, ug irekord ang mga impresyon nga imong madawat kon unsaon sa pagtabang ang mga sakop sa imong klase nga makakat-on gikan sa mga kasulatan. Samtang imong pamalandongan ang imong mga impresyon kini mosangpot ngadto sa makahuloganon nga mga kalihokan sa pagkat-on.
Dapita ang Pagpaambit
Ikonsiderar ang pagbasa sa Mga Taga-Roma 10:17 ug 15:4 ug hangyoa ang mga sakop sa klase sa pagpaambit og mga kasulatan gikan sa Mga Taga-Roman 7–16 nga makapalig-on sa ilang hugot nga pagtuo diha ni Jesukristo o makahatag kanila og paglaom.
Itudlo ang Doktrina
Kita mamahimong “isig ka manununod uban kang Kristo.”
-
Isip mga Santos sa Ulahing mga Adlaw, mituo kita nga ang mga pulong sama sa “mga manununod sa Dios” ug “mga isigkamanununod uban kang Kristo” nagpasabot nga pinaagi sa tabang ni Jesukristo, mahimo kitang mahisama sa Langitnong Amahan ug makadawat sa tanan nga anaa Kaniya (Mga Taga-Roma 8:17; tan-awa usab sa Doktrina ug mga Pakigsaad 132: 20–21). Aron matabangan ang mga sakop sa klase nga makita kon sa unsang paagi kining doktrina gitudlo sa tibuok kasulatan, mahimo nimo silang dapiton nga magpares-pares o maghimo og gagmayng grupo ug magtuon og pipila sa mga kasulatan nga nalista diha sa “Dugang nga mga Kapanguhaan.” Dayon ang mga sakop sa klase makapaambit kon unsa ang ilang nakat-onan kon ngano nga kining doktrina importante kaayo.
-
Ang analohiya nga gihatag ni Elder DallinH. Oaks diha sa “Dugang nga mga Kapanguhaan” makatabang sa mga sakop sa klase sa paghisgot kon unsaon nato pag-andam aron mahimong “mga manununod sa Dios” (Mga Taga-Roma 8:17). Unsa ang pipila ka “mga balaod ug mga baroganan” nga gipasabot ni Elder Oaks? Unsay kalainan nga mahimo niini sa atong kinabuhi nga masayod nga mamahimo kitang “mga manununod sa Dios, ug mga isigkamanununod uban kang Kristo”? (Mga Taga-Roma 8:17).
“Kinsa ba ang makapahimulag kanato gikan sa gugma ni Kristo?”
-
Ang paghisgot og dungan sa Mga Taga-Roma 8 makahatag og oportunidad nga makatabang sa mga sakop sa klase nga mobati sa gugma sa Manluluwas. Ikonsiderar ang pagpakita og usa ka hulagway ni Jesukristo (tan-awa sa latid karong semanaha diha sa Dali, Sunod Kanako—Alang sa mga Indibidwal ug mga Pamilya) samtang magbasa ka sa Mga Taga-Roma 8:18, 28, 31–39 isip usa ka klase. Mahimo nimong dapiton ang mga sakop sa klase sa pagpaambit og bisan unsang mga hunahuna o mga pagbati nga ilang naangkon human sa pagbasa niining mga bersikulo. Ang uban tingali andam sa pagpaambit kon giunsa nila pagbaton og mga pagpamatuod bahin sa mga kamatuoran nga ilang nakit-an dinhi niining mga bersikulo.
Ang tanang sugo sa Dios matuman diha sa sugo sa paghigugma.
-
Aron matabangan ang mga sakop sa klase nga makita kon sa unsang paagi nga ang tanang sugo “gipasabot sa mubo nga paagi” diha sa sugo sa paghigugma sa imong silingan (Mga Taga-Roma 13:9), dapita sila sa paghimo og usa ka lista diha sa pisara sa tanang sugo nga ilang mahunahunaan. Basaha og dungan ang Mga Taga-Roma 13:8–10 ug Mateo 22:36–40, ug hisgoti isip usa ka klase ang relasyon tali sa paghigugma sa Dios ug sa atong silingan ug ang pagsunod sa matag usa sa mga sugo nga nalista diha sa pisara. Sa unsang paagi nga kining kamatuoran makapausab sa paagi sa atong paghunahuna mahitungod sa mga sugo ug pagkamasulundon? Pananglitan, Unsa man ang gisugyot niining sambingay mahitungod sa katuyoan sa kasugoan?
“Kinahanglan dili … kita maghinukmanay ang usa sa usa.”
-
Aron sa paghatag og pipila ka konteksto sa Mga Taga-Roma 14, mahimo nimong hisgotan nga ang uban sa mga Santos nga taga-Roma nakiglalis sa usag usa mahitungod sa mga buhat sa kultura, sama sa pamatasan sa pagpangaon ug mga pagsaulog sa mga holiday. Unsa nga susamang mga sitwasyon ang atong giatubang karon? Tingali ang mga sakop sa klase mahimong mobasa sa Mga Taga-Roma 14 ug mohatag og usa ka minubo nga kapahayag bahin sa tambag ni Pablo. Unsa nga tambag ang atong mapaambit sa usag usa kon unsaon sa paglikay nga mahimong mahukmanon? Tingali ang mga sakop sa klase makakita og mga ideya diha sa mensahe ni Presidente Dieter F. Uchtdorf “Ang Maloloy-on Magadawat og Kalooy,” Liahona, Mayo 2012, 70–77.
Dugang nga mga Kapanguhaan
Ang Pagdawat sa “tanan nga iya sa akong Amahan” (Doktrina ug mga Pakigsaad 84:38).
Si Presidente Dallin H. Oaks misaysay sa mosunod nga sambingay:
“Usa ka adunahan nga amahan nasayod nga kon itugyan niya ang iyang katigayunan ngadto sa usa ka anak nga wala pa mapalambo ang gikinahanglan nga kaalam ug kahamtong, ang kabilin tingali masayang lang. Miingon ang amahan ngadto sa iyang anak:
“‘Ang tanang anaa nako akong gitinguha nga ihatag nimo—dili lang ang akong katigayunan, apan ang ako usab nga posisyon ug kahimtang taliwala sa katawhan. Kanang unsay anaa nako dali ra nakong mahatag nimo, apan kanang unsa ko kinahanglan gayod nimong maangkon sa imong kaugalingon. Makwalipikado ka alang sa imong kabilin pinaagi sa pagkat-on kon unsay akong nakat-onan ug pinaagi sa pagpuyo sama sa akong pagpuyo. Akong ihatag kanimo ang mga balaod ug mga baroganan pinaagi diin akong naangkon ang akong kaalam ug kahimtang. Sunda ang akong ehemplo, mobuntog sa unsay akong nabuntog, ug mahimo ka kon unsa ko, ug ang tanan nga anaa nako maimo’” (“The Challenge to Become,” Ensign, Nob. 2000, 32).
Pagpalambo sa Atong Pagtudlo
Pangita og mga kapanguhaan nga mosuporta sa mga baroganan. Agig dugang sa mga ideya sa pagtudlo niining latid, mahimo nimong usbon ang mga kalihokan gikan sa latid karong semanaha diha sa Dali, Sunod Kanako—Alang sa mga Indibidwal ug mga Pamilya aron gamiton sa imong klase. (Tan-awa usab sa Pagtudlo sumala sa Pamaagi sa Manluluwas, 17–18.)