E vola tiko o Paula e dua na ivola

7–13 ni Okosita

Roma 1–6

“Na Kaukauwa ni Kalou Me Veivakabulai”

Wilika ena masumasu na Roma 1–6 ka vakananumi ira tiko na nomu lewe ni kalasi. Oqo ena vukei iko mo yadrava tiko na veivakauqeti ni Yalo nio vakarau veivakavulici.

ivakatakilakila ni veiwasei

Sureta na Veiwasei

Vakasamataka mo solia vei ira na lewe ni kalasi e vica na miniti me ra vakasaqara ena Roma 1–6 e dua na tikina e vukei ira kina na Yalo Tabu me ra kila vakavinaka cake. Mera qai wasea vua e dua e voleka na tikina era sa digitaka.

ivakatakilakila ni veivakavulici

Vakavulica na iVunau

Roma 1:16–17

“Niu sa sega ni maduataka na itukutuku vinaka kei Karisito.”

• E vuqa na tamata era sa sotava oti na gauna era vakalialiai kina ena vuku ni nodra vakabauta. Me ra vukei na lewe ni kalasi ena gauna era sotava kina na veika vaqori, sureti ira mera wilika na Roma 1:16–17 ka vakananuma na gauna eso ena ivola ni Cakacaka a vakaraitaka kina o Paula ni sa sega ni madualaka na kosipeli. De rairai e rawa ni ra wasea talega na lewe ni kalasi na vuna era sega ni dau madualaka kina na kosipeli i Jisu Karisito. Se e rawa ni ra wasea na veigauna eso era a vakaraitaka kina o koya kei ira tale eso na nodra sega ni madualaka na kosipeli.

  era laveliga na lewe ni kalasi

  E rawa ni da sega ni madualaka meda wasea na noda ivakadinadina ni kosipeli.

Roma 2:28–29

Na bula vakatisaipeli dina sa kunei ga e lomada dina, sega walega ena noda cakacaka.

• Eda na dikeva vakacava na noda dui bula vakatisaipeli? Na ivakasala i Paula vei ira na kai Roma e rawa ni vukei keda me da nanuma me da vakanamata vakalevu cake ena “loma [kei na] yalo” (Roma 2:29) mai na ivalavala e taudaku. Me vukea nomu kalasi mera kila vinaka na ivakasala i Paula, mo vola na vosa mai na Roma 2:28–29 ena vava. Sosomitaka na vosa Jiu ena Yalododonu Edaidai kei na vosa cili ena veiyalayalati. E kuria vakacava na veisau oqo ki na noda kila vinaka na ivakavuvuli i Paula? Sa rawa me veivosakitaki talega na veika eda cakava tiko na lewe ni Lotu era sa vakaibalebale ka kaukauwa cake ni da vakayacora me “ka ni yalo” (Roma 2:29).

Roma 3–6

“Ia ni sa uasivi mai na ivalavala ca, sa qai uasivi cake vakalevu sara na loloma.”

• O na vukei ira vakacava na lewe ni kalasi mera kila vinaka na ivakavuvuli i Paula me baleta na vakabauta, cakacaka, kei na loloma soliwale? Sa rawa mo vakaraitaka e rua na ivakaraitaki oqo mera vukei na kalasi mera kila ni sega ni dodonu meda raica na noda cakacaka vinaka e sega ni ivakadinadina ni noda bula kilikili, se meda raica na loloma soliwale i Karisito me ulubale ni noda caka cala se ivalavala ca. Sa rawa vei ira na lewe ni kalasi mera vakasaqara na dina ena Roma 3:20–31; 5:1–2; 6:1–2, 21–23 a rawa me vukei Gloria kei Justin. Na dina vakaivunau cava tale ena “iKuri ni iVurevure” ena vukei ira na lewe ni kalasi mera kila vinaka na bibi ni cakacaka dodonu kei na nuitaki ni loloma veivueti i Karisito?

  iVakaraitaki 1

  E dua na itokani na yacana o Gloria e vuabale ena nona sasaga me tisaipeli yalodina. A cakacaka vakaukauwa me cakava na veika kece a nanuma me vakayacora, ia e dau lomaleqataka ni takiveiyaga na nona sasaga. “Au sa vinaka cake beka?” a vakasamataka. “Ena ciqomi au beka na Turaga?”

  iVakaraitaki 2

  E dua na itokani yacana o Justin e sega ni dau lomaleqataka vakalevu me digidigi dodonu. E vakabauti Jisu Karisito, ka dau tiko ena soqoni ni Lotu, ka dua na tama dauloloma ka veiwekani vinaka. Ia, a sega ni digitaka me bulataka na ivakatagedegede me rawata kina e dua na ivolatara ni valetabu. Ni ra saga na matavuvale kei na itokani mera vakayaloqaqataki koya me vakavakarau yani ki valetabu, a sauma mai, “Au tamata vinaka. Au vakabauta na Karisito. Sa sauma oti o Koya na isau ni noqu ivalavala ca, kau sega ni vakabauta ni na kauti au tani mai na matanitu silesitieli ena vuku ga ni so na cala lalai.”

ivakatakilakila ni ivurevure

iKuri ni iVurevure

Na vakabauta, loloma soliwale, kei na cakacaka.

iVakaraitaki 1

• Ica 12:27

• Moronai 10:32–33

• J. Devn Cornish, “Au sa Vinaka Li? Au na Rawata Li?,” Liaona, Nove. 2016, 32–34

• Vakavuvulitaka o Peresitedi Dieter F. Uchtdorf: “Ena sega ni rawa me voli na veivakabulai ena ilavo ni talairawarawa; e voli ena nona dra na Luve ni Kalou. … “Sa isolisoli ni Kalou na loloma soliwale, kei na noda gagadre meda talairawarawa ki na ivakaro yadudua ni Kalou sai koya na dolele yani ni ligada vakatamata meda ciqoma na isolisoli tabu oqo mai vei Tamada Vakalomalagi” (“Na iSolisoli ni Loloma Soliwale ni Kalou,”,” Liaona, Me 2015, 109–10).

iVakaraitaki 2

• Jemesa 2:17–26

• Ilamani 12:23–24

• Raica na D. Todd Christofferson, “Tikoga Ena Noqu Loloma,” Liaona, Nove. 2016, 48–51

• E vakatavulica o Peresitedi Uchtdorf: “Kevaka me sa isolisoli ni Kalou na loloma soliwale, na cava na vuna e sa rui bibi kina na talairawarawa ki na ivunau ni Kalou? Cava meda kauwaitaka kina na ivunau ni Kalou—se veivutuni, ena ka oya? … Na noda talairawarawa ki na ivakaro ni Kalou sa yaco me vua ni noda loloma tawayalani kei na vakavinavinakataka na nona vinaka na Kalou. Na ivakarau dina vakaoqo ni loloma kei na vakavinavinaka ena sema vata ena cakamana na noda cakacaka kei na loloma soliwale ni Kalou” (“The Gift of Grace,” 109).

Vakatoroicaketaki Noda Veivakavulici

Na nomu sa kacivi sa yaco ena veivakauqeti. Ena nomu i tutu vaka-qasenivuli, o sa kacivi mai vua na Turaga mo vakalougatataki ira na Luvena. E gadreva na Turaga mo bulaqaqa, niobula kilikili kaya na Nona veivuke, ena solia o Koya vei iko na ivakatakila o vakasaqara tiko. (Raica na Veivakavulici ena iVakarau ni iVakabula, 5.)