31 ni Jiulai–6 ni Okosita

Cakacaka 22–28

“Me iTalatala ka iVakadinadina”

Wilika na Cakacaka 22–28 ena yalo masumasu me na vakauqeti iko na Yalo Tabu mo kila na ka mo raica matua me na vukea nomu lewe ni kalasi. Vola na vakasama e yaco mai; ka sa rairai tekivu ni nomu ituvatuva ni veivakavulici.

Sureta na Veiwasei

Kerea na lewe ni kalasi mera vola e dua na tiki ni ivolanikalou mai na Cakacaka 22–28 a vakauqeti ira ena macawa oqo. Kumuna na nodra isaunitaro ka wilika vata e vica na tikina. Sureta e vica na lewe ni kalasi mera wasea na vuna e vakaibalebale kina vei ira na veitikina oqo.

Vakavulica na iVunau

Cakacaka 22:1–21; 26:1–29

Na ivakadinadina sai koya na kena vakatakilai raraba na dina e yavutaki ena kila ni tamata yadua se vakabauta.

• Sa rawa kina ivakadinadina nei Paula vei rau o Fesito kei Tui Akaripa me madigi ni kena veivosakitaki kina na ibalebale ni soli ivakadinadina. Sa rawa mo kerei ira na lewe ni kalasi mera taleva lesu na Cakacaka 22:1–21 se 26:1–29. Na cava eda vulica mai na ivakaraitaki i Paula me baleta na soli ivakadinadina? Na ikuri ni ivakavuvuli cava baleta na soli ivakadinadina eda vulica mai na itukutuku i Elder M. Russell Ballard ena “iKuri ni iVurevure”? Lagati se vakatagitaki na serenilotu “Testimony” (Serenilotu, naba 137) me sureta mai na Yalo Tabu kina nomuni veivosaki.

• E dina ga ni sega ni vakasaqara o Paula na ivakadinadina vakayalo a yaco vua ena gaunisala ki Tamasiko, a vakadeitaka tiko ga ena nona bula taucoko me taqomaka na nona ivakadinadina (raica na Cakacaka 22:10, 14–16; 26:19). Na ivakaraitaki i Paula ena vukea na nomu kalasi mera kila vinaka ni gadrevi ena ivakadinadina na cakacaka kei na solibula. Me tekivutaki na veivosaki oqo, sa rawa me vakamacalataka e dua na lewe ni kalasi na nona sasagataka me dua na kena daunivakatagi, daunidroini, se dauniqito. E rawa vakacava me tarai cake na taledi ni kila cecere oqo ka vakatautauvatataki ena vuku ni rawati na ivakadinadina ka vaqaqacotaki? Na sasaga cava meda na cakava meda rawata ka vaqaqacotaka kina e dua na ivakadinadina? (raica talega Alama 5:46).

Cakacaka 26:9–23

Sa noda itavi cecere me da qaravi ira na tamata yadua.

• A kacivi Paula na Turaga me dua na “italatala” (Cakacaka 26:16), ia na cava na ibalebale ni vosa oqo? Me ra vukei na lewe ni kalasi mera dikeva na sala mera veiqaravi kina vei ira eso, ke dua se sega na ilesilesi vakaivola, e rawa nio vola ena vava na taro vakaoqo Na cava na ibalebale ni veiqaravi? Sureti ira na lewe ni kalasi me ra vakaraica na isaunitaro ena ivurevure eso oqo: Maciu 20:25–28; Cakacaka 26:16–18; 3 Nifai 18:29–32; Jean B. Bingham, “Veiqaravi me Vakataka na iVakabula,” Liaona, Me 2018, 104–7. Ni ra wasea na veika era kunea, vakayaloqaqataki ira mera veivosakitaka na sala eda rawa ni qaravi ira kina na tamata, oka kina na veikacivi ena Lotu. Sa rawa talega mo vakaraitaka na vidio “Defenders of the Faith” (ChurchofJesusChrist.org).

Cakacaka 27

Kevaka eda vakamuri ira na parofita ni Turaga, ena dusimaki keda o Koya ka taqomaki keda mai na veika butobuto.

• Sureta na lewe ni kalasi mera veivosakitaka na nona isaunitaro ni turaganivalu ni parofisaitaka o Paula ni na sotava na waqa na “vakacaca levu” ka vakayali na bula (raica na Cakacaka 27:10–11). Na cava beka e vakakina oya na nanuma i koya na turaganivalu? De rawa beka ni ra wasea na lewe ni kalasi na veika era na tukuna vua na turaganivalu me vukei koya me vakabauta na parofisai i Paula. Na cava eda vulica mai na Cakacaka 27 me baleta na nodra vakamuri na italai ni Turaga? Era sotava beka eso na lewe ni kalasi na gauna era muria kina na nodra ivakasala na parofita e dina ga ni duidui mai na nodra dui nanuma na tamata era tu voliti ira tu. Sureta e vica na lewe ni kalasi me ra wasea na veika era sotava.

iKuri ni iVurevure

Cavuti ni ivakadinadina

A vosa o Elder M. Russell Ballard baleta na ivakadinadina i Paula vei Tui Akaripa ka vakavulica na kena ibalebale vei keda meda cavuta na noda ivakadinadina:

“Na noda soqoni ni soli ivakadinadina e dodonu me kena usutu na iVakabula, na ivunau ni kosipeli, na veivakalougatataki ni Vakalesuimai, kei na veivakavulici ni ivolanikalou. E dodonu meda sosomitaka na noda italanoa, veilakoyaki, kei na veivakavulici ena noda ivakadinadina savasava. O ira sa nuitaki mera vosa ka veivakavulici ena noda soqoni e dodonu mera cakava ena kaukauwa vakaivunau ena rogoci ka vakilai, ka vakatatataki cake na yalo ka laveti cake o ira na noda. …

“… Dina ga ni dau ka vinaka na vakaraitaka na loloma kei na vakavinavinaka, ia e sega ni kovuta na mataqali ivakadinadina ena vakacaudreva na bukawaqa ni vakabauta ena nodra bula eso. Na kena cavuti na ivakadinadina sai koya ‘na cavuti na ivakadinadina ena kaukauwa ni Yalo Tabu; me vakaraitaki raraba ena vakarokoroko ni dina e yavutaki ena kila ni tamata yadua se vakabauta’ [iDusidusi ki na iVolanikalou, “Vakadinadinataka,” scriptures.lds.org]. Na kena vakaraitaki raraba na dina ena vakayaco veisau kina nodra bula na tamata. O ya na ka ena veisautaka na yalo ni tamata. Oqo na ka e rawa ni vakadeitaka na Yalo Tabu ki na yalodra na Luve ni Kalou” (“Pure Testimony,” Liaona, Nove. 2004, 41).

Vakatorocaketaki Noda Veivakavulici

Vakavakarau taumada “Ni ko tugana na sala era na vakalougatataki kina na lewe ni nomu kalasi mai na ivakavuvuli ni kosipeli o ivakavuvulitaka voli, ena basika mai na vakasama kei na veivakauqeti ki na nomu bula e veisiga—ni ko gole ki cakacaka, cakava na cakacaka e vale, se veimaliwai kei ira na matavuvale kei na veitokani. Kakua ni nanuma na vakavakarau vakayalo me dua na kena gauna vakarautaki ia me dua na ka o sa vakamatautaka tu” (Veivakavulici ena iVakarau ni iVakabula, 12).