E veivakavulici tiko o Paula ena delana

24–30 ni Jiulai

Cakacaka 16–21

“Sa Kacivi Keitou na Turaga me Keitou Vunautaka na iTukutuku Vinaka”

Ni bera nio raica na ituvatuva oqo, wilika ena masumasu na Cakacaka 16–21 nio vakasamataki ira tiko na lewe ni nomu kalasi. Na vakasama e tarava ena rawa ni tokona na veivakauqeti o ciqoma mai na Yalo Tabu.

ivakatakilakila ni veiwasei

Sureta na Veiwasei

Sa rawa mo sureta na lewe ni kalasi mera wasea e dua na itukutuku mai na Cakacaka 16–21 e vakavotuya vei ira na gauna era wasea kina na kosipeli.

ivakatakilakila ni veivakavulici

Vakavulica na iVunau

Cakacaka 16–21

Ni da lewe ni Lotu ni Vakabula, eda vakadinadinataki Koya ka wasea na Nona Kosipeli.

• Dua na itukutuku cecere ena Cakacaka 16–21 sai koya na bibi ni Yalo Tabu ena kena wasei na kosipeli. Dua na kena ivakaraitaki, mera na raica na lewe ni kalasi na sala a vukei Paula kei Sailasa kina na Yalo Tabu ena Cakacaka 16:6–15. Na cava eda gadreva kina na Yalo Tabu ni da wasea na kosipeli? (raica na 2 Nifai 33:1; Vunau kei na Veiyalayalati 33:8–10; 42:14; 100:5–8). Sa rawa mera wasea na lewe ni kalasi na gauna a dusimaka kina na Yalo Tabu na nodra sasaga ni kena wasei na kosipeli.

• Ena vakayaloqaqataki ira vakacava na lewe ni kalasi na veika a sotava o Paula ena gauna era vakauqeti kina me ra wasea na nodra ivakadinadina? Sa rawa mo kerea na lewe ni kalasi yadua me railesuva e dua vei ira na itukutuku oqo: Cakacaka 16:16–34; 17:16–34; 18:1–11. Kerei ira me ra wasea na ivakadinadina era raica kina na yaloqaqa kei na doudou nei Paula. Na ivunau cava a vakavulica o Paula (ka kila vinaka) ka solia vua na nuidei ena nona tukutuku? Na cava na vuna eda dau tuvakasuka kina ena so na gauna meda wasea na kosipeli, ka vukei keda vakacava na iVakabula? Vakayaloqaqataki ira na lewe ni kalasi me ra vakasamataka e dua na sala e rawa ni ra muria kina na ivakaraitaki nei Paula ka wasea vakawasoma na nodra ivakadinadina baleti Karisito (na vidio “I‘ll Go Where You Want Me to Go” [ChurchofJesusChrist.org] e rawa ni veivuke).

Cakacaka 17:16–34

Eda sa luvena kece na Kalou.

• Ena Delana o Arisi, a vakavulica o Paula baleta na Tamada Vakalomalagi kina dua na ilawalawa era kila vakatikina tu na ituvaki dina ni Kalou. Me dikevi na ivakavuvuli oqo, sa rawa kina kalasi mera wilika na Cakacaka 17:24–31 ka vola ena vava na dina era sa kunea baleta na Tamada Vakalomalagi, na noda veiwekani kei Koya, kei na noda veiwekani vakai keda. Na cava era rawa ni wasea na kalasi baleta na gauna era vakila kina na dina ni itukutuku nei Paula ni Kalou “sa sega ga ni yawa ko koya vei keda yadua” (tikina e 27).

• Nio vakadikeva vata na veitikina oqo, navuca mo ni veivosakitaka na dina e vakatavulici ena tikina e 29: “Eda sa luve ni Kalou.” Sa rawa mo vola ena vava ni volavola baleta ni da sa luve ni Kalou, ia kevaka eda sega ni kila ni da sa luve ni Kalou, Sureta na lewe ni kalasi mera vakatura eso na sala me vakataucokotaki kina na yatuvosa e rua oqo. Me ivakaraitaki, na cava e vakavulica vei keda na dina ni da sa luvena na Kalou me baleti keda kei na ivakarau e dodonu me da dau veiraici kina vakataki keda? Ena duatani vakacava na noda bula kevaka eda sega ni kila na dina ni noda sa vuvale vata kei na Kalou? Na cava e vakuria kina na veivosaki oqo na itukutuku nei Peresitedi Dallin H. Oaks ena “iKuri ni iTukutuku”?

  roqoti tiko na gone

  O keda yadua eda luve ni Kalou.

ivakatakilakila ni ivurevure

iKuri ni iVurevure

Eda luvena kece na Kalou.

“Na Matavuvale: Ai Vakaro ki Vuravura Raraba” e wasei mai kina na dina tawamudu me baleta na noda veiwekani kei na Kalou: “Oi keda yadudua sara na tamata—na tagane kei na yalewa—eda a buli me ucuya na Kalou. O keda yadudua eda luvena yalewa se tagane lomani vakayalo na noda itubutubu vakalomalagi, ia, ni vakakina, sa tu na keda dui ituvaki kei na icavacava vakalou” (ChurchofJesusChrist.org).

Tukuna o Elder Dallin H. Oaks ena na kena bibi ni noda raici keda taumada ka vakabibi ni da sa luvena vakayalo na Kalou:

“Mo qarauna vakavinaka na ivakarau ni nomu bula. Me kua ni vakaivakarau se mo moici iko ena dua na ivakarau sega ni tudei. Na yavubula duadua ga me sa noda ivakarau ni bula ni da luvena tagane se luvena yalewa na Kalou. Na dina oqo e cecere cake duadua mai na ituvaki kece tale eso, oka kina noda kawatamata, cakacaka, ituvaki vakayago, itutu dokai, se nomu vakabauta vakalotu mada ga. …

“Eda sa bula galala, ka sa rawa meda digitaka na ituvaki cava ga mena vakaitovotaki keda kina. Ia e dodonu meda kila ni gauna eda sa digitaka kina na noda itovo se meda vakaraitaki keda ena so na ivakarau ni bula e lekaleka wale se tawayaga kina vakasama tawamudu, eda vakaluluqataki keda mai na veika bibi duadua baleti keda, ka da vakabibitaka cake sara ena veika sa sega ni bibi. Oqo e rawa ni muataki keda sobu ki na salatu cala ka vakacacana na noda torocake tawamudu” (“Be Wise” [lotu ni Brigham Young University–Idaho, Nove.7, 2006], byui.edu).

Vakatorocaketaki Noda Veivakavulici

Sureti ira na itabagone mera mai tiki ni lesoni. Ke o vakavulici ira na itabagone, nanuma tiko ni dau vakavuqa mera kila vinaka na veika era lako curuma tiko kei na nodra icaba. Ni cavuta na nona ivakadinadina e dua na itabagone se vakavulica na ivunau, e na rawa ni vakauqeti ira na itabagone ena sala o sega ni vakatotomuria rawa. Solia vei Ira na itabagone na madigi me ra veivakavulici vakataki ira. (Raica na Veivakavulici ena iVakarau ni iVakabula, 28.)