E vosa tiko o Jisu vei Pita e matasawa

Vakatawani Ira na Noqu Sipi,, mai vei Kamille Corry

26 ni Jiune–2 ni Jiulai

Maciu 28; Marika 16; Luke 24; Joni 20–21

“Sa Tucake Tale ko Koya”

Ni bera ni vakadikevi na veivakavulici e tiko ena ituvatuva oqo, wilika na Maciu 28; Marika 16; Luke 24; kei na Joni 20–21, ka vakasamataka vakatitobu me vakayagataki vakacava na wase oqo me vakaqaqacotaka nodra vakabauta oira o vakavulica tiko.

ivakatakilakila ni veiwasei

Sureta na Veiwasei

Me vukei nodra wasea na lewe ni kalasi na ka era sa vulica yadua kei na vakamatavuvale, kerea mera vola e dua na dina mai na wiliwili ni macawa oqo era nanuma me wasei yani ki “vuravura taucoko” (raica na Marika 16:15). Ni vakarau oti na kalasi, taroga kera sa kunea e dua tale na dina era gadreva mera wasea.

ivakatakilakila ni veivakavulici

Vakavulica na iVunau

Maciu 28; Marika 16; Luke 24; Joni 20

Baleta ga ni sa tucake tale o Jisu, eda na tucake talega.

• Sa rawa mo solia vei ira na lewe ni kalasi e vica na miniti me ra railesuva na ilesilesi ni wiliwili ena macawa oqo kei na “Resurrection” ena Bible Dictionary ka vola na dina eso era sa vulica me baleta na Tucake tale. Me ratou wasea e lewe vica na veika eratou sa vola, ka vakayaloqaqataki ira na lewe ni kalasi me ra laveliga ni dua e wasea e dua na dina e tautauvata kei na veika era vola. Na cava e bibi kina vei ira na dina oqo? E vakauqeta vakacava na noda veiwekani? E veivakauqeti vakacava na noda digidigi?

Luke 24:13–35

Eda rawa ni sureta na iVakabula me “tiko ga vei keda.”

• Me vukea na lewe ni kalasi mera raica na isema ni veika era sotava kei na ka rau sotava na tisaipeli ena sala ki Emeo, droinitaka e dua na gaunisala ena vava ni volavola, ka sureti ira na lewe ni kalasi mera vola na itukutuku ena Luke 24:13–35 dua na yasani gaunisala. Ka vola na veibasai e yasana kadua ni gaunisala na veika era sa dui sotava ni ra daumuri Jisu Karisito. Kena ivakaraitaki, mera vola “A sa matabuawataki na matadrau” (Luke 24:16) ena dua na yasa ni gaunisala kei na Eso na gauna eda sega ni kila na veivakauqeti ni Turaga ki na noda bula ena yasana ka dua. Me da sureta vakacava na iVakabula me tiko ga vei keda?

Sa rairai na Karisito sa Tucake tale vei iratou na iApositolo

E vakavulici Tomasi o Jisu “Mo kakua ni vakatitiqa, mo vakadinata ga” (Joni 20:27

Joni 20:19–29

“Sa kalougata ko ira era sa sega ni raica, ka ra sa vakadinata.”

• Sa rawa ki na nomu kalasi ni Matawilivola ni Siga Tabu me vanua ni nodra vakaukauwataki ni vakabauta ena veika era sega ni raica. Sa rawa mo tekivu ena nomu kerea e dua me vakalekalekataka na ka a sotava o Tomasi ena Joni 20:19–29. Sa rawa mo vakaraitaka talega na vidio “Blessed Are They That Have Not Seen, and Yet Have Believed” (ChurchofJesusChrist.org). Sa rawa mera vola na lewe ni kalasi ena vava ni volavola na veika e kerea tiko vei keda na Kalou meda vakadinata ni da sega ni raica. Sa rawa mo qai kerei ira mera wasea na veika era sotava ka vaqaqacotaka na nodra ivakadinadina me baleta na veika oqo kei na veivakalougatataki e yaco vei ira ni ra cakacakataka na nodra vakabauta.

Joni 21:1–17

E sureti keda na iVakabula meda vakania na Nona sipi.

• Na cava e rawa ni vukei ira na nomu lewe ni kalasi mera ciqoma na veisureti ni iVakabula mera “vakani ira na [Nona] sipi”? Tekivu ena nomu sureta mera wilika na Joni 21:15–17 ka sosomitaka na yaca i Saimoni ena yacadra kei na “noqu lami” kei na “noqu sipi” ena yaca ni tamata era nanuma ni vinakata na Turaga mera qarava—me ivakaraitaki, ira era veiqaravi kina, wekeda, se oira era kila e vanua ni cakacaka se koronivuli. Ni oti e vica na miniti, mera wasea na lewe ni kalasi na nodra nanuma. Na cava eda vulica baleta na iVakabula mai na Nona ivalavala ena Joni 21:4–13? Na cava eda rawa ni cakava meda vakania kina na lami kei na sipi ni iVakabula? Ena veivuke na itukutuku nei Elder Gary E. Stevenson ena “iKuri ni iVurevure” e rawa ni veivuke ena kena saumi na taro oqo.

ivakatakilakila ni ivurevure

iKuri ni iVurevure

Eda na “vakania vakacava na [Nona] sipi”?

E vakamacalataka o Elder Gary E. Stevenson na sala eda rawa ni vakayacora kina na ivakaro ni Turaga meda vakania na Nona sipi:

“O cei na ivakatawa ni sipi? Na turaga, marama, kei na gone kecega ena matanitu ni Kalou esa ivakatawa. E sega ni gadrevi na veikacivi. Ena gauna ga eda sa lako cake mai kina ena wai ni veipapitaisotaki, eda sa lesi kina cakacaka oqo. Eda tatara yani ena loloma vei ira na tani baleta ni sa vakaroti keda kina na iVakabula me da kitaka. … Ena gauna era leqa kina na kainoda, vakayago se vakayalo, da lai vukei ira sara. Eda colata vata na noda icolacola me mamada kina. Eda rarawa vata kei ira sa rarawa. Eda vakacegui ira era gadreva tu na veivakacegui [raica na Mosaia 18:8–9]. Oqo sa namaka vei keda na Turaga ena yalololoma. Ka na yaco mai na siga eda na saumitaro kina ena vuku ni noda yalokauwai ni da veiqaravi vei ira na Nona qele ni sipi [raica na Maciu 25:31–46]” (”Vakatawa na Yalo,” Liaona, Nove. 2018, 111).

Vakatorocaketaki ni Noda Veivakavulici

Me tiko na nodra gauna ni veiwasei na vuli tiko. “Ni ra wasea na vuli tiko na veika era sa vulica, e sega walega ni ra vakila na Yalotabu ka vaqaqacotaka na nodra dui ivakadinadina, ia era vakayaloqaqataki ira talega na vo ni lewe ni kalasi me ra raica vakataki ira na dina. … Solia na gauna ni veiwasei vei ira na gonevuli ena veilesoni yadua—ena so na gauna, o na raica beka ni veivosakitaki oqo na lesoni” (Veivakavulici ena iVakarau ni iVakabula, 30).