17–23 ni Jiulai

Cakacaka 10–15

“Sa Tubu Vakalevu na Vosa ni Kalou”

Na kena vulici ena masumasu na Cakacaka 10–15 ni bera ni wiliki na ituvatuva oqo ena vukei iko mo ciqoma na veivakauqeti ni Turaga. Na vakasama e tarava sa vakatutu walega.

Sureta na Veiwasei

Sureti ira na lewe ni kalasi me ra wasea vua e dua e dabe volekata e dua na ka a vakavulica vei ira na Yalo ni ra wilika na Cakacaka 10–15. Sureta e vica mera wasea na nodra veivakararamataki kina kalasi.

Vakavulica na iVunau

Cakacaka 10; 11:1–18; 15:1–25

E vakavulici keda na Tamada Vakalomalagi ena vosa ena vosa mai na ivakatakila.

• Eso na lewe ni kalasi era nanuma cala tiko baleta na ivakarau ni kena ciqomi na ivakatakila. Ena veivuke vei ira mera veivosakitaka na sala a yaco kina vei Pita na ivakatakila kei na nodra rawa ni toso ki liu, ka “kakua ni veileti na lomamu” (Cakacaka 10:20), ni vaka me sega ni taucoko se sega ni matata na ivakatakila. Sa rawa mo vola e dua na laini ena vava ka vola ena tutuna e muri Sa dodonu me vunautaki na kosipeli vei ira na kai Matanitu Tani. Taleva lesu vakalasi, na Cakacaka 10 kei na 11:1–18, ka qai toqa na poidi ena laini ni sa vakaraitaka tiko ni sa vakatakila na Turaga vei Pita ena veikalawa yadua ni sa kena gauna me sa vunautaki yani na kosipeli vei ira na kai Matanitu Tani. Me vakataka, ni sa rawa mo tekivutaka na poidi ena kena volai kina “Sa raica na raivotu o Konilio” (Cakacaka 10:1–6) se tekivu ena ivakaro ni iVakabula vei iratou na Nona tisaipeli mera “vakalotutaki ira na lewe ni veivanua kece ga” ena Maciu 28:19. Na cava e rawa ni da vulica baleta na ivakatakila mai na ka a sotava o Pita? Na cava e vakuri ki na veika eda kila mai na ivakavuvuli nei Nifai baleta na ivakatakila ena 2 Nifai 28:30 kei na ivakavuvuli nei Elder David A. Bednar ena “iKuri ni iVurevure”?

  

  Ena yaco mai na ivakatakila kina tamata yadua ena kena gauna ena sasaga gugumatua.

• Sa rawa mo vulica na gauna eso ena ivolanikalou a vakavulici ira kina na tamata na Turaga ena vosa ena vosa. Me ikuri ni ka a sotava o Pita ena Cakacaka 10, mera na taleva lesu na kalasi na veika a sotava o Nifai (1 Nifai 18:1–3); Alama (Alama 7:8; 16:20); kei Momani (3 Nifai 28:17, 36–40). Na ivakaraitaki cava tale era vakasamataka rawa na lewe ni kalasi era ciqoma kina na tamata na veidusimaki vakayalo “vakalailai eke ka vakalailai e kea”? (2 Nifai 28:30). Na cava na vuna e dau vakatakila mai kina na Turaga na veika eso ena sala oqo ka sega ni solia kece ga mai na isaunitaro ena dua vata ga na gauna? (raica na Vunau kei na Veiyalayalati 50:40; 98:12).

• Eso na gauna era dau taroga se kauwai na lewenilotu baleta na veisau ni lawatu kei na parokaramu ni Lotu. Ena vukei ira mera na veivosakitaka na ivakatakila me sa tekivu vunautaki na kosipeli vei ira na kai Matanitu Tani (raica na Cakacaka 10) sa mai sosomitaka na ivakaro ni Turaga taumada vei ira na Nona tisaipeli (raica na Maciu 10:1, 5–6). Sa rawa mo vakaraitaka na vidio “The Jerusalem Conference” (ChurchofJesusChrist.org). Na cava era na cakava na lewe ni kalasi vua e dua ena gauna nei Pita a sega ni kauwai kina veidusimaki nei Pita baleta ni saqata na lawa ena gauna e liu? E na vukei keda vakacava na ivakatakila ena Cakacaka 10 meda muria na tomani tiko mai ni ivakatakila ni Turaga mai vei ira na Nona parofita?

Cakacaka 10:9–48

“Na Kalou sa sega ni digitaka vakailoa na tamata.”

• Ena yaga cake beka vei ira na nomu lewe ni kalasi mera veivosakitaka na ibalebale ni “sega ni digitaka vakailoa na tamata”? Sa rawa mo tekivu ena nomu sureta na kalasi mera wilika na ivolanikalou e vakavulica ni Kalou e sega ni digitaka vakailoa na tamata, me vakataka na Roma 2:1–11; 1 Nifai 17:34–40; 2 Nifai 26:32–33; Alama 5:33; Moronai 8:12; kei na Vunau kei na Veiyalayalati 1:34–35. Kerei ira na lewe ni kalasi mera vola na ibalebale ni “sega ni digitaka vakailoa na tamata,” yavutaki ena ka era sa wilika, ka qai wasea na ka era sa vola. E vakaraitaka vakacava na veika a yaco kei na ivakavuvuli ena Cakacaka 10:34–48 ni Kalou sa sega ni digitaki ira vakailoa na tamata? Ena rawa vakacava vei ira sa yalododonu mera “ciqomi” ka “vakadonui” mai vua na Kalou dina ga ni sa sega ni digitaki ira vakailoa na tamata o Koya? (raica na Cakacaka 10:34–35; 1 Nifai 17:35).

  Sa rawa mo vukei ira na lewe ni kalasi mera kila vinaka ni “sega ni digitaka vakailoa na tamata” e sega ni kena ibalebale ni sa dau vakalougatataki keda vakatautauvata na Kalou se cava ga na noda ivalavala. Sa gadrevi ira taucoko na Luvena mera ciqoma na Nona kosipeli, ia na taucoko ni veivakalougatataki ni kosipeli sa nodra o ira era cakava ka maroroya na veiyalayalati kei Koya.

iKuri ni iVurevure

Ciqomi ni ivakatakila ena vosa ena vosa.

A vakavuvulitaka o Elder David A. Bednar: “E vuqa vei keda era nanuma ni da na ciqoma e dua na isau se dua na veivakauqeti ki na noda masu kei na vakatakekere yalodina. Ka sa matau meda namaka tiko ni na yaco mai ena gauna vata ga ka duavata ga na gaunana isau se na veivakauqeti vaqori. Koya gona, eda sa dau vakabauta ni na solia vei keda vakatotolo na Turaga na kena isau levu ena dua vata ga na gauna. Ia, na kena ivakarau sa tukuni wasoma tiko ena ivolanikalou e vakatura tiko ni da na ciqoma ena ‘vosa ena vosa, vunau ena vunau,’ se sa kena ibalebale, ena vuqa na kena isau lalai ni toso tiko na gauna. Na kena vakadeitaki ka kilai vinaka na ivakarau oqo sa idola bibi ni kena ciqomi na veivakauqeti vakayalo kei na veivuke mai vua na Yalo Tabu” (Line upon Line, Precept upon Precept,” New Era,Sepi. 2010, 3–4).

Vakatorocaketaki Noda Veivakavulici

Tekivu ena ivolanikalou. Ni bera ni ko gole ki na ivurevure veitokoni, vulica vagumatua na ivolanikalou makawa kei na kena ena gauna oqo. Na vulici ena masumasu ni vosa ni Kalou ena vakatara na Yalo me vukei iko mo dreta mai na veika o sa vulica ni ko veivakavulici. (Raica na Veivakavulici ena iVakarau ni iVakabula,, 12.)