e vuqa na tamata era tu ena bati ni uciwai ka papitaiso e uciwai

Siga ni Penitiko, mai vei Sidney King

3–9 ni Jiulai

Cakacaka 1–5

“Dou na Qai Dautukuni Au”

Kevaka o na wilika na Cakacaka 1–5 ka vakasaqara na veidusimaki ni Yalo tabu, o na ciqoma na veivakauqeti me baleta na dina cava ena wase ena vukei ira na lewe ni kalasi mera vakararavi vakalevu cake vua na Yalo Tabu ka mera dautukuna ena yalodina na Turaga o Jisu Karisito.

ivakatakilakila ni veiwasei

Sureta na Veiwasei

E vuqa sara tu na itukutuku kei na ivakavuvuli e vakaibalebale cake e tiko ena Cakacaka 1–5. Dua na sala cecere me kunei kina na ka cava e yaga vakalevu duadua ka gadrevi vei ira na lewe ni kalasi o ya mera tukuna vei iko na ka era taleitaka ena nodra vuli ivolanikalou. O na sureta vakacava na mataqali veiwasei vakaoqo? Ena rawarawa sara ke o solia e vica na miniti mera raica ka wasea e dua na tikina mai na Cakacaka 1–5 era vakila na domo ni Turaga ni vosa tiko vei ira.

ivakatakilakila ni veivakavulici

Vakavulica na iVunau

Cakacaka 1:1–8; 2:37–39; 4:1–13, 31–33

E liutaka na Nona Lotu o Jisu Karisito mai vua na Yalo Tabu.

• Na wiliki ni veika era a sotava na Apositolo ena vukei ira na lewe ni nomu kalasi mera raica na sala era na rawata kina na kaukauwa kei na veidusimaki mai vua na Yalo Tabu ena nodra veiqaravi ena itavi ena loma ni Lotu. Dua na sala me talevi lesu kina na veika a yaco ena Cakacaka 1–5 o ya me volai ena vava Na Yalo Tabu a vukei ira na Apositolo me ra liutaka na Lotu ena: oti qai sureti ira na lewe ni kalasi mera vakasaqara ena Cakacaka 1:1–8; 2:37–39; kei na 4:1–13, 31–33, na sala me vakacavari kina na yatuvosa oqo. Oti me ra qai wasea na veika era sa sotava oti ena gauna a vukei ira kina na Yalo Tabu ena sala oqo. Na cava na vuna era gadreva kina na Yalo Tabu na Apositolo—kei na cava na vuna eda gadrevi Koya kina?

Cakacaka 1:15–26

Era sa kacivi na Apositolo i Jisu Karisito mai vua na Kalou ena vuku ni vakatakila.

• Navuca mo sureti ira na lewe ni kalasi mera vakamacalataka na sala e rawa na muria nadua ni bisinisi me digitaka me vakasosomitaka edua e vakaitutu cecere. Na rawaka vakavuli cava era vakasaqara? Kerei ira na lewe ni kalasi mera veidutaitaka oqo vata kei na sala a kacivi kina na Apositolo o Mataiasi (raica na Cakacaka 1:15–26; raica talega na 1 Samuela 16:1–13) kei na vosa nei Peresitedi Gordon B. Hinckley ena “iKuri ni iVurevure” vakamacalataka na sala era kacivi kina na Apositolo nikua. E vakayaco ka vakacava kina noda vakabauta na nona veidigitaki na Kalou vei ira na iliuliu e kaciva o Koya? Sa rawa mera wasea na lewe ni kalasi na sala era rawata kina e dua na ivakadinadina ni ra kacivi mai Vua na apositolo kei na parofita nikua.

Cakacaka 2:37–47

E vakauqeti keda na Yalo Tabu meda cakacakataka na veika eda sa vulica.

• Ni ra vulica tiko na ivolanikalou mai vale na lewe ni kalasi vakakina ena kalasi ena veimacawa, sa rawa ni ra vakila me vaka e “laucoka na yalodra” (Cakacaka 2:37). Ena veivakauqeti sa rawa mo vukei ira mera toso yani ki liu ena nomu taroga na taro, “Na cava meda cakava?” (Cakacaka 2:37). Me wiliki vata na Cakacaka 2:37–47 ka sureta na kalasi mera vakasaqara na veika era a cakava na lewe 3,000 na tamata ni oti na veisureti nei Pita. E rawa mera wasea talega na sala eso era cakacakataka kina na veivakauqeti ni ra vulica na vosa ni Kalou. Mo solia na gauna ni vakarau oti na kalasi kina tamata yadua me tarogi koya vakai koya “Na cava meu na cakava?” ka vola na nodra nanuma.

E matadredredre o Pita ka vunau voli ena mavoa e matana.

Dina ga ni a vesu ka mokulaki, a vunautaka vakadoudou o Pita na kosipeli.

Cakacaka 3; 4:1–21; 5:12–42

Ni da vakasinaiti ena Yalo Tabu, sa rawa meda vunautaka vakadoudou na kosipeli.

• Sa rawa kina lewe ni kalasi mera railesuva na Cakacaka 3; 4:1–21; 5:12–42, ka vakaraica na ivakaraitaki ni nona vakadinadina ena yaloqaqa o Pita. Na itukutuku ni veiwase oqo era dramataki tiko ena vidio “Peter Preaches and Is Arrested,” “Peter and John Are Judged,” kei na “Peter and John Continue Preaching the Gospel” (ChurchofJesusChrist.org). Na cava na kena ibalebale me da “vosataka vakadoudou na vosa ni Kalou”? (Cakacaka 4: 31). Ena vukei keda vakacava na Yalo Tabu meda wasea na kosipeli? E duidui vakacava na mataqali yalodoudou vakaoqo mai na yalo ni veileti? Ena tu na veika era sotava na lewe ni kalasi mera wasea baleti ira, se e dua era kila, e doudou me tutaka ka vakadinadinataka na kosipeli.

ivakatakilakila ni ivurevure

iKuri ni iVurevure

Na nodra kacivi na lewe Tinikarua.

Wasea o Gordon B. Hinckley na veivakararamataki oqo me baleta na ivakarau ni kena kacivi e dua na Apositolo vou: “Na kena ivakarau sa matata vinaka tu ena Lotu ni Turaga. E sega ni dau vakasaqarai na itutu, se cicivi ni ilesilesi, se vunautaki na savasava ni dua na tamata. E veibasai na sala ni Turaga mai na sala ni vuravura. E vakanomodi na sala ni Turaga, sa sala ni vakacegu, e sega kina na veiqoroqoroi se veika vakailavo. E sega kina na dokadoka se ka vakavuravura se gu vakatamata. Ena ituvatuva ni Turaga, o ira sa nodra ilesilesi mera digitaka na vakailesilesi era sa liutaki mai na dua na taro e veiuabaleti: ‘O cei ena vinakata na Turaga?’ E dau yaco na vakanananu vakanomodi kei na kena vakasamataki. Sa yaco kina na masumasu vagumatua me ciqomi kina na veivakadeitaki ni Yalo Tabu ni sa dodonu na digidigi” (“God Is at the Helm,” Ensign, Me 1994,53).

Vakatoroicaketaki Ni Noda Veivakavulici

Sureti ira na vuli mera cakacakataka. Na Yalo Tabu e dau vakauqeti keda meda cakacakataka na veika eda sa vulica tiko (raica na Cakacaka 2:37). Ni yaco na veika oqo vei ira na tamata e vakavulica tiko o Pita, a veisureti yani (raica na Cakacaka 2:38). Vakasamataka na sala o rawa ni muria kina na ivakaraitaki i Pita.